ఆదివారం 07 జూన్ 2020
Sports - Mar 31, 2020 , 20:11:37

ఐపీఎల్ రద్దయితే ఆటగాళ్లకు భారీ షాక్!

ఐపీఎల్ రద్దయితే ఆటగాళ్లకు భారీ షాక్!

న్యూఢిల్లీ: కరోనా వైరస్ కారణంగా ఈ ఏడాది జరగాల్సిన ఇండియన్ ప్రీమియర్లీగ్​(ఐపీఎల్​) 13వ సీజన్సందిగ్ధంలో పడింది. మార్చి 29 నుంచి ఏప్రిల్​ 15కు వాయిదా పడినా లాక్డౌన్ కారణంగా ఈ తేదీన ప్రారంభమయ్యే అవకాశం లేదు. మహమ్మారి తీవ్రత పెరుగుతుండడంతో ఈ ఏడాది సీజన్ రద్దయ్యే అవకాశాలున్నాయంటూ అంచనాలు వెలువడుతున్నాయి. ఈ ఏడాది చివర్లో నిర్వహించాలంటే చాలా ద్వైపాక్షిక సిరీస్లు సర్దుబాటు చేయాల్సి ఉంటుంది. ఈ నేపథ్యంలో అసలు ఈ ఏడాది ఐపీఎల్ రద్దయితే ఆటగాళ్ల పరిస్థితేంటన్నది తీవ్ర చర్చనీయాంశమైంది. అయితే ఐపీఎల్ జరగకుంటే.. ప్లేయర్లకు చెల్లింపులు కూడా ఉండవనే అంశం తెరపైకి వచ్చింది. ఇచ్చినా భారీ కోత పడే అవకాశం ఉందనే అంచనాలు వెలువడుతున్నాయి.

ఇప్పటి వరకు చెల్లించలేదు

ఈ ఏడాది ఐపీఎల్ సీజన్కోసం ఒప్పందం చేసుకున్న ప్లేయర్లకు ఇప్పటి వరకు జట్ల యాజమాన్యాలు ఎలాంటి చెల్లింపులు చేయలేదని ఓ ఫ్రాంచైజీకి చెందిన సీనియర్ అధికారి వెల్లడించారు. “ఐపీఎల్ చెల్లింపుల ప్రక్రియ ప్రకారం సీజన్ ప్రారంభానికి వారం రోజుల ముందు ప్లేయర్లకు 15శాతం చెల్లిస్తారు. మిగతా 65శాతం టోర్నీ జరిగే సమయంలో ఇస్తారు. మిగిలిన 20శాతం.. సీజన్ ముగిసేలోగా ఆటగాళ్లకు అందుతుంది. దీనికి బీసీసీఐ నిర్దిష్ట మార్గనిర్దేశకాలు ఉన్నాయి. అయితే, ఈ ఏడాది ఇప్పటి వరకు ఏ ఆటగాడికి చెల్లింపులు జరగలేదుఅని ఆ అధికారి వెల్లడించారు.

ఎలా ఇవ్వగలం..

వైరస్ వల్ల సీజన్ జరగపోతే ఆటగాళ్ల వేతనాల చెల్లింపు కోసం బీమా లేదని, కాబట్టి ఎలా ఇవ్వగలమని మరో ఫ్రాంచైజీ అధికారి చెప్పారు. “ఇన్సూరెన్స్లో వైరస్ నిబంధనల లేదు. అందుకే బీమా సంస్థల నుంచి మాకు ఎలాంటి డబ్బు రాదు. ఆటగాళ్లకు వేతనాల రూపంలో ప్రతి ఫ్రాంచైజీ రూ.75 నుంచి రూ.85కోట్లు ఇవ్వాలి. సీజన్ జరగకపోతే ఎలా చెల్లించాలిఅని ఆ అధికారి ప్రశ్నించారు. అలాగే ఇంగ్లీష్ ప్రీమియర్ లీగ్​, లాలీగాతో పాటు అనేక టోర్నీల్లో ఆటగాళ్ల వేతనాల్లో కోత విధిస్తున్నారని, పరిస్థితులు చక్కబడే వరకు ఎక్కడా స్థిరత్వం ఉండదని అభిప్రాయపడ్డారు.

“ఐపీఎల్ రద్దయితే ధోనీ, కోహ్లీ లాంటి ఆటగాళ్ల మాత్రమే కాదు.. తొలిసారి ఐపీఎల్వేలంలో అమ్ముడైన ప్లేయర్లు మరింత ఎక్కువగా నష్టపోతారు. వారిలో కొందరిని ఫ్రాంచైజీలు రూ.20, 40, 60లక్షలకు దక్కించుకొని ఉంటాయి. ఆ ఆటగాళ్లు ఎంతో కష్టపడి ఉంటారు. వారి జీవితాలను మార్చేసే డబ్బు అది. వీరి కోసం బీసీసీఐ వద్ద ఏదో ఒక ప్రణాళిక ఉంటుందని ఆశిస్తున్నాంఅని ఆ అధికారి అన్నారు.

కాగా, ఆటగాళ్ల చెల్లింపుల కోత విషయంపై ఎలాంటి చర్చలు జరుగడం లేదని బీసీసీఐ కోశాధికారి అరుణ్ ధుమాల్ చెప్పారు. నష్టంపై ప్రస్తుతం ఏం చెప్పలేమని స్పష్టం చేశారు. ఐపీఎల్ రద్దయితే మొత్తం దాదాపు రూ.3వేల కోట్ల దాకా నష్టమొచ్చే అవకాశముందని విశ్లేషకులు అంచనా వేస్తున్నారు.

దేశవాళీ క్రికెటర్ల వేతనాల పెరుగుదల ఉండకపోవచ్చు

ఐపీఎల్ రద్దయితే ఆర్థికంగా బీసీసీఐకి భారీ నష్టం వాటిల్లుతుందని టీమ్ఇండియా మాజీ టెస్ట్ ఆటగాడు, భారత క్రికెటర్ల సంఘం అధ్యక్షుడు అశోక్ మల్హోత్ర అన్నారు. దీనివల్ల దేశవాళీ క్రికెటర్ల వేతనాల్లో కోత ఉండకపోవచ్చని, అయితే వేతనాలు ఊహించిన విధంగా పెరగపోవచ్చని అభిప్రాయపడ్డారు. “క్రికెట్ ద్వారానే బీసీసీఐకి డబ్బు వస్తుంది. ఒకవేళ ఆట జరగపోతే ఎక్కడి నుంచి వస్తుంది. ఈ విషయాన్ని ఆలోచించాలి. దీనివల్ల అంతర్జాతీయ క్రికెటర్లతో పాటు దేశవాళీ ఆటగాళ్లపై కూడా ప్రభావం పడుతుంది. దీంట్లో బోర్డు తప్పిదం ఏమీలేదు. ప్రస్తుతం తీవ్ర అనిశ్చితి నెలకొని ఉంది”  అని మల్హోత్ర చెప్పారు


logo