ప్రపంచంలో ఎక్కడా కనిపించని అందమైన సంస్కృతి మన దేశంలో ఉంది. అదే మహిళల కట్టు, బొట్టు. తరతరాలుగా వస్తున్న ఈ సంప్రదాయం గురించి తాజాగా సోషల్ మీడియాలో ట్రెండింగ్ అవుతున్నది. అందుకు కారణం 22 ఏండ్ల ఇండో అమెరికన్.. శ్రుతి జయదేవన్. ఆమెకు చిన్నప్పట్నించీ మన దేశ సంస్కృతి, ఆచారాలంటే గౌరవం. వాటి గొప్పతనాన్ని సోషల్ మీడియా ద్వారా ప్రపంచానికి చాటిచెప్పే ప్రయత్నం చేస్తున్నది.
శ్రుతికి పదకొండేండ్ల వయసులోనే కుటుంబమంతా అమెరికా వెళ్లింది. తన సోదరితో పాటు ఆమె బొట్టు పెట్టుకుని, గాజులు వేసుకుని, జడ అల్లుకుని స్కూల్కు వెళ్తుండేది. అప్పటికి ఆ బడిలో భారతీయులు వీళ్లిద్దరే. దాంతో ఆ వేషధారణను తోటి విద్యార్థులు హేళన చేసేవారట. రకరకాల పేర్లు పెట్టి పిలుస్తూ ఆట పట్టించేవాళ్లట. ఈ విషయాలను ఆమె ఇటీవలే ఒక ఇంటర్వ్యూలో చెప్పుకొచ్చింది. ‘నేను చిన్నప్పట్నించీ ఎదుర్కొంటున్న అవమానాలకు ఇప్పటికైనా ఫుల్స్టాప్ పెట్టాలనుకుంటున్నాను. అందుకే సోషల్ మీడియాలో ట్రెడిషనల్గా ముస్తాబై దిగిన ఫొటోలను పోస్ట్ చేస్తున్నాను. కొందరు నుదుటి మీద ఆ చుక్క ఏంటి? ముక్కుకు ఏం పెట్టుకున్నావ్? అంటూ ప్రశ్నలతో వెక్కిరిస్తూనే ఉంటారు. కానీ, మన ఇండియన్స్ మాత్రం నన్ను బాగా ఎంకరేజ్ చేస్తున్నారు. ఇటీవల నేను చేసిన ట్వీట్కు 74వేల లైకులు, 21వేల రీట్వీట్స్ వచ్చాయి. ఏదేమైనా, మన దేశ సంస్కృతిని ప్రతి ఒక్కరూ గౌరవించేలా చేయడంలో నాకు సంతృప్తి ఉంది’ అని చెప్పు కొచ్చింది శ్రుతి.