గురువారం 01 అక్టోబర్ 2020
Siddipet - Jan 24, 2020 , 23:30:44

నేడే ఓటరు తీర్పు

నేడే ఓటరు తీర్పు
  • - వీడనున్న ఉత్కంఠ
  • - మున్సిపల్‌ ఓట్ల లెక్కింపునకు అన్ని ఏర్పాట్లు
  • - ఉదయం 8 గంటల నుంచి షురూ
  • - కౌంటింగ్‌ కేంద్రాల వద్ద భారీ బందోబస్తు
  • - సాయంత్రంలోగా ఫలితాలు
  • - 27న చైర్మన్‌, వైస్‌ చైర్మన్ల ఎన్నిక
  • - ఓటరు తీర్పుపై అభ్యర్థుల మల్లగుల్లాలు

గజ్వేల్‌, నమస్తే తెలంగాణ: పురపోరులో ప్రజా తీర్పుపై ఉత్కంఠ నాయకుల గుండెల్లో రైలు పరిగెత్తిస్తున్నది. గజ్వేల్‌-ప్రజ్ఞాపూర్‌ మున్సిపల్‌కు చెందిన 78 మంది అభ్యర్థుల భవితవ్వం నేడు  తేలనున్నది. 20 వార్డులకు 78 మంది పోటీలో ఉండగా 20 మందికి పట్టంకట్టనున్నారు. సీఎం కేసీఆర్‌ సొంత నియోజకవర్గ కేంద్రమైన గజ్వేల్‌పై అందరి దృష్టి ఉండగా అభ్యర్థులు కూడా ప్రతిష్ఠాత్మకంగా తీసుకున్నారు. కేసీఆర్‌ పాలనలో పదవులు పొందాలన్న లక్ష్యంతో ఎన్నికల్లో శక్తికి మించి ప్రయత్నాలు చేశారు. కొన్ని వార్డులు టీఆర్‌ఎస్‌కు ఏకపక్షంగా మారగా మరికొన్ని వార్డుల్లో టీఆర్‌ఎస్‌కు ఆ పార్టీ రెబల్స్‌తో పోటీ ఏర్పడింది. రెబల్స్‌ పోటీలో ఉన్న వార్డుల్లో అధిక శాతం పోల్‌ కావడంతో అభ్యర్థుల్లో ఉత్కంఠ ఏర్పడింది.       

పోలింగ్‌ శాతంపై లెక్కలు...

పోలింగ్‌ శాతం అధికమైన వార్డుల అభ్యర్థుల్లో ఉత్కంఠ నెలకొంది. పెరిగిన పోలింగ్‌ ఎవరికి లాభిస్తుందని చర్చకు దారితీసింది. టీఆర్‌ఎస్‌ పార్టీకి చెందిన అభ్యర్థులతో పాటు అదే పార్టీ రెబల్స్‌ పోటీలో ఉన్న వార్డుల్లో పోలింగ్‌ శాతం బాగా పెరిగింది. దీంతో పెరిగిన ఓటింగ్‌ శాతం ఎవరికి లబ్దిచేకూరుస్తుందని చర్చకు దారితీస్తున్నది. 2,3,4,5,6,8,9,10,11,14, 15,16,17 వార్డుల్లో 80 శాతానికి మించి పోలింగ్‌ జరగగా ఈ వార్డుల్లో టీఆర్‌ఎస్‌కు స్వతంత్ర అభ్యర్థుల నుంచి పోటీ ఏర్పడింది. బీజేపీ, కాంగ్రెస్‌ పార్టీలు కొన్ని వార్డుల్లోనే ప్రభావం చూపనున్నాయని స్థానికులు భావిస్తున్నారు.

కొత్త భవనంలో సీట్లు ఎవరికి...

గజ్వేల్‌ మున్సిపల్‌కు అత్యాధునిక సౌకర్యాలతో నూతన భవనం నిర్మాణం పూర్తికావస్తుండగా త్వరలో ఎంపిక కాబొత్తున్న నూతన కౌన్సిలర్లు అడుగు పెట్టనున్నారు. శనివారం 20 మంది కౌన్సిలర్ల ఎంపిక కానుండగా 27న ఇందులో నుండే ఒకరు చైర్మన్‌ పీఠాన్ని అధిరోహించనున్నారు. ముఖ్యమంత్రి కేసీఆర్‌ సూచనల మేరకు చైర్మన్‌ ఎన్నిక జరగనున్నది. పాలకవర్గం ప్రమాణ స్వీకారంతో పాటు చైర్మన్‌ ఎన్నికకు సంబంధించిన అంశాలను పార్టీ అధిష్ఠానం సూచనల మేరకు జరగనున్నట్లు తెలుస్తున్నది.

కౌంటింగ్‌కు ఏర్పాట్లు పూర్తి...

మున్సిపల్‌ ఎన్నికల ఫలితాల కోసం స్థానిక పాలిటెక్నిక్‌ కళాశాలలో ఏర్పాట్లు పూర్తి చేసినట్లు జిల్లా ఎన్నికల సహాయ అధికారి కృష్ణా రెడ్డి తెలిపారు. ఏజెంట్లు అభ్యర్థులు ఉదయం 7 గంటలలోపే కౌంటింగ్‌ కేంద్రానికి రావాలని 8 గంటలకు ఓట్ల లెక్కింపు ప్రారంభం అవుతుందన్నారు. లెక్కింపుకు ఏర్పాట్లు పూర్తి చేశామని, ప్రాగంణంలో భారీ బందోబస్తు చర్యలు చేపట్టడం జరిగిందన్నారు. ప్రశాంతంగా కౌంటింగ్‌కు సహకరించాలని సూచించారు.

మోడల్‌స్కూల్‌లో కౌంటింగ్‌...

 హుస్నాబాద్‌, నమస్తే తెలంగాణ: మున్సిపల్‌ ఎన్నికల ప్రక్రియలో చివరి ఘట్టమైన కౌంటింగ్‌ శనివారం జరుగనున్నది. ఇందుకు సంబంధించిన అన్ని ఏర్పాట్లను అధికారులు సిద్ధం చేశారు. హుస్నాబాద్‌ మోడల్‌స్కూల్‌లో ఏర్పాటు చేసిన కౌంటింగ్‌ కేంద్రంలో కౌంటింగ్‌కు సర్వం సిద్ధమైంది. ఒకే హాలులో 9టేబుళ్లు వేసి 18వార్డులకు సంబంధించిన ఓట్లను రెండురౌండ్ల ద్వారా పూర్తి చేయాలని అధికారులు భావిస్తున్నారు. మొత్తం 20వార్డుల్లో 2వార్డులు ఏకగ్రీవం కాగా మిగిలిన 18వార్డులకు ఎన్నికలు జరిగాయి. 9టేబుళ్లలో మొదటి రౌండ్‌లో 9వార్డులు, రెండోరౌండ్‌లో 9వార్డుల ఓట్లను లెక్కించనున్నారు. ఈ నెల 22వ తేదీన జరిగిన పోలింగ్‌ అనంతరం బ్యాలెట్‌ బాక్సులను మోడల్‌స్కూల్‌లోని స్ట్రాంగ్‌రూమ్‌లో భద్రపరిచారు.  ఎన్నికల్లో పోటీ చేసిన అభ్యర్థితో ఒక కౌంటింగ్‌ ఏజెంటుకు మాత్ర మే కౌంటింగ్‌ హాల్లో కి ప్రవేశం ఉంటుందని కమిషనర్‌ రాజమల్లయ్య తెలిపారు. ఒక్కో టేబుల్‌కు ముగ్గురు కౌంటింగ్‌ సిబ్బంది, ఆర్‌వో, ఏఆర్‌వోలు ఉంటారన్నారు.  కాగా కౌంటింగ్‌ హాల్‌ను ఆర్డీవో జయచంద్రారెడ్డి సందర్శించారు. అనంతరం మండల పరిషత్‌ సమావేశ మందిరంలో జరుగుతున్న కౌంటింగ్‌ అధికారులు, సిబ్బంది శిక్షణ కార్యక్రమానికి హాజరై పలు సూచనలు చేశారు. అలాగే శనివారం ఉదయం నుంచి కౌంటింగ్‌ ప్రారంభం కానున్నందున ఏసీపీ మహేందర్‌ ఆధ్వర్యంలో పోలీసులు భారీ బందోబస్తు ఏర్పాటు చేశారు. ఏసీపీతో పాటు సీఐ, 5గురు ఎస్‌ఐలు, 50మంది పోలీసు సిబ్బందితో పాటు బాంబ్‌స్కాడ్‌ బృందం కూడా బందోబస్తు విధులు నిర్వహించనున్నారు. .

పారదర్శకంగా లెక్కింపు..

చేర్యాల, నమస్తే తెలంగాణ: నేడు బల్దియా ఎన్నికల ఫలితాలు వెల్లడికానుండడంతో సర్వత్రా ఆసక్తి నెలకొన్నది. ఎన్నికల బరిలో టీఆర్‌ఎస్‌12, బీజేపీ 12, కాంగ్రెస్‌ 12, సీపీఐ 2, సీపీఎం 7, 22 మంది ఇండిపెండెంట్లు పోటీలో నిలిచారు. పట్టణంలోని సాంఘీక సంక్షేమ గురుకుల పాఠశాలలో శనివారం మున్సిపల్‌ ఎన్నికల ఓట్లను లెక్కించేందుకు అసిస్టెంట్‌ ఎన్నికల అధికారి పాల్వాయి శ్రవణ్‌కుమార్‌ ఆధ్వర్యంలో సిబ్బంది ఏర్పాట్లు పూర్తి చేశారు. కౌంటింగ్‌ కేంద్రం వద్ద అసిస్టెంట్‌ ఎన్నికల అధికారి శ్రవణ్‌కుమార్‌ మాట్లాడుతూ నలుగురు రిటర్నింగ్‌ అధికారులతో పాటు నలుగురు కౌంటింగ్‌ సూపర్‌వైజర్స్‌, మరో నలుగురు కౌంటింగ్‌ అసిస్టెంట్స్‌ను నియమించినట్లు తెలిపారు. అలాగే వెబ్‌కాస్టింగ్‌ నిర్వహణకు 8 మందిని నియమించినట్లు తెలిపారు. ఎన్నికల ఫలితాల అనంతరం కౌన్సిలర్‌గా విజయం సాధించినట్లు ధ్రువీకరణపత్రం అందజేస్తామన్నారు. 12 వార్డులలో కౌన్సిలర్‌ అభ్యర్థుల ఓట్లు లెక్కించేందుకు నాలుగు టెబుల్స్‌ ఏర్పాటు చేశామని, మూడురౌండ్లలో ఓట్ల లెక్కింపు పూర్తి అవుతుందన్నారు. మొదటి రౌండ్‌లో 1,4,7,10, రెండోరౌండ్‌లో 2,5,8,11, మూడవ రౌండ్‌లో 3,6,9,12వ వార్డులకు చెందిన ఓట్లను లెక్కిస్తామని, మొదటి ఫలితం 10గంటలకు వెల్లడవుతుందన్నారు. 8గంటలకు పోస్టల్‌ బ్యాలెట్‌ లెక్కింపు ప్రక్రియ ప్రారంభిస్తామన్నారు. కౌంటింగ్‌ హాలుకు వచ్చే ప్రభుత్వ గుర్తింపు పొందిన విలేకరులకు మినహాయించి పోటీ చేస్తున్న అభ్యర్థులు, వారి ఏజెంట్లు సెల్‌ఫోన్లు తీసుకురావద్దని వాటిని కౌంటింగ్‌ సెంటర్‌ వద్ద నిషేధించినట్లు తెలిపారు. అంతకుముందు మున్సిపాలిటీ కార్యాలయంలో పోటీ చేస్తున్న అభ్యర్థులతో పాటు ఏజెంట్లతో సమావేశం నిర్వహించి ఓట్ల లెక్కింపు, ఫలితాల వెల్లడి తదితర విధివిధానాలను తెలియజేశారు. కార్యక్రమంలో మాస్టర్‌ ట్రైనర్‌ డి.లక్ష్మారెడ్డి, మున్సిపల్‌ సిబ్బంది సాయిశంకర్‌, గంగాధర్‌ తదితరులున్నారు.

ఏర్పాట్లు పూర్తి..

దుబ్బాక టౌన్‌:  ఈ నెల 25 న నిర్వహించే మున్సిపల్‌ ఎన్నికల కౌంటింగ్‌ కోసం ఏర్పాట్లు పూర్తి చేసినట్లు దుబ్బాక మున్సిపల్‌ కమిషనర్‌ గోల్కొండ నర్సయ్య తెలిపారు. మున్సిపల్‌ పరిధిలోని లచ్చపేట మోడల్‌ స్కూల్‌లో జరిగే కౌంటింగ్‌ ఏర్పాట్లను శుక్రవారం కమిషనర్‌ నర్సయ్య, పోలీస్‌ ఇన్‌ఛార్జి  ఏసీపీ రామేశ్వర్‌ పరిశీలించారు. ఈ సందర్భంగా కమిషనర్‌ మాట్లాడుతూ దుబ్బాక మున్సిపల్‌ ఎన్నికల ఫలితాలు రెండు రౌండ్లలో వెలువడుతాయన్నారు. కౌంటింగ్‌ కోసం రెండుహాళ్లలో 14 టేబుల్స్‌ను ఏర్పాటు చేశామన్నారు. ఉదయం 8 గంటల నుంచి కౌంటింగ్‌ ప్రారంభమవుతుందని కమిషనర్‌ వెల్లడించారు. మొదటి రౌండ్‌లో మొత్తం 14 వార్డులు (1 నుంచి 11, 13 నుంచి 15 వార్డుల) లెక్కింపు జరుగుతుందని, రెండోరౌండ్‌లో 5 వార్డుల (16, 17, 18, 19, 20) లెక్కింపు జరుగుతుందన్నారు. మొత్తం వందమంది సిబ్బంది ఓట్ల లెక్కింపు విధుల్లో పాల్గొంటారని కమిషనర్‌ నర్సయ్య తెలిపారు.

27న మున్సిపల్‌ చైర్మన్‌ ఎన్నిక...

ఈ నెల 27న దుబ్బాక మున్సిపల్‌ చైర్మన్‌తో పాటు నూతనంగా ఎన్నికైన పాలకమండలి ప్రమాణ స్వీకారం ఉంటుందని కమిషనర్‌ నర్సయ్య తెలిపారు. 25న కౌంటింగ్‌ పూర్తికాగానే గెలుపొందిన అభ్యర్థులకు ఎన్నికైన ధ్రువ పత్రాలను అందజేస్తామని, 27న మున్సిపల్‌ చైర్మన్‌తో పాటు పాలకమండలి సభ్యులుగా ఎన్నికైన కౌన్సిలర్ల ప్రమాణ స్వీకారం ఉంటుందన్నారు. ఇతరత్రా కారణాల వల్ల 27న చైర్మన్‌ ఎన్నిక జరుగకపోతే 28న నిర్వహిస్తామన్నారు.

కౌంటింగ్‌ ఇలా చేస్తారు...

ముందుగా వార్డుకు సంబంధించిన బాక్సులను ఒక టెబుల్‌ పైకి చేరుస్తారు. ఒక వార్డులో ఎన్ని పోలింగ్‌ బూత్‌లు ఉంటే అన్ని బాక్సులు ఆ టేబుల్‌ పైకి తీసుకువస్తారు. పోలింగ్‌బూత్‌ నెంబర్‌, వార్డు నెంబర్లను సరిచూసుకొని బాక్సును తెరిచి ముందుగా ఆ బాక్సులోని బ్యాలెట్ల లెక్కింపు ఓట్ల లెక్కింపు సరిచూస్తారు. అంటే ఆ బూత్‌లో పోలైన మొత్తం ఓట్లు ప్రిసైడింగ్‌ అధికారి రాసిన సంఖ్య అందులో ఉన్న ఓట్ల సంఖ్య సమానంగా ఉండాల్సి ఉంటుంది. అన్ని బాక్సుల్లోని బ్యాలెట్లను 50 చొప్పున లెక్కించి ఒక్కొక్క కట్ట కడతారు. అలా ఆ వార్డులో ఉన్న బూత్‌ల అన్ని బాక్సుల బ్యాలెట్ల సంఖ్య, ప్రెసిడింగ్‌ అధికారులు రాసిన సంఖ్య సరిచూసి సరిపోతే వార్డుకు సంబంధించిన అన్ని బూత్‌ల కట్టలను ఒకే ట్రేలో కలిపి కుప్పగా చేస్తారు. ఇది వరకే 50 బ్యాలెట్లతో కట్టిన కట్టలను విప్పుతూ గుర్తుల వారిగా వేరువేరు ట్రేల్లో వేసి ఎవరికి ఎన్ని ఓట్లు వచ్చాయో లెక్కించి ప్రకటిస్తారు.



logo