మాజీ రంజీ ప్లేయర్ నాగరాజు అరెస్ట్
హైదరాబాద్ సిటీబ్యూరో: రాష్ట్ర ఐటీ, మున్సిపల్ శాఖ మంత్రి కేటీఆర్ వ్యక్తిగత కార్యదర్శి(పీఏ) అని చెప్పుకుంటూ మోసాలకు పాల్పడుతున్న మాజీ రంజీ క్రికెటర్ నాగరాజును పోలీసులు శనివారం అరెస్ట్ చేశారు. 2014-16 మధ్య కాలంలో ఆంధ్ర రంజీ జట్టుకు ఆడిన నాగరాజు ఈజీమనీకి అలవాటు అయ్యా డు. ప్రముఖుల పేర్లు చెబుతూ వ్యాపారులను మోసం చేయడంలో ఆరితేరాడు. ఈ క్రమంలో 2018 నుంచి ఇప్పటి వరకు నాగరాజుపై తెలంగాణ, ఆంధ్రప్రదేశ్లో 19 చీటింగ్ కేసులు నమోదయ్యాయి. గతంలో 10 కేసుల్లో అరెస్టయి బెయిల్పై బయటికొచ్చిన ఈ మాజీ క్రికెటర్ తన పద్ధతిని మాత్రం మార్చుకోలేదు. రెండు నెలల వ్యవధిలోనే ఇతనిపై 9 చీటింగ్ కేసులు నమోదయ్యాయి. నిందితుడిని పట్టుకునేందుకు రంగంలోకి దిగిన నార్త్జోన్ టాస్క్ఫోర్స్ ఇన్స్పెక్టర్ నాగేశ్వర్రావు బృందం నాగరాజును అరెస్ట్ చేసి 10 లక్షల నగదను స్వాధీనం చేసుకుంది. నిందితునిపై పీడీ యాక్టు ప్రయోగిస్తామని హైదరాబాద్ సీపీ అంజనీకుమార్ పేర్కొన్నారు. ప్రముఖుల పేర్లు చెప్పి ఎవరైనా డబ్బులు డిమాండ్ చేస్తే తమకు ఫిర్యాదు చేయాలని సీపీ సూచించారు. ఈ సమావేశంలో టాస్క్ఫోర్స్ ఎస్ఓడీ రాధాకిషన్రావు పాల్గొన్నారు.