బుధవారం 02 డిసెంబర్ 2020
Siddipet - Oct 29, 2020 , 00:08:38

సూక్ష్మ పరిశీలకులదే కీలక పాత్ర

సూక్ష్మ పరిశీలకులదే కీలక పాత్ర

జిల్లా ఎన్నికల అధికారి, కలెక్టర్‌ భారతి హోలికేరి 

సిద్దిపేట కలెక్టరేట్‌ : పోలింగ్‌ కేంద్రాల వారీగా పోలింగ్‌ సరళిని క్షుణ్ణంగా పరిశీలించాలని, ఇందుకు సూక్ష్మ పరిశీలకులే కీలక పాత్ర పోషించాలని జిల్లా ఎన్నికల అధికారి, కలెక్టర్‌ భారతి హోలికేరి ఆదేశించారు. సిద్దిపేట కలెక్టరేట్‌లో బుధవారం మైక్రో అబ్జర్వర్లకు దుబ్బాక ఉప ఎన్నికల జనరల్‌ అబ్జర్వర్‌ - సాధారణ పరిశీలకులు శ్యామ్లా ఇక్బాల్‌ ఆధ్వర్యంలో శిక్షణ ఇచ్చారు. ఈ సందర్భంగా జిల్లా ఎన్నికల అధికారి మాట్లాడుతూ ఎన్నికలపై సమాచారం ఇవ్వడంతో పాటు ఏర్పాట్లను పరిశీలించి, ఎన్నికల సంఘానికి నివేదిక పంపించాల్సిన బాధ్యత ఉందన్నారు. ఎన్నికలు సజావుగా జరిగాయా.. లేదా అనే విషయాలపై పర్యవేక్షకులు, అబ్జర్వర్లు తెలుపాలన్నారు. స్వేచ్ఛాయుత వాతావరణంలో ఎన్నికలు జరిగేలా భారత ఎన్నికల సంఘం చర్యలు తీసుకున్నదన్నారు. కేంద్రాల్లో అవాంఛనీయ సంఘటనలు జరగకుండా ఎన్నికల సంఘం ప్రత్యేక విభాగాన్ని ఏర్పాటు చేసిందన్నారు. దుబ్బాక ఉప ఎన్నికల కోసం 58 మైక్రో అబ్జర్వర్లను నియమించినట్లు తెలిపారు. సూక్ష్మ పరిశీలకులు ఎన్నికల్లో అబ్జర్వర్లకు కండ్లు, చెవులు వంటి వారని, దుబ్బాక ఉప ఎన్నికల జనరల్‌ అబ్జర్వర్‌ - సాధారణ పరిశీలకులు శ్యామ్లా ఇక్బాల్‌ పేర్కొన్నారు. పోలింగ్‌ రోజు ఓటరు కార్డు పరిశీలిస్తున్నారా.. లేదా పూర్తయ్యేంత వరకు నిఘా ఉంచాలన్నారు. చనిపోయిన ఓటర్ల పేరుతో వస్తున్నారా..? ఓటరు రిజిస్టర్‌లో నమోదు, చెరగని సిరా ఎడమ చేతిపై మార్కింగ్‌ విషయాలపై మైక్రో అబ్జర్వర్లు నిఘా ఉంచాలన్నారు. పోలింగ్‌ ఏజెంట్ల కదలికలు, వారేదన్న ఫిర్యాదు చేశారా? తదుపరి చర్యలపై గమనించాలన్నారు. అసాంఘిక చర్య జరిగితే వెంటనే ఎంవో అబ్జర్వర్లకు తెలుపాలన్నారు. స్టేల్‌ లెవల్‌ మాస్టర్‌ ట్రైనర్స్‌ డా.అయోధ్యరెడ్డి ఎన్నికల ప్రక్రియపై సాగించాల్సిన విధానంపై పవర్‌ పాయింట్‌ ప్రజంటేషన్‌తో ఎంవోలకు అవగాహన కల్పించారు. కార్యక్రమంలో ట్రైనీ కలెక్టర్‌ దీపక్‌ తివారి, మ్యాన్‌ పవర్‌ మేనేజ్‌మెంట్‌ - పోలింగ్‌ పర్సనల్‌ మైక్రో అబ్జర్వర్స్‌ ప్రతినిధులు శ్రవణ్‌, జీవరత్నం, అశోక్‌లాల్‌ తదితరులు పాల్గొన్నారు.