ఐపీఎల్-14లో చెన్నై సూపర్కింగ్స్ ఛాంపియన్గా నిలిచిన సంగతి తెలిసిందే. దుబాయి వేదికగా శుక్రవారం జరిగిన ఫైనల్ మ్యాచ్లో కోల్కతా నైట్ రైడర్స్ను 27 పరుగుల తేడాతో ఓడించింది. నాలుగో సారి ఐపీఎల్ ట్రోఫీని గెలుచుకుంది.
అయితే ఈ ఫైనల్ మ్యాచ్ కంటే ముందు కోల్కతా నైట్ రైడర్స్ కీపర్ దినేష్ కార్తీక్ తెలుగులో మాట్లాడి.. తెలుగు ప్రజల హృదయాల్లో నిలిచిపోయాడు. అది కూడా అచ్చమైన తెలుగులో అనర్గళంగా మాట్లాడటంతో దినేష్ ఫ్యాన్స్ ఫిదా అయిపోయారు. ఫైనల్ మ్యాచ్ ప్రారంభానికి ముందు స్టార్ స్పోర్ట్స్ 1 తెలుగు ఛానెల్ లో ప్రముఖ వ్యాఖ్యాత హర్షా భోగ్లే దినేష్ కార్తీక్ను ఇంటర్వ్యూ చేశారు.
ఈ సందర్భంగా దినేష్ కార్తీక్ తెలుగులో మాట్లాడి అందర్నీ ఆశ్చర్యపరిచాడు. ఐపీఎల్ 2021 ఫైనల్లో ఏమైనా ఒత్తిడి ఉందా అనే ప్రశ్నకు.. సాధారణ మ్యాచ్లానే ఫైనల్ను పరిగణిస్తున్నామని, ఒత్తిడి లేదంటూ చెప్పుకొచ్చాడు. ఒత్తిడిని అధిగమించేందుకు ప్రాక్టీస్ చేశామని, సరైన ప్రణాళికలతో బరిలోకి దిగుతున్నామని చెప్పాడు. తమ జట్టు సెకండాఫ్లో అద్భుతంగా రాణించిందని పేర్కొన్నాడు. ఫైనల్కు చేరేందుకు ఆటగాళ్లు ఎంతో శ్రమించారని దినేష్ కార్తీక్ చెప్పుకొచ్చాడు. ఇలా పూర్తి ఇంటర్య్యూను తెలుగులో మాట్లాడి ఫ్యాన్స్ను మెప్పించాడు. దీంతో దినేష్ కార్తీక్ అచ్చం తెలుగువాడిలా మాట్లాడి ఆకట్టుకున్నాడని నెట్టింట్లో కామెంట్లు చేస్తూ ఈ వీడియోను షేర్ చేశారు.
తెలుగు వ్యక్తి అయినా హర్షా భోగ్లే సైతం దినేష్ కార్తీక్ను మెచ్చుకుంటూ ట్వీట్ చేశాడు. తెలుగు ఇంటర్వ్యూ చేస్తానని కలలో కూడా ఊహించలేదని అన్నాడు. ఇదిలా ఉంటే, డీకే.. 2020 ఐపీఎల్ సందర్భంగా కూడా తెలుగులో మాట్లాడి తెలుగు ప్రేక్షకులను ఆకట్టుకున్నాడు.