హైదరాబాద్, ఏప్రిల్ 24 (నమస్తే తెలంగాణ): దేశంలో కరోనా కేసులు తీవ్రంగా పెరగటంతో ఆక్సిజన్ అవసరం అనూహ్యంగా పెరిగిపోయింది. ఆక్సిజన్ సంక్షోభం జనాల ప్రాణాలను పిట్టల్లా హరిస్తున్నది. పలు రాష్ర్టాల్లో కేవలం ఆక్సిజన్ లేకపోవడం వల్ల పదు ల సంఖ్యలో ప్రజలు మృత్యువాతపడుతున్నారు. ప్రస్తుతం దేశంలో 7,500 టన్నుల ఆక్సిజన్ ఉత్పత్తి అవుతుండగా.. 6,600 టన్నులు రాష్ర్టాలకు సరఫరా అవుతున్నది. అయినప్పటికీ కొరత తీరడం లేదు. వైరస్బారిన పడిన తమవారిని రక్షించుకొనేందుకు వాతావరణంలో ఉచితంగా దొరికే ప్రాణవాయువు కోసం పరుగులు పెడుతున్నారు. పాజిటివ్ వచ్చినవారిలో 5 నుంచి 8 శాతం మందికి మాత్రమే ఆక్సిజన్ అవసరం ఏర్పడుతున్నదని అధ్యయనాలు చెప్తున్నప్పటికీ.. దానికి డిమాండ్ మాత్రం తగ్గడం లేదు. కొందరి అనవసరమైన ఆందోళనతో నిజంగా అవసరమైనవారికి ఆక్సిజన్ అందకపోగా కృత్రిమ కొరత ఏర్పడుతున్నది.
శరీరానికి కావాల్సిన ఆక్సిజన్ ఎంత?
మానవ జీవక్రియలు జరిగేందుకు ఆక్సిజన్ అత్యవసరం. గాలిలో నుంచి ముక్కుద్వారా తీసుకొన్న ఆక్సిజన్ను ఊపిరితిత్తులు వేరుచేసి.. శరీరంలోని కార్బన్ డయాక్సైడ్ను వెలుపలికి పంపుతాయి. ఇందుకోసం నిమిషానికి 5-6 మిల్లీలీటర్ల ఆక్సిజన్ను వినియోగించుకొంటాయి. ఊపిరితిత్తులకు ఇన్ఫెక్షన్ సోకితే సాధారణం కంటే నాలుగురెట్లు అధికంగా ఆక్సిజన్ను వినియోగించుకొంటాయి. కొవిడ్ సోకినవారిలో ఈ ప్రక్రియకు ఆటంకం కలుగుతుంది. ఊపిరితిత్తుల్లోని చిన్న గదుల్లో విష పదార్థాలు నిండుతాయి. దీంతోపాటు ఊపిరితిత్తులకు రక్తాన్ని సరఫరాచేసే నాళాలు మూసుకుపోతాయి. దీంతో కచ్చితంగా కృత్రిమశ్వాస అందించాల్సిన అవసరం ఏర్పడుతుంది.
ఎవరికి ఆక్సిజన్ సపోర్ట్ కావాలి
సాచురేషన్ లెవల్స్ 90 శాతం కంటే తగ్గిన వారికి మాత్రమే ఆక్సిజన్ సపోర్ట్ అవుతుంది. దీర్ఘకాలిక రోగాలు ఉన్నవారికి 92-93 వద్ద కూడా అవసరం పడొచ్చు. వైద్యుల సలహా, పర్యవేక్షణ లేకుండా ఆక్సిజన్ థెరపీ ప్రారంభిస్తే అవయవాలపై చెడుప్రభావం చూపే అవకాశముంటుంది. శ్వాస సమస్య మోడరేట్గా ఉన్నవారికి సింపుల్ ఫేస్మాస్క్ ద్వారానే అందించాలి. తీవ్రమైన కేసు అయితే నాసల్ హైఫ్లో విధానంలో అందించాలి. అతి తీవ్రమైన కేసు అయితేనే వెంటిలేటర్ అవసరం పడుతుంది.
ఇతర రంగాల్లో ఆక్సిజన్ పాత్ర
ఆక్సిజన్ అంటే ప్రాణవాయువు అని మాత్రమే చాలామందికి తెలుసు. కానీ ఆక్సిజన్ను మెడికల్, ఇండస్ట్రియల్, ఎయిరోస్పేస్ తదితర ముఖ్యమైన రంగాల్లోనూ విరివిగా వినియోగిస్తుంటారు. వాతావరణంలో 21% మాత్రమే ఉండే ఆక్సిజన్ ప్రాణకోటికి జీవం పోస్తున్నది. పర్వతారోహకుల్లో ఒత్తిడి ఎదుర్కొనేలా ఉండేలా కంప్రెస్డ్ ఆక్సిజన్ వినియోగిస్తారు. తీవ్ర శ్వాస సంబంధ సమస్యలున్న వారిలో ఆక్సిజన్ థెరపీ, వెంటిలేటర్ ఉపయోగిస్తారు. కొన్ని రకాల బ్యాక్టీరియాలను చంపేందుకు, క్రిమిరహిత ఏజెంట్గా వాడుతారు. పారిశ్రామికంగా స్టీల్ ఫ్యాక్టరీల్లో వినియోగిస్తారు. కార్బన్ను కార్బన్ డయాక్సైడ్గా మార్చేందుకు ఆక్సిజన్ అవసరం. వెల్డింగ్ పనుల్లోనూ దీనిని వినియోగిస్తారు. ఎయిరోస్పేస్లో ఆక్సిజన్ వాడకం ఎంతో ఉంటుంది. క్షిపణులు, రాకెట్లలో లిక్విడ్ ఆక్సిజన్ను వినియోగిస్తారు. మురుగునీటి శుద్ధి, వాటర్ ప్యూరిఫికేషన్, వాహనాలు, జనరేటర్లలోనూ శక్తి ఉత్పత్తికి ఆక్సిజన్ అవసరం ఉంటుంది.