మన్సూరాబాద్, జూలై 3: వ్యాపార లావాదేవీల్లో తలెత్తిన వివాదంలో కొందరు వ్యక్తులు ఒకరిని కిడ్నాప్ చేశారు. ఈ విషయం తెలుసుకున్న పోలీసులు మూడు బృందాలుగా ఏర్పడి గాలింపులు చేపట్టడంతో కిడ్నాప్ చేసిన వ్యక్తిని కిడ్నాపర్లు మార్గమధ్యంలోనే వదిలేసి వెళ్లారు. ఈ ఘటన ఎల్బీనగర్ పోలీస్స్టేషన్లో జరిగింది. పోలీసుల వివరాల ప్రకారం.. శంకర్నగర్కు చెందిన ఆరీఫ్ అక్బానీ (43) ఎల్బీనగర్, బైరామల్గూడ, డిఫెన్స్కాలనీలో కైఫ్ ట్రేడర్స్ పేరుతో టింబర్ డిపో నడుపుతున్నాడు. మహారాష్ట్ర, నాగపూర్కు చెందిన తారీక్, లుక్మాన్ల వద్ద నుంచి కలపను తీసుకువచ్చి వ్యాపారం నిర్వహిస్తున్నాడు. అయితే కొనుగోలు చేసిన కలపకు డబ్బులు ఇవ్వకుండా వేధిస్తున్నాడు. ఈ విషయమై మాట్లాడుకుందామని వారు అడిగినా ఆరీఫ్ నుంచి స్పందన లేకపోవడంతో కిడ్నాప్కు స్కెచ్ వేశారు.
ఈ క్రమంలో శుక్రవారం సాయంత్రం ఆరు గంటలకు డిఫెన్స్ కాలనీలోని కైఫ్ ట్రేడర్స్ షాపు వద్దకు నలుగురు వ్యక్తులు ఇన్నోవాలో వచ్చారు. ఇందులో ఇద్దరు షాపులోకి వెళ్లి వెంటనే సీసీ కెమెరాలను ఆఫ్ చేశారు. అనంతరం తమ వద్ద కొనుగోలు చేసిన కలుపకు డబ్బులు ఇవ్వకుండా వేధిస్తావా అంటూ ఆరీఫ్ను ఇన్నోవా కారులో బలవంతంగా ఎక్కించుకున్నారు. అయితే కిడ్నాప్ వ్యవహారాన్ని ఆరీఫ్ డ్రైవర్ ఎండీ అమీర్(29) చిత్రీకరిస్తుండగా అడ్డుకున్న వారు సెల్ఫోన్ను లాక్కునేందుకు ప్రయత్నించారు. అయితే అమీర్ అక్కడికి పారిపోగా.. కిడ్నాపర్లకు చెందిన 15 మంది డీసీఎం, అశోక్ లేలాండ్ వాహనాలను తెచ్చి టింబర్ డిపోలోని కలపను లోడ్ చేసుకొని పరారయ్యారు. అయితే డిపో వద్ద నుంచి పరారైన ఆరీఫ్ డ్రైవర్ అమీర్ ఎల్బీనగర్ పోలీసులకు ఫిర్యాదు చేశాడు.
ఫిర్యాదు అందుకున్న పోలీసులు కిడ్నాపర్లను పట్టుకునేందుకు మూడు ప్రత్యేక బృందాలను రంగంలోకి దించారు. పోలీసులు తమను గాలిస్తున్నారన్న సమాచారం అందుకున్న కిడ్నాపర్లు వ్యూహాత్మకంగా వ్యవహరించారు. టింబర్ డిపో యజమాని ఆరీఫ్ను మేడ్చల్ వద్ద కారు నుంచి దింపేశారు. కిడ్నాపర్లలోని వ్యక్తి ఆరీఫ్ను తీసుకొని మేడ్చల్ వద్ద బస్సు ఎక్కించి నాగ్పూర్ తీసుకువెళ్లాడు. మహారాష్ట్ర బార్డర్కు వెళ్లిన తర్వాత ఆ వ్యక్తి టింబర్ డిపో యజమానిని బస్సులోనే వదిలేసి మార్గమధ్యలో దిగి వెళ్లిపోయాడు. నాగ్పూర్ చేరుకున్న ఆరీఫ్ను పోలీసులు నగరానికి తీసుకు వచ్చే ప్రయత్నాలు ప్రారంభించారు. పోలీసులు చాకచక్యంగా వ్యవహరించడంతో కిడ్నాపర్ల చెర నుంచి ఆరీఫ్ క్షేమంగా బయటపడ్డాడు. అయితే కిడ్నాపర్లను సైతం పోలీసులు అదుపులోకి తీసుకున్నట్లు విశ్వసనీయ సమాచారం.