శనివారం 26 సెప్టెంబర్ 2020
Siddipet - Jan 13, 2020 , 01:27:06

మున్సిపల్‌ ఎన్నికల కో-ఆర్డినేటర్‌గా శేరి సుభాశ్‌రెడ్డి

మున్సిపల్‌ ఎన్నికల కో-ఆర్డినేటర్‌గా శేరి సుభాశ్‌రెడ్డి


 (సంగారెడ్డి, నమస్తే తెలంగాణ ప్రధాన ప్రతినిధి): మున్సిపల్‌ ఎన్నికల్లో గెలుపే లక్ష్యంగా టీఆర్‌ఎస్‌ అధిష్ఠానం కో-ఆర్డినేటర్లను నియమించింది. ఉమ్మడి జిల్లా ప్రాతిపదికన ఒక్కో జిల్లాకు ఒకరికి సమన్వయ బాధ్యతలు అప్పగించింది. పార్టీ రాష్ట్ర వర్కింగ్‌ ప్రెసిడెంట్‌ కల్వకుంట్ల తారక రామారావు ఆదివారం కో-ఆర్డినేటర్ల పేర్లను ప్రకటించారు. ఉమ్మడి మెదక్‌ జిల్లాకు ఎమ్మెల్సీ, సీఏం కేసీఆర్‌ రాజకీయ కార్యదర్శి శేరి సుభాశ్‌రెడ్డికి ఉమ్మడి మెదక్‌ జిల్లా సమన్వయ బాధ్యతలు అప్పగించారు. సంగారెడ్డి జిల్లాలో సంగారెడ్డి, సదాశివపేట, నారాయణఖేడ్‌, అందోల్‌-జోగిపేట తెల్లాపూర్‌, అమీన్‌పూర్‌, బొల్లారం, మెదక్‌ జిల్లాలో మెదక్‌, నర్సాపూర్‌, తూప్రాన్‌, రామాయంపేట మున్సిపాలిటీలు ఉన్నాయి. అలాగే సిద్దిపేట జిల్లాలో గజ్వేల్‌, దుబ్బాక, హుస్నాబాద్‌, చేర్యాల మున్సిపాలిటీలకు ఎన్నికలు జరుగుతున్నాయి. ఇప్పటికే నామినేషన్ల ప్రక్రియ పూర్తవగా, ఉపసంహరణల గడువు కొనసాగుతున్నది. అన్ని మున్సిపాలిటీల్లో గులాబీ జెండా ఎగురవేయడమే లక్ష్యంగా పార్టీ నేతలంతా వ్యూహాత్మకంగా ముందుకు సాగుతున్నారు.

మంత్రి హరీశ్‌రావు, ఎంపీలు బీబీ పాటిల్‌, కొత్త ప్రభాకర్‌రెడ్డి, ఎమ్మెల్యేలు క్రాంతి కిరణ్‌, మహిపాల్‌రెడ్డి, మానిక్‌రావు, భూపాల్‌రెడ్డి, మధన్‌రెడ్డ్డి, పద్మా దేవేందర్‌రెడ్డి, రామలింగారెడ్డి, మాజీ ఎమ్మెల్యే చింతా ప్రభాకర్‌, ఎమ్మెల్సీలు ఫరీదొద్దీన్‌, భూపాల్‌రెడ్డి, ఇన్‌చార్జిలు బేవరేజెస్‌ కార్పొరేషన్‌ చైర్మన్‌ దేవి ప్రసాద్‌, ఎఫ్‌డీసీ చైర్మన్‌ ప్రతాప్‌రెడ్డి, మాజీ ఎమ్మెల్సీ సత్యనారాయణ ఇతర నేతలంతా ఆయా మున్సిపాలిటీల్లో నేతలను సమన్వయ పరుస్తున్నారు, ఇప్పటికే సీఎం కేసీఆర్‌, పార్టీ వర్కింగ్‌ ప్రెసిడెంట్‌ కేటీఆర్‌ దిశానిర్దేశం చేశారు. కాగా, మంత్రి హరీశ్‌రావు, పటాన్‌చెరు, జహీరాబాద్‌ ముఖ్య నేతలతో కూడా సమీక్షించారు. ప్రస్తుతం రెబెల్స్‌ను బుజ్జగిస్తుండగా, మిగతా నేతలు ప్రభుత్వ పథకాలను ప్రతి గడపకూ తీసుకెళ్లే పనిలో ఉన్నారు. ఇదిలా ఉండగా, మొత్తం ఉమ్మడి జిల్లాకు మున్సిపల్‌ ఎన్నికల సమన్వయ కర్తగా శేరి సుభాశ్‌రెడ్డిని నియమించారు. ఆయన రోజు వారీగా ఎన్నికల ప్రక్రియ కూడా సమీక్షించనున్నారు. మొత్తం మీద ఉమ్మడి జిల్లాలో 15 మున్సిపాలిటీలను కైవసం చేసుకునే లక్ష్యంతో పక్కా ప్రణాళికతో అధికార పార్టీ ముందుకు సాగుతున్నది.


logo