ప్రపంచ సినిమాకు తలమానికంగా భావించే ఆస్కార్ పురస్కారాల వేడుక ఆదివారం అమెరికా లాస్ ఏంజిల్స్లో వైభవంగా జరిగింది. ఆనవాయితీ ప్రకారం ఫిబ్రవరి చివరి ఆదివారంలో నిర్వహించాల్సిన ఈ వేడుకను కరోనా ప్రభావంతో రెండు నెలల ఆలస్యంగా నిర్వహించారు. ఈ ఏడాది లాస్ ఏంజిల్స్లోని డాల్బీ థియేటర్తో పాటు యూనియన్ స్టేషన్ను వేదికలుగా ఎంచుకున్నారు. భౌతిక దూరాన్ని పాటిస్తూ ప్రేక్షకులు లేకుండా సినీ ప్రముఖులతో ఈ వేడుకను నిర్వహించారు. వర్చువల్ పద్దతిలో కూడా అవార్డుల్ని ప్రదానం చేయడం ఈ ఏడాది విశేషంగా చెప్పుకోవచ్చు. ఈ 93వ ఆస్కార్ పురస్కారాల్లో ‘నోమాడ్ ల్యాండ్’ చిత్రం మూడు అవార్డులతో అగ్ర భాగాన నిలిచింది. ఆర్థిక మాంద్యం ప్రభావంతో సంచార జీవితాన్ని వెతుక్కుని సాగిపోయే వ్యథాభరితుల బతుకు చిత్రానికి హృద్యమైన దృశ్యరూపంగా రూపొందిన ‘నోమాడ్ ల్యాండ్’ ఉత్తమ చిత్రం, ఉత్తమ దర్శకురాలు, ఉత్తమ నటి విభాగాల్లో పురస్కారాల్ని గెలుచుకుంది.
సంచార జీవన రూపం ‘నోమాడ్ ల్యాండ్’
ఉన్నచోట బతుకును కోల్పోయినప్పుడు అంతటా వెతుకులాట తప్పదు. జీవితం ఎక్కడా స్థిరమైన భరోసా ఇవ్వలేనప్పుడు సంచారంలోనే బతుకు తీపిని ఆస్వాదించాలనే తాత్విక భూమిక మీద ‘నోమాడ్ ల్యాండ్’ చిత్ర కథ నడుస్తుంది. నోమాడ్ అంటే సంచార జీవి అని అర్థం. అమెరికన్ రచయిత్రి జెస్సికా బ్రూడర్ 2017లో రాసిన ‘నోమాడ్ల్యాండ్: సర్వైవింగ్ అమెరికా ఇన్ ది ట్వంటీ ఫస్ట్ సెంచరీ’ నవల ఆధారంగా ఈ చిత్రాన్ని రూపొందించారు. 2011లో ఆర్థిక మాంద్యం వల్ల అమెరికాలో ఉద్యోగాన్ని కోల్పోయిన ఫెర్క్ అనే మహిళ జీవిత ప్రయాణానికి దృశ్యరూపంగా ఈ సినిమా కథ నడుస్తుంది. భర్తను కోల్పోయిన బాధ నుంచి కోలుకోక ముందే ఫెర్న్ ఉద్యోగాన్ని కోల్పోతుంది. తాను నివసించే నెవడా పట్టణంలో జీవనోపాధి దొరికే అవకాశం లేకపోవడంతో సంచార జీవితాన్ని ఎంచుకుంటుంది. ఓ వ్యాన్ కొనుక్కొని జీవన యాత్రకు బయలుదేరుతుంది.
సువిశాలమైన అమెరికా భూభాగంలో ఫెర్న్ చేసే ప్రయాణం, ఈ క్రమంలో ఆమెకు పరిచయమయ్యే ఇతర సంచార జీవనులు, వారితో స్నేహం నేపథ్యంలో ఈ చిత్ర కథ సాగుతుంది. సంచార జీవితంలో ఎవరితోనూ శాశ్వత వీడ్కోలు ఉండదు. దిశారహిత ప్రయాణంలో మళ్లీ ఒకరికొకరు తారసపడొచ్చు. సంచార జీవితం అంటే ప్రకృతితో పాటు ఎన్నో అవాంతరాల్ని జయించాలి. ముఖ్యంగా ఒంటరితనాన్నే సహవాసిగా చేసుకునే పరిణితి అవసరం. ఇలా అనేక జీవన పార్శాల్ని చర్చిస్తూ ఈ చిత్ర కథ నడుస్తుంది. ఫెర్న్ పాత్రలో సీనియర్ నటి ఫ్రాన్సెస్ మెక్డోర్మెండ్ అద్భుతమైన అభినయాన్ని ప్రదర్శించింది. ఈ సినిమాకు గాను ఆమె ఉత్తమ నటిగా ఆస్కార్ పురస్కారాన్ని గెలుచుకుంది. ఆమెదికి మూడో ఆస్కార్ పురస్కారం కావడం విశేషం.
ఆలోచనను రేకెత్తించే ‘అనదర్రౌండ్’
ఉత్తమ విదేశీ చిత్రంగా డెన్మార్క్ చిత్రం ‘అనదర్రౌండ్’ ఆస్కార్ పురస్కారాన్ని దక్కించుకున్నది. వ్యక్తిగత జీవితంలో ఎదురవుతున్న సమస్యల నుంచి బయటపడేందుకు మద్యపానాన్ని ఆశ్రయించిన నలుగురు ఉపాధ్యాయుల కథ ఇది. మద్యపానానికి బానిసలుగా మారిన వారు వృత్తిపరంగా, వ్యక్తిగతంగా ఎలాంటి అవరోధాల్ని ఎదుర్కొన్నారనేది ఆలోచనాత్మకంగా దర్శకుడు వింటెన్బర్గ్ ఈ సినిమాలో ఆవిష్కరించారు. ఉత్తమ విదేశీ చిత్రంతో పాటు ఉత్తమ దర్శకుడి విభాగంలో ఈ సినిమా పోటీపడింది.
వార్థక్యపు కష్టాల ‘ది ఫాదర్’
ఫ్లోరియన్ జెల్లర్ దర్శకత్వం వహించిన ‘ది ఫాదర్’ చిత్రంలో ఉత్తమ నటనకుగాను సీనియర్ నటుడు ఆంథోని హాప్కిన్స్ ఉత్తమ నటుడిగా ఆస్కార్ పురస్కారాన్ని గెలుచుకున్నారు. మతిమరపుతో పాటు వార్థక్యం కారణంగా వచ్చిన మానసిక రుగ్మతలతో సతమతమయ్యే తండ్రిగా హాప్కిన్స్ నటన హృదయాల్ని స్పృశిస్తుంది. ప్రేమించిన వారిని ఇబ్బందులకు గురిచేస్తున్నాననే అపరాధ భావన, నిస్సహాయక పరిస్థితుల్ని అధిగమించాలనే తపన మధ్య సంఘర్షణకు లోనయ్యే వృద్ధుడిగా హాప్కిన్స్ నటన గర్తుండిపోతుంది.
రెండో మహిళా దర్శకురాలు
సుదీర్ఘ ఆస్కార్ చరిత్రలో దర్శకత్వం విభాగంలో ఆస్కార్ గెలుచుకున్న రెండో మహిళగా క్లోయీ జా (39) సంచలనం సృష్టించారు. ‘నోమాడ్ ల్యాండ్’ చిత్రానికి ఆమె ఈ అవార్డును అందుకుంది. చైనాలో పుట్టిన క్లోయీ జా బ్రిటన్లో విద్యాభ్యాసం పూర్తిచేసుకుంది. అమెరికాలో స్థిరపడి దర్శకత్వాన్ని వృత్తిగా చేసుకుంది. ‘సాంగ్స్ మై బ్రదర్స్ టాట్ మీ’ (2015) చిత్రం ద్వారా ఆమె దర్శకురాలిగా ప్రయాణాన్ని ఆరంభించారు. ప్రస్తుతం ఆమె ప్రఖ్యాత వాల్ట్డిస్నీ స్టూడియో నిర్మిస్తున్న ‘ఎటర్నల్స్’ చిత్రానికి దర్శకురాలిగా బాధ్యత నిర్వర్తిస్తున్నారు. ఆస్కార్ గెలుచుకున్న సందర్భంగా క్లోయీ జా మాట్లాడుతూ ‘చిన్నతనంలో మా నాన్న నాకు నీతివంతమైన కథలు, పద్యాలు చెప్పేవారు. ్ల ‘త్రీ క్యారెక్టర్ క్లాసిక్’ అనే పద్యంలోని ‘మనుషులంతా పుట్టుకతో మంచివారే’ అనే వాక్యం నా మనసులో ముద్రపడిపోయింది. నా ప్రయాణంలో ఎంతోమంది మంచివారు ఎదురయ్యారు. వారందరికి ఈ అవార్డు అంకితం’ అని చెప్పింది.
ఆశావాహ దృక్పథమే శ్వాసగా
‘మినారి’ చిత్రానికిగాను యున్ యా జంగ్ ఉత్తమ సహాయనటిగా ఆస్కార్ అందుకుంది. ఆస్కార్ దక్కించుకున్న తొలి కొరియన్ నటిగా నిలిచింది. బతుకుతెరువు కోసం అమెరికాకు వలస వెళ్లిన కొరియన్ జీవితాల ఆధారంగా దర్శకుడు లీ ఐసాక్ చంగ్ ఈ చిత్రాన్ని తెరకెక్కించారు. జీవితంలో ఎన్ని కఠిన పరిస్థితులు ఎదురైనా సానుకూల దృక్పథంతో వాటిని దాటుకుంటూ ముందుకు సాగాల్సిందేనని నమ్మే వృద్ధురాలిగా యున్ యా జంగ్ అసమాన నటనను ప్రదర్శించింది. మియోషీ ఉమెకో తర్వాత ఆస్కార్ను అందుకున్న రెండో ఆసియన్గా యున్ యా జంగ్ ఖ్యాతి గడించారు.
29 ఏళ్ల తర్వాత..
‘ది ఫాదర్’ చిత్రానికిగాను 83 ఏళ్ల వయసులో ఉత్తమనటుడిగా ఆంథోనీ హాప్కిన్స్ఆస్కార్ అందుకున్నారు. ఆస్కార్ పురస్కారాన్ని అందుకున్న అత్యధిక వయస్కుడైన నటుడిగా చరిత్రను సృష్టించారు. 1992లో ‘ది సైలెన్స్ ఆఫ్ ది లాంబ్స్’ సినిమాతో తొలి ఆస్కార్ను అందుకున్న ఆంథోనీ హాప్కిన్స్ తిరిగి ఇరవై తొమ్మిదేళ్ల తర్వాత ‘ది ఫాదర్’తో రెండో పురస్కారాన్ని సొంతం చేసుకున్నారు. అత్యధిక విరామం తర్వాత ఆస్కార్ను అందుకున్న నటుడిగా నిలిచారు.
ఆస్కార్ విశేషాలు..
‘మా రైనీస్ బ్లాక్ బాటమ్’ చిత్రంతో మేకప్ హెయిర్ైైస్టెలిస్ట్ విభాగంలో అవార్డును అందుకున్న తొలి నల్లజాతీయులుగా మియా నీల్, జమికా విల్సన్ రికార్డు నెలకొల్పారు. ఇదే సినిమాకుగాను ఉత్తమ క్యాస్టూమ్ డిజైనర్గా 89 ఏళ్ల అన్ రాత్కు అవార్డు వరించింది. అత్యధిక వయస్కుడైన ఆస్కార్ విజేతగా అన్రాత్ నిలిచారు.ఒరిజినల్ స్క్రీన్ప్లే (‘ప్రామిసింగ్ యంగ్ ఉమెన్’ చిత్రం) విభాగంలో ఆస్కార్ను అందుకున్న తొలి మహిళగా ఎమరాల్డ్ ఫన్నెల్ ఖ్యాతి గడించింది.