పాట్నా: వైద్యుడి అసభ్య ప్రవర్తనపై నిరసన తెలియజేసిన మహిళపై కొందరు దాడి చేసి కొట్టారు. బీహార్లోని హాజీపూర్లో ఈ దారుణం జరిగింది. స్థానిక మదై చౌక్ ప్రాంతంలోని డెంటల్ క్లినిక్కు చెకప్ కోసం వచ్చిన తనపై డాక్టర్ అసభ్యంగా ప్రవర్తించి లైంగిక దాడికి యత్నించినట్లు ఒక మహిళ ఆరోపించింది. తాను కేకలు వేయడంతో బయట ఉన్న తన కుమారుడు లోపలికి వచ్చాడని, దీంతో ఆ వైద్యుడి బారి నుంచి తాను బయటపడినట్లు ఆమె తెలిపింది. అయితే, డాక్టర్ అసభ్య ప్రవర్తనపై ఆ మహిళ ఆసుపత్రి వద్ద నిరసన తెలుపగా కొందరు ఆమెపై దాడి చేసి కొట్టారు. బాధితురాలి ఫిర్యాదుతో డాక్టర్ అసభ్య ప్రవర్తనపై పలు సెక్షన్ల కింద పోలీసులు కేసు నమోదు చేశారు.
మరోవైపు వైద్యానికి డబ్బులు చెల్లించేందుకు ఆ మహిళ నిరాకరించిందని, గట్టిగా అడగంతో డాక్టర్పై తప్పుడు ఫిర్యాదు చేసిందని నిందితుడి సోదరుడు ఆరోపించారు. దీనిపై పోలీసులకు ఫిర్యాదు చేసినట్లు ఆయన చెప్పారు. కాగా, ఆ వైద్యుడు గతంలో కూడా పలువురు మహిళల పట్ల అసభ్యంగా ప్రవర్తించాడని, అయితే ఫిర్యాదు చేసేందుకు బాధితులు ముందుకు రాలేదని కొందరు స్థానికులు ఆరోపించారు.