‘రామ్చరణ్ చిన్ననాటి మిత్రుడిగా శర్వానంద్ మా ఇంట్లోనే పెరిగాడు. శర్వానంద్ నాకు మరో రామ్చరణ్ అనుకుంటా. ప్రతి సినిమాకు పరిణితి సాధిస్తూ శర్వానంద్ దినదినప్రవర్ధమానమవుతున్నాడు. ‘శ్రీకారం’ సినిమా కోసం మంచి ఇతివృత్తాన్ని ఎంచుకున్నారు. వాణిజ్య పంథాలో యువతరానికి గొప్ప సందేశాన్నందించారు’ అన్నారు అగ్ర నటుడు చిరంజీవి. సోమవారం ఖమ్మం నగరంలో జరిగిన ‘శ్రీకారం’ చిత్ర ప్రీరిలీజ్ వేడుకకు చిరంజీవి, రాష్ట్ర రవాణాశాఖ మంత్రి పువ్వాడ అజయ్కుమార్ ముఖ్య అతిథులుగా హాజరయ్యారు. శర్వానంద్ కథానాయకుడిగా నటించిన ఈ చిత్రానికి కిషోర్ బి దర్శకత్వం వహించాడు. రామ్ ఆచంట, గోపి ఆచంట నిర్మాతలు. ఈ నెల 11న ప్రేక్షకులముందుకురానుంది. ఈ సందర్భంగా చిరంజీవి మాట్లాడుతూ ‘తెలుగు రాష్ర్టాల్లో చాలా మంది ఐటీ ఇండస్ట్రీలో పనిచేసే యువకులు సింగపూర్, దుబాయ్లలో ఉద్యోగాల్ని సైతం వదిలిపెట్టి నేలతల్లి మీద మమకారంతో సొంత ఊళ్లకు చేరుకొని అధునాతన పద్దతుల్లో వ్యవసాయం చేస్తూ స్ఫూర్తిగా నిలుస్తున్నారు. వ్యవసాయానికి ఆధునిక పద్దతుల్ని జోడిస్తే మరో స్థాయికి తీసుకెళ్లొచ్చు. వ్యవసాయాన్ని కొత్త పుంతలు తొక్కిస్తూ విప్లవాత్మకమైన మార్పులకు శ్రీకారం చుట్టొచ్చు. నేడు రైతు కొడుకు రైతు అవ్వాలనుకోవడం లేదు. అది మన ఖర్మ. రైతు కొడుకు రైతు అయ్యే రోజు రావాలి. ఆ రోజు వస్తుందనే ఆశాభావం నాకుంది. చదువుకున్న యువకులు ఇక్కడ నేలతల్లిని నమ్ముకొని కొత్త పద్దతుల్లో సాగు చేస్తే అందరికి స్ఫూర్తిగా నిలుస్తారు. అప్పుడు రైతు ఖచ్చితంగా రాజు అని నిరూపించుకోగలుగుతాడు. యువత వ్యవసాయం వైపు దృష్టి పెట్టాలనే గొప్ప స్ఫూర్తితో ‘శ్రీకారం’ చిత్రాన్ని తెరకెక్కించారు’ అన్నారు. రాష్ట్ర రవాణా శాఖ మంత్రి పువ్వాడ అజయ్ కుమార్ మాట్లాడుతూ ‘నేను చిన్నప్పటి నుంచి చిరంజీవిగారికి పెద్ద అభిమానిని. తెలంగాణలో రైతే రాజు అనే రీతిలో పరిపాలన సాగుతోంది. రైతుకు ఇరవైనాలుగుగంటల కరెంట్, రైతు బంధు, రైతు భీమా వంటి పథకాలతో రైతుల పక్షాన నిలుస్తున్నాం. కాళేశ్వరం వంటి సాగునీటి ప్రాజెక్ట్లతో 34లక్షల తెలంగాణ మాగాణాన్ని కోటి ఎకరాలకు తీసుకొచ్చిన ఘనత ముఖ్యమంత్రి కేసీఆర్గారిది. వ్యవసాయం గొప్పతనాన్ని తెలియజేప్పే ఈ చిత్రం తప్పకుండా విజయవంతమవుతుందని ఆశిస్తున్నా’ అన్నారు. శర్వానంద్ మాట్లాడుతూ ‘శర్వా నీ సంకల్పం గొప్పదైతే దేవుడు నీ తలరాతను తిరగరాస్తాడు’ అని చిరంజీవి గారు చెప్పిన మాటల్ని ఎప్పుడూ గుర్తుపెట్టాకుంటా’ అన్నారు. దర్శకుడు కిషోర్ మాట్లాడుతూ ‘వ్యవసాయ కుటుంబాల్లోని మన నాన్న కష్టం, అమ్మ మనపై చూపించే ఇష్టం, తోబుట్టువులు చూపించే ప్రేమ ఎంత సహజంగా ఉంటుందో ఈ సినిమా కూడా అంతే సహజంగా ఉంటుంది’ అన్నారు. గోపీ ఆచంట మాట్లాడుతూ ‘ఈ సినిమాకు మెగాస్టార్ అందించే మద్దతు మాటల్లో చెప్పలేనిది. వ్యవసాయం చేద్దామనుకునే యువకుడికి ఎదురైన సంఘటనలు..వాటిని ఎదుర్కొని ఎలా విజయవంతమయ్యాడన్నదే ఈ సినిమా కథ’ అన్నారు.