సిద్దిపేట జోన్, ఏప్రిల్ 5 : సిద్దిపేట పట్టణాన్ని నాది అని గర్వంగా చెప్పుకునే విధంగా చేసే బాధ్యత నాది అని, తడి,పొడి హానికర చెత్తను వేర్వేరుగా చేసి ఇచ్చి పట్టణాన్ని పరిశుభ్రంగా నిలుపడంలో మీవంతు సహకారం అందించాలని ఆర్థిక శాఖ మంత్రి తన్నీరు హరీశ్రావు అన్నారు. సిద్దిపేట మున్సిపల్ పరిధిలోని 25,26,27,28 వార్డులకు చెందిన మహిళా సంఘాల కోసం రూ. 15 లక్షలతో నిర్మించిన మహిళా మండలి భవనాన్ని, 11వ వార్డులో రూ.15 లక్షలతో నిర్మించిన ఎస్సీ మాల కమ్యూనిటీ హాల్ను మున్సిపల్ చైర్మన్ రాజనర్సుతో కలిసి సోమవారం ప్రారంభించారు. ఈ సందర్భంగా మంత్రి హరీశ్రావు మాట్లాడుతూ.. ఈనెల 10న కుక్కల కుటుంబ నియంత్రణకు ఎనిమల్ బర్త్ కంట్రోల్ సెంటర్ను ప్రారంభిస్తామన్నారు.
పట్టణంలో ప్రజల నుంచి వచ్చిన విజ్ఞప్తుల మేరకు, పట్టణంలో 550 కోతులను పట్టుకొని నిర్మల్ జిల్లా చించోలి అడవుల్లో వదిలిపెట్టామన్నారు. మరిన్ని కోతులను కూడా త్వరలో పట్టుకొని అడవిలో వదులుతామని తెలిపారు. పేదలకు పైసా ఖర్చు లేకుండా ప్రైవేటు దవాఖానలకు దీటుగా ప్రభుత్వ దవాఖానలో తెలంగాణ డయాగ్నోస్టిక్ సెంటర్, సిటీ స్కాన్ సెంటర్లను అందుబాటులోకి తెచ్చామన్నారు. సిద్దిపేట పట్టణం దినదినాభివృద్ధి చెందుతున్నందున రూరల్ పోలీసు స్టేషన్ నుంచి కోమటి చెరువు మీదుగా ప్రభుత్వ దవాఖాన వరకు రూ.4 కోట్లతో బట్టర్ఫ్లై లైట్లను మంగళవారం ప్రారంభించనున్నట్లు తెలిపారు. మంత్రి వెంట సుడా చైర్మన్ మారెడ్డి రవీందర్రెడ్డి, వైస్ చైర్మన్ అక్తర్పటేల్, స్థానిక కౌన్సిలర్లు తేల్జీరు శ్రీనివాస్యాదవ్, గ్యాదరి రవీందర్తో పాటు నాయకులు రామస్వామి, దర్గయ్య, రాజమల్లయ్య తదితరులు పాల్గొన్నారు. అంతకు ముందు వేసవి కాలం సందర్భంగా ఆకాశం హోటల్ దగ్గర చలివేంద్రం, సల్ల కేంద్రాన్ని మంత్రి ప్రారంభించారు.
బతుకమ్మ చెరువుకు గోదావరి జలాలు
రోజురోజుకూ పెరుగుతున్న ఎండలతో ఇమాంబాద్లోని వరి పంటలు ఎండిపోతున్నాయని గ్రామ రైతులు మంత్రి హరీశ్రావుకు మొర పెట్టుకున్నారు. స్పందించిన మంత్రి హరీశ్రావు ఎత్తిపోతల ద్వారా నీటిని కాలువ ద్వారా విడుదల చేస్తామని హామీ ఇచ్చారు. ఇచ్చిన మాట ప్రకారం సోమవారం కాళేశ్వరం ప్రాజెక్టులో భాగంగా రంగనాయక సాగర్ ప్రాజెక్టు నుంచి మల్లన్నసాగర్కు వెళ్లే కాలువ ద్వారా నీటిని బతుకమ్మ చెరువులోకి మెదక్ ఎంపీ కొత్త ప్రభాకర్రెడ్డితో కలిసి మంత్రి విడుదల చేశారు. ఈ సందర్భంగా గోదావరి జలాలకు ప్రత్యేక పూజలు నిర్వహించారు. కార్యక్రమంలో సుడా చైర్మన్ రవీందర్రెడ్డి, స్థానిక ప్రజాప్రతినిధులు పాల్గొన్నారు.
ఇవీ కూడా చదవండి…