DC vs SRH | ఢిల్లీ కేపిటల్స్ చేతిలో సన్రైజర్స్ హైదరాబాద్ ఘోర పరాజయం చెందింది. 135 పరుగుల స్వల్ప టార్గెట్తో బరిలో దిగిన ఢిల్లీ 8 వికెట్ల తేడాతో సన్రైజర్స్ను ఓడించింది. మొదట టాస్గెలిచి బ్యాటింగ్ ఎంచుకున్న సన్రైజర్స్ హైదరాబాద్ ఆరంభం నుంచే తడబడింది. పరుగుల ఖాతా తెరవకముందే వార్నర్ ఔటయ్యాడు. అప్పటి నుంచి హైదరాబాద్ ఆటగాళ్లు వరుసగా వికెట్లు సమర్పించుకుంటూనే వచ్చారు. వార్నర్ డకౌట్ తర్వాత వృద్ధమాన్ సాహా (18 ) కూడా పరుగులు చేయడంలో విఫలమయ్యాడు. సాహా తర్వాత విలియమ్సన్ (18), మనీశ్ పాండే (17) తడబడ్డారు. కేదర్ జాదవ్ మూడు పరుగులకే వెనుదిరిగాడు. హోల్డర్ కూడా పది పరుగులకే పెవిలియన్ చేరాడు. అబ్దుల్ సమద్ (28), రషీద్ ఖాన్ (22) మాత్రమే రాణించారు.
స్వల్ప లక్ష్యంతో బరిలోకి దిగిన ఢిల్లీ కేపిటల్స్ సునాయసంగా టార్గెట్ను ఛేదించింది. కేవలం రెండు వికెట్లను కోల్పోయి 17.4 ఓవర్లలో లక్ష్యాన్ని పూర్తి చేసింది. పృథ్వీ షా 11 పరుగులకే ఔట్ అయినప్పటికీ.. ఓపెనర్ శిఖర్ ధవన్ (42), శ్రేయాస్ అయ్యర్ (47), రిషబ్ పంత్ ( 35 ) రాణించారు. దీంతో ఆడుతూ పాడుతూ సన్రైజర్స్ హైదరాబాద్ను ఢిల్లీ ఓడించింది.