సోషల్ మీడియాలో వినిపిస్తున్న వార్తల ప్రకారం అందరిలోనూ ఇవే అనుమానాలు వస్తున్నాయి. రాజమౌళి ప్రస్తుతం రామ్ చరణ్, జూనియర్ ఎన్టీఆర్ హీరోలుగా త్రిబుల్ ఆర్ సినిమా తెరకెక్కిస్తున్న సంగతి తెలిసిందే. ఈ సినిమా షూటింగ్ ప్రస్తుతం వేగంగా జరుగుతోంది. క్లైమాక్స్ మినహా సినిమా అంతా పూర్తి అయిపోయింది. హైదరాబాద్ పరిసర ప్రాంతాల్లోనే హాలీవుడ్ సాంకేతిక నిపుణుల సాయంతో క్లైమాక్స్ చిత్రీకరణ జరుగుతుంది. ఇదిలా ఉంటే ఈ సినిమాలో జూనియర్ ఎన్టీఆర్ తో పోలిస్తే రామ్ చరణ్ కు అన్యాయం జరుగుతుంది అని వార్తలు సోషల్ మీడియాలో జోరుగా వినిపిస్తున్నాయి.
సాధారణంగా ఒక మల్టీస్టారర్ సినిమా చేసేటప్పుడు ఆ దర్శకులకు ఇలాంటి ఇబ్బందులు తప్పవు. రాజమౌళి కూడా దీనికి మినహాయింపు కాదు. ఎన్టీఆర్, చరణ్ లాంటి సూపర్ స్టార్స్ తో సినిమా చేస్తున్నప్పుడు ఇద్దరి అభిమానులను సంతృప్తి పరచడం అనేది చిన్న విషయం కాదు. కానీ తన దర్శకత్వ ప్రతిభతో నిరూపించి చూపించాలని ఫిక్స్ అయిపోయాడు దర్శకధీరుడు. అయినా కూడా సోషల్ మీడియాలో ఈ సినిమాపై ప్రచారం ఆగడం లేదు.
జూనియర్ ఎన్టీఆర్ తో పోలిస్తే రామ్ చరణ్ కు ఈ సినిమాలో పర్ఫార్మెన్స్ కు తక్కువగా ఉన్న క్యారెక్టర్ దొరికిందని వార్తలు వినిపిస్తున్నాయి. మరోవైపు యాక్షన్ సీక్వెన్స్ ల విషయానికి వస్తే జూనియర్ ఎన్టీఆర్ కంటే రామ్ చరణ్ కు రెండు ఎక్కువగా ఉన్నాయని.. కానీ చివర్లో క్యారెక్టర్ పరంగా చూస్తే మాత్రం ఎన్టీఆర్ ఎక్కువ మార్కులు సొంతం చేసుకుంటాడని తెలుస్తోంది. క్లైమాక్స్ లో సీతారామరాజు కంటే కొమరం భీమ్ ఇంపాక్ట్ ఎక్కువగా ఉంటుందని తెలుస్తోంది. ఈ విషయంలో తెలియకుండానే రాజమౌళి కాస్త ఎన్టీఆర్ వైపు ఎడ్జ్ చూపిస్తున్నట్లు తెలుస్తోంది.