శుక్రవారం 05 జూన్ 2020
Sangareddy - Mar 01, 2020 , 23:26:15

మల్లన్న చెంత భక్తుల పులకింత

మల్లన్న చెంత భక్తుల పులకింత


చేర్యాల, నమస్తే తెలంగాణ: ప్రముఖ పుణ్యక్షేత్రం కొమురవెల్లి మల్లికార్జునస్వామి క్షేత్రం ఆదివారం భక్తులతో నిండిపోయింది. స్వామి బ్రహ్మోత్సవాల సందర్భంగా నిర్వహించే ఉత్సవాల్లో 7వ వారం సందర్భంగా పలు జిల్లాల నుంచి భారీగా భక్తులు మల్లన్న క్షేత్రానికి తరలివచ్చి స్వామివారిని దర్శించుకున్నారు. 7వ వారం సందర్భంగా సుమారు 60వేల మంది భక్తులు మల్లన్నను దర్శించుకున్నట్లు ఆలయ వర్గాలు తెలిపాయి. శనివారం సాయంత్రం కొమురవెల్లికి చేరుకున్న భక్తులు  గదులను అద్దెకు తీసుకుని రాత్రికి బస చేశారు. అనంతరం ఆదివారం వేకువ జామునే నిద్రలేచి కోనేటిలో పుణ్య స్నానాలు ఆచరించారు. స్వామివారిని దర్శించుకోవడంతో పాటు అభిషేకాలు, పట్నాలు, అర్చన, ప్రత్యేక పూజలు, ఒడి బియ్యం, కేశ ఖండన, గంగరేగు చెట్టు వద్ద ముడుపులు తదితర మొక్కులు తీర్చుకోవడంతోపాటు కొరికలు తీర్చాలని వేడుకున్నారు. మహిళల భక్తిశ్రద్ధలతో బోనాలు తయారు చేసి కొండపై ఎల్లమ్మ తల్లికి బోనాలు సమర్పించారు. కొందరు రాతిగీరల వద్ద ప్రదక్షిణలు, కోడెల స్తంభం వద్ద కోడెలు కట్టి పూజలు, గంగరేగు చెట్టు వద్ద ముడుపులు కట్టి కోర్కెలు తీర్చాలని స్వామిని వేడుకున్నారు. స్వామి దర్శనానికి వస్తున్న భక్తులకు ఎలాంటి సమస్యలు తలెత్తకుండా చర్యలు తీసుకుంటున్నట్లు ఆలయ పునరుద్ధరణ కమిటీ చైర్మన్‌ మేక సంతోశ్‌, డిప్యూటీ కమిషనర్‌ వెంకటేశ్‌ తెలిపారు. 


logo