By Maduri Mattaiah
తారాగణం:
నవీన్ పొలిశెట్టి, రాహుల్ రామకృష్ణ, ప్రియదర్శి, ఫరియా అబ్దుల్లా, మురళీశర్మ, నరేష్, తనికెళ్ల భరణి తదితరులు
వినోదాత్మక కథాంశాలకు ప్రేక్షకులు ఎప్పుడూ పెద్దపీట వేస్తారు. మంచి కథకు ఆహ్లాదభరితమైన హాస్యం తోడైతే ఆ సినిమా తప్పకుండా ఆదరణ సొంతం చేసుకుంటుంది. ఈమధ్య కాలంలో ‘జాతిరత్నాలు’ చిత్రానికి విడుదలకు ముందే హైప్ క్రియేట్ అయింది. ‘ఏజెంట్ సాయిశ్రీనివాస ఆత్రేయ’ వంటి విజయవంతమైన సినిమా తర్వాత నవీన్ పొలిశెట్టి నటిస్తున్న చిత్రం కావడం..ప్రముఖ దర్శకుడు నాగ్అశ్విన్ నిర్మాతగా అరంగేట్రం చేయడంతో ఈ ప్రాజెక్ట్ అందరి దృష్టిని ఆకట్టుకుంది. మరి తెరపై ‘జాతిరత్నాలు’ ఏస్థాయి వినోదాన్ని పండించారో తెలుసుకోవాలంటే కథలోకి వెళ్లాల్సిందే…
కథేమిటంటే…
శ్రీకాంత్ (నవీన్ పొలిశెట్టి) జోగిపేట టౌన్లో లేడీస్ ఎంపోరియమ్ నడిపిస్తుంటాడు. తన ఇద్దరు మిత్రులు శివ(రాహుల్ రామకృష్ణ), శేఖర్ (ప్రియదర్శి)తో కలిసి అల్లరిచిల్లర పనులతో సరదాగా కాలం గడుపుతుంటాడు. సొంత ఊళ్లో లేడీస్ ఎంపోరియమ్ నడపటం అవమానంగా భావిస్తూ హైదరాబాద్కు వెళ్లి ఉద్యోగం వెతుక్కొని స్థిరపడాలనుకుంటాడు. ఉద్యోగ వేటలో హైదరాబాద్కు వచ్చిన ముగ్గురు మిత్రులు అనూహ్యంగా ఓ నేరంలో చిక్కుకుంటారు. ఓ మంత్రిపై హత్యాయత్నం ఆరోపణలతో ముగ్గురిని అరెస్ట్ చేస్తారు. ఈ కేసు నుంచి వారు ఎలా భయటపడ్డారు? వీరికి చిట్టి (ఫరియా అబ్దుల్లా) ఎలాంటి సహాయం చేసింది? ఈ ముగ్గురి ప్రయాణంలో చోటుచేసుకున్న సంఘటనలు, ఈ క్రమంలో పండిన వినోదం ఏమిటన్నదే చిత్ర కథ..
కథా విశ్లేషణ
సందర్భోచితమైన హాస్యానికి నటీనటుల అభినయం, అదే స్థాయిలో సంభాషణలు తోడైతే వినోదానికి కొదువుండదు. ‘జాతిరత్నాలు’ విషయంలో ఈ మూడు అంశాలు చక్కగా కుదిరాయి. ప్రథమార్థమంతా నాన్స్టాప్ హాస్యంతో సాగింది. స్వతహాగా తెలంగాణ యాస, సంభాషణల్లో ఉండే కామెడీని దర్శకుడు అద్భుతంగా ఆవిష్కరించాడు. సిట్యుయేషనల్ కామెడీతో పాటు డైలాగ్లో పంచ్లతో మంచి హాస్యం పండింది. ముఖ్యంగా కథానాయిక చిట్టితో శ్రీకాంత్ పరిచయం..ప్రేమకు దారితీసే సన్నివేశాలు బాగా నవ్వించాయి. పంచ్లతో కూడిన డైలాగ్స్ హైలైట్గా అనిపించాయి. కథలోని లాజిక్ల కంటే ప్రతి సన్నివేశంలో కావాల్సినంత వినోదాన్ని పండించడంపైనే దర్శకుడు ఎక్కువగా దృష్టిపెట్టాడు. ఎమ్మెల్యేపై హత్యాయత్న నేరంతో ఇంటర్వెల్కు ముందు కథ కీలక మలుపు తీసుకుంటుంది.
ద్వితీయార్థంలో కూడా ఫస్టాఫ్ మాదిరిగానే కామెడీ టెంపోను కొనసాగించడంలో దర్శకుడు సఫలీకృతుడయ్యాడు. విలన్ డెన్లోకి చొరబడి తమకు కావాల్సిన సెల్ఫోన్ను చేజిక్కించుకునే ప్రయత్నాలు..కోర్ట్ రూమ్లో వినోదాత్మకంగా సాగే ఎపిసోడ్ కావాల్సినంత నవ్వుల్ని పంచింది. అయితే కథ ైక్లెమాక్స్ చేరుకునే క్రమంలో కొన్ని సన్నివేశాల్ని సాగదీసిన ఫీల్ కలిగింది. మొదటి భాగంలో ఉన్న స్పీడ్ ద్వితీయార్థంలో మిస్సయ్యిందనే భావన కలుగుతుంది. అయితే ఈ కథలో లాజిక్లను వెతకడం అంతగా అవసరం లేదు కాబట్టి కొన్ని మైనస్లు ఉన్నా కామెడీ ఫ్లోలో అవన్నీ కనిపించకుండా పోయాయి.
నటీనటుల పర్ఫార్మెన్స్
ఈ సినిమాకు నవీన్పొలిశెట్టి ప్రధాన బలంగా నిలిచాడు. తనదైన శైలి హావభావాలు, కామెడీ, డైలాగ్ డెలివరీతో అదరగొట్టాడు. ముఖ్యంగా ైక్లెమాక్స్ ఘట్టంలోని ఎపిసోడ్ ఆయన్ని మరోస్థాయిలో ఆవిష్కరించింది. వన్మెన్షోగా ఈ సినిమా నవీన్ ప్రతిభకు అద్దం పట్టింది. కాస్త అమాయకత్వం కలబోసిన పాత్రలో ప్రియదర్శి చక్కగా ఒదిగిపోయాడు. రాహుల్ రామకృష్ణ తనదైన ైస్టెల్ వినోదంతో ఆకట్టుకున్నాడు. ప్రేయసితో ఆయన జరిపే ఫోన్ సంభాషణలు నవ్వించాయి. సినిమా ఆద్యంతం ఈ ముగ్గురి పాత్రలతో ప్రేక్షకులు సహానుభూతిచెందేలా అద్భుతమైన నటనను కనబరిచారు.
చాలా విరామం తర్వాత సీనియర్ హాస్య నటుడు బ్రహ్మానందం ఈ సినిమాలో జడ్జ్గా మంచి పాత్రను పోషించారు. కోర్ట్ రూమ్లో కథానాయిక ఫరియా అబ్దుల్లా, బ్రహ్మానందం మధ్య వచ్చే సన్నివేశాలు నవ్వుల్ని పంచాయి. హైదరాబాదీ అమ్మాయి ఫరియా అబ్దుల్లా అందంగా కనిపించడంతో పాటు క్యూట్ యాక్టింగ్తో మెప్పించింది. ఇతర ముఖ్య పాత్రల్లో మురళీశర్మ, కె.వి.నరేష్, తనికెళ్ల భరణి, బ్రహ్మాజీ తమదైన అభినయంతో ఆకట్టకున్నారు.
దర్శకుడు అనుదీప్ సంగారెడ్డి ప్రాంతానికి చెందిన వాడు కావడంతో తెలంగాణ యాసలో చక్కటి పంచ్ డైలాగ్లతో కామెడీని పండించాడు. కథగా చిన్నలైన్ను రెండున్నరగంటల పాటు బోర్లేకుండా చెప్పడంలోనే దర్శకుడికి కామెడీపై ఉన్న పట్టు అర్థమవుతుంది. జోగిపేటలో చిత్రీకరించిన సన్నివేశాలు అక్కడి స్థానికతకు, సహజత్వానికి అద్దం పట్టాయి. ఈ సీన్స్లో దర్శకుడి పనితనం కనిపించింది. నిర్మాణ విలువలు బాగున్నాయి. రధన్ మ్యూజిక్, బ్యాక్గ్రౌండ్ స్కోర్ ఆకట్టుకున్నాయి. సినిమాటోగ్రఫీ బాగుంది. సాంకేతికంగా అన్ని అంశాలు చక్కగా కుదిరాయి.
లాజిక్లను పక్కనబెడితే రెండున్నర గంటల పాటు మనసారా నవ్వుకునే చక్కటి హాస్యమున్న సినిమా ఇది. ఈ మధ్యకాలంలో వచ్చిన పూర్థిస్థాయి వినోదభరిత చిత్రమిదేనని చెప్పొచ్చు.
తీర్పు:
రేటింగ్: 3/5
సినిమాటోగ్రఫీ:
సిద్ధం మనోహర్
సంగీతం:
రధన్
నిర్మాణ సంస్థ:
స్వప్న సినిమా
నిర్మాత:
నాగ్అశ్విన్
రచన-దర్శకత్వం:
నాగ్అశ్విన్
లోకల్ టు గ్లోబల్.. వార్త ఏదైనా.. అన్నీ ఒకే యాప్లో. నమస్తే తెలంగాణఆండ్రాయిడ్ యాప్ డౌన్లోడ్ చేసుకోండి.