కివీస్‌ క్లీన్‌స్వీప్‌

• వెస్టిండీస్‌పై  2-0తో సిరీస్‌ కైవసం 
  

వెల్లింగ్టన్‌: రెండో టెస్టులో వెస్టిండీస్‌ను ఇన్నింగ్స్‌ 12 పరుగులతో చిత్తు చేసిన న్యూజిలాండ్‌ 2-0తో సిరీస్‌ను క్లీన్‌స్వీప్‌ చేసింది. 85 పరుగులు వెనుకబడి 244/6తో సోమవారం రెండో ఇన్నింగ్స్‌ను కొనసాగించిన విండీస్‌ మరో 73 పరుగులు జోడించి ఆలౌటైంది. ఈ విజయంతో టెస్టు ర్యాంకింగ్స్‌లో 116 రేటింగ్‌ పాయింట్లు సాధించిన న్యూజిలాండ్‌.. అగ్రస్థానంలోని ఆస్ట్రేలియాకు సమానంగా నిలిచింది. టెస్టుల్లో కివీస్‌ టాప్‌ ర్యాంకుకు చేరుకుంటే.. ఆ జట్టు ఈ ఘనత సాధించడం ఇదే తొలిసారి కానుంది. మరోవైపు ప్రపంచ టెస్టు చాంపియన్‌షిప్‌ పాయింట్ల పట్టికలో ఇంగ్లండ్‌ను అధిగమించిన కివీస్‌.. ఆస్ట్రేలియా, భారత్‌ తర్వాత మూడో స్థానంలో నిలిచింది.