వరంగల్: గతంలో ఏ ముఖ్యమంత్రి కూడా ఎంజీఎం దవాఖానను పట్టించుకోలేదని మంత్రి ఎర్రబెల్లి దయాకర్ రావు అన్నారు. సెంట్రల్ జైలు తరలింపు, సూపర్ స్పెషాలిటీ హాస్పిటల్ నిర్మాణంపై పెదవి విప్పలేదని విమర్శించారు. దీనికి భిన్నంగా సీఎం కేసీఆర్ స్పందించడమే కాకుండా, స్వయంగా వరంగల్ వచ్చి పరిశీలించడం ఇక్కడి ప్రజల అదృష్టమని చెప్పారు. నిన్న సీఎం కేసీఆర్ వరంగల్ పర్యటన సందర్భంగా తీసుకున్న నిర్ణయాలపై హన్మకొండలో ప్రభుత్వ చీఫ్ విప్ దాస్యం వినయ్, ఎమ్మెల్యేలతో కలిసి మంత్రి మీడియాతో మాట్లాడారు.
దేశంలో ఇప్పటివరకు ఏ ముఖ్యమంత్రయినా, కేంద్ర మంత్రులైనా కొవిడ్ వార్డుల్లోకి వెళ్లారా అని ప్రశ్నించారు. ఆ పని సీఎం కేసీఆర్ చేశారని, వార్డల్లోకి వెళ్లి బాధితులకు భరోసా కల్పించారని చెప్పారు. కరోనా బాధితులను ఆదుకోవడానికి దాతలు చేస్తున్న సహాయం అభినంద నీయమన్నారు. ఎంజీఎంలో కొంత టెక్నీకల్ స్టాఫ్ కొరత ఉందని, దీంతో వెంటనే ఆ కొరత తీర్చాలని సీఎం ఆదేశించారని వెల్లడించారు. అదేవిధంగా దవాఖానలో ఆక్సిజన్, మందులు తగిన మోతాదులో ఉన్నాయని చెప్పారు. ఎజీఎంపై ప్రజలకు నమ్మకం పెరిగినందువల్లే రోగులు పెరిగారని తెలిపారు.
సెంట్రల్ జైలు తరలింపుకు సీఎం మంచి ఆలోచన చేశారని, జైలు వెనక ప్రస్తుతం 23 ఎకరాల ఖాలీ స్థలం ఉందని చెప్పారు. అక్కడ సూపర్ స్పెషాలిటీ దవాఖానకు సంబంధించిన నిర్మాణ పనులను వెంటనే ప్రారంభించాలని, ప్రస్తుతం ఉన్న ఎంజీఎంను మాతా శిశు సంరక్షణ కేంద్రంగా మార్చాలని సీఎం సూచించారని వెల్లడించారు. వరంగల్ను హెల్త్ హబ్గా తయారు చేయాలన్నదే సీఎం ఆలోచనని చెప్పారు. వరంగల్ ప్రజలు, ప్రజాప్రతినిధులందరి తరుపున సీఎం కేసీఆర్కు కృతజ్ఞతలు తెలుపుతున్నామని వెల్లడించారు. తన రాజకీయ జీవితంలో ఇలాంటి ముఖ్యమంత్రిని ఎప్పుడూ చూడలేదన్నారు.
ప్రధాని మోదీ బయటకు రావాలని, రాష్ట్రాల్లో తిరగాలని సూచించారు. పబ్లిసిటీ కోసం మీడియాలో కనిపించడం కాకుండా, ప్రతి రాష్ట్రంలో పర్యటించి వాస్తవ పరిస్థితులను తెలుసుకోవాలని చెప్పారు. ప్రధానికి గుజరాత్ తప్ప ఏ రాష్ట్రం కనిపించడం లేదని ఆగ్రహం వ్యక్తంచేశారు. కనీసం వ్యాక్సినైనా వేయించే సోయి లేదని విమర్శించారు. కేంద్ర మంత్రులు సైతం రాష్ట్రాల్లో పర్యటించాలని చెప్పారు. బీజేపీ నేతలు పిచ్చి మాటాలు మానుకోవాలని హితవు పలికారు. పైసాకు అక్కరికి రాని బీజేపీ నేతలు కూడా ఇష్టం వచ్చినట్లు మాట్లాడుతున్నారని ఆగ్రహం వ్యక్తంచేశారు.
లోకల్ టు గ్లోబల్ వార్తల కోసం.. నమస్తే తెలంగాణ ఫేస్బుక్, ట్విటర్ పేజీలను ఫాలో అవ్వండి