అహ్మదాబాద్‌లో 2 టెస్టులు, 5 టీ20లు

భారత్‌లో ఇంగ్లండ్‌ షెడ్యూల్‌ ఖరారు

న్యూఢిల్లీ: భారత్‌లో అంతర్జాతీయ క్రికెట్‌ ఆతిథ్యానికి వేళయింది. కరోనా వైరస్‌ విజృంభణ కారణంగా స్వదేశంలో ఇన్నాళ్లు నిలిచిపోయిన సిరీస్‌లు వచ్చే ఏడాదిలో మొదలుకాబోతున్నాయి. భారత్‌లో ఇంగ్లండ్‌ జట్టు సుదీర్ఘ పర్యటన షెడ్యూల్‌ గురువారం ఖరారైంది. వైరస్‌ వ్యాప్తిని దృష్టిలో పెట్టుకుని కట్టుదిట్టమైన బయో సెక్యూర్‌ వాతావరణంలో జరిగే పర్యటనకు సంబంధించిన వివరాలను బీసీసీఐ కార్యదర్శి జై షా మీడియాకు వివరించారు. పర్యటనలో భాగంగా ఇంగ్లిష్‌ జట్టు నాలుగు టెస్టులు, ఐదు టీ20లు, మూడు వన్డే మ్యాచ్‌లు ఆడనుంది. తొలి రెండు టెస్టులకు చెన్నై వేదిక కానుండగా, మిగిలిన రెండు టెస్టులకు అహ్మదాబాద్‌లో కొత్తగా నిర్మించిన అతిపెద్ద(సామర్థ్యం లక్షా పదివేలు)అంతర్జాతీయ స్టేడియం ‘మోతెరా’ ఆతిథ్యమివ్వనుంది. మార్చి 12 నుంచి జరిగే ఐదు మ్యాచ్‌ల టీ20 సిరీస్‌కు మోతెరా స్టేడియం వేదిక కాబోతున్నది. మరోవైపు మార్చి 23 నుంచి మొదలయ్యే మూడు వన్డేలు పుణెలో జరుగనున్నట్లు షా పేర్కొన్నాడు.