శేషేంద్రజాలం
పుర్రెలో పుట్టే ఆలోచన బాహ్య పరిస్థితులను బేరీజు వేసుకోదు. మనసులో పుట్టే కోరిక సాధ్యాసాధ్యాలను తర్కించుకోదు. పుడతాయంతే! పట్టుదలగలవాడైనా ఒక్కోసారి ఆ ఆలోచనకు లొంగిపోతుంటాడు. కోరిక కాటుకు గురవుతుంటాడు. ఈ ఆలోచనలు, ఆ కోరికలు ఒకే ఒరలో ఇమడని రెండు కత్తుల్లాంటివి. వీటి మధ్య కొట్టుమిట్టాడే కొందరు సంపన్నుల జీవితాల్లోని విభిన్న కోణాల సమాహారం ‘కామోత్సవ్’. ఇందులోని పాత్రలుగా సృజనశీలురు, సౌందర్య పిపాసులు కనిపిస్తారు. అర్థబలంలో అందరూ సంపన్నులే. గుణంలో మాత్రం పచ్చి లాలసులు. కోరికలనే గుర్రాలను ఎంత మాత్రం అదుపుచేయలేకపోతుంటారు. ఒకరిది ఉపయోగపడని జ్ఞానం. మరొకరిది దక్కని కీర్తి. వేరొకరిది తీరని తృష్ణ. ఇలాంటి విచిత్ర వ్యక్తులను అంతే వింతగా ఆవిష్కరించారు దివంగత గుంటూరు శేషేంద్ర శర్మ. 1987లో ఆంధ్రజ్యోతి సచిత్ర వారపత్రికలో ప్రచురితమైన ఈ నవలలో మలుపులన్నీ వలపుల చుట్టూనే తిరుగుతాయి. అందాల అర్చన మొదలు ఆధ్యాత్మిక సాధన వరకు ఊహించని విధానాలు తారసపడతాయి. తమకంతో మమేకమయ్యేలా చేస్తాయి. పాత్రల పరిచయాలు, పరితాపాలు పక్కనపెడితే దశాబ్దాల కిందటి సంపన్నుల జీవన వైచిత్రి విస్తుపోయేలా చేస్తుంటుంది. శేషేంద్ర శర్మ నిదురించే తోటలో పుట్టిన ఈ నవలపై అప్పట్లో చాలా విమర్శలే వచ్చాయి. ఆయనపైనా విమర్శలు గుప్పుమన్నాయి. వాటికి ఆయన చెప్పిన ఘాటైన సమాధానాలూ ఇందులో చదువొచ్చు. అవన్నీ పక్కనపెడితే ఆద్యంతం ఆసక్తిగా చదివించే నవల ఇది. మనలో మనం తర్కించుకోవడానికి ఉపయోగపడే అరుదైన రచన. తప్పక చదవండి. కోరికను మించి ఆలోచన చేయగలిగితే ఇందులో నిక్షిప్తమైన, రచయిత చెప్పదలుచుకున్న అసలు విషయాలను మరింతగా ఆస్వాదించవచ్చు.
కామోత్సవ్
రచన: గుంటూరు శేషేంద్ర శర్మ
పేజీలు: 198, వెల: రూ.200
ప్రతులకు: అన్ని ప్రముఖ
పుస్తక కేంద్రాలు
శ్రీశ్రీ అనువాద మకరందం
‘శ్రీశ్రీ’ అనే రెండు అక్షరాలు ఎంతో పదునైనవి. శ్రీరంగం శ్రీనివాసరావుకన్నా శక్తిమంతమైనవి. ప్రజల పక్షాన నిలిచేవి. అందుకే సుమారు 90 ఏండ్ల కిందట పుట్టిన ‘ఆయన కవిత్వం’ ఇప్పటికీ సజీవంగా ఉంది. జనాన్ని ఉర్రూతలూగిస్తున్నది. ఇప్పటికి మూడు, నాలుగు తరాల్ని ఉరకలు వేయించిన ఆ కవనం భవిష్యత్ తరాలనూ శాసిస్తుంది అనడంలో సందేహం లేదు. శ్రీశ్రీ కేవలం ప్రజాకవే కాదు.. సాహితీ ప్రక్రియలన్నిటా విశిష్ట ప్రయోగాలు చేసినవాడు. అనువాదాలలో ఆరితేరినవాడు. ప్రాచ్య, పాశ్చాత్య కవులను ఆపోసన పట్టినవాడు. అణువణువునా ఆవాహన చేసుకున్నవాడు. వారి కవితామృతాన్ని తెలుగునేల జాలువారించినవాడు. ‘ఆంధ్రీ కవనం’ పేరుతో విడుదలైన ఈ పుస్తకంలో యాభైకి పైగా విశ్వకవుల కవితలకు శ్రీశ్రీ అనువాదాలు ఉన్నాయి. కొన్ని పద్యరూపంలో ఉండటం విశేషం. సెజార్ వల్లెజో.. చే గువేరా, పాబ్లో నెరుడా, డిలాన్ థామస్, మయ కోవస్కీ, ఫైజ్ అహ్మద్ ఫైజ్, నజీమ్ హిక్మత్ వంటి హేమాహేమీల కవితలకు సరళ అనువాదాలు ఇందులో చూడవచ్చు. హరీంద్రనాథ్ చటోపాధ్యాయ, గురజాడ వంటి వారి కవితాలకూ అనువాదాలు ఉన్నాయి. అసలు ఈ అనువాదాలన్నీ సేకరించి గుదిగుచ్చి, తన శైలిలో ఆయా కవులపై క్లుప్త కవితలు కూడా రాసి మనముందుకు తెచ్చినవారు సింగంపల్లి అశోక్ కుమార్. సప్తతి దాటిన ఆ ‘నవయువకుడు’ శ్రీశ్రీ మీద అభిమానంతో ఇప్పటికి వంద పుస్తకాలు తెచ్చారు. ఆ క్రమంలో ఇది నూరో పుస్తకం కావడం విశేషం. ఒక కవి మీద వంద పుస్తకాలు తేవడమే గొప్ప అంటే మరో ‘నూరు పుస్తకాల హోరు’కు శ్రీకారం చుడుతున్నారాయన. కవితాభిమానులకు కచ్చితమైన కరదీపిక ఈ పుస్తకం అనడం సబబు.
ఆంధ్రీ కవనం
(శ్రీశ్రీ అనువాద కవిత్వం)
కూర్పు: సింగంపల్లి అశోక్ కుమార్
పేజీలు: 240, వెల: రూ. 200
ప్రతులకు: శ్రీశ్రీ సాహిత్యనిధి,
విజయవాడ. ఫోన్: 92462 77375
ఆణిముత్యాలు
ఊహల్లోంచి పుట్టుకొచ్చే కథలు ఆకర్షణీయంగా ఉన్నా.. అందులో తెలియని లోటు కనిపిస్తుంది. కానీ, మన చుట్టూ ఉండే వ్యక్తులు, పరిస్థితులు కథా వస్తువులు అయితే అందంగా ఉంటాయి. కథకుడికి ఓ చిన్న సంఘటన చాలు రసరమ్యమైన కథగా మలచడానికి. చిన్న అనుభవం చాలు ఊహాతీత తీరాల్లోకి తీసుకుపోవడానికి. ‘తోరపు దారాలు’ కథలన్నీ రచయిత శ్రీనూవాసా అలా అల్లినవే! చిన్న చిన్న కథలు, చిన్న చిన్న వాక్యాలున్న కథలు, చిన్న చిన్న పదాలతో అల్లిన కథలు.. ఇలా మొదలుపెట్టగానే అలా అయిపోయే కథలివి. అందమైన భావాన్ని పండించడానికి పదాడంబరం అవసరం లేదని నిరూపించారు రచయిత. అలవికాని భావాలను సైతం అలతి అలతి పదాల్లో అందంగా ఆవిష్కరించారు. ముప్పయ్ ఆణిముత్యాల్లాంటి కథలను గుదిగుచ్చి తోరపుదారాల రూపంలో అందించారు. ‘ఒంటరితనం’ వీరయ్య తాత మంచితనాన్ని తెలియజేస్తే, ‘రుణం’ మనిషి సంస్కారానికి సామాజిక స్థితితో సంబంధం లేదని నిరూపిస్తుంది. ‘పునర్నిర్మాణం’ అంటరానితనానికి గొడ్డలిపెట్టుగా నిలుస్తుంది. వ్రతాల సందర్భంగా తల్లులు పిల్లలకు తోరాలు కట్టడం మన సంప్రదాయం. తన బిడ్డలకు రక్షగా వాటిని కడుతుంది తల్లి. ఈ ‘తోరపుదారాలు’ కూడా కథలు మనిషిలోని మానవత్వానికి రక్షగా నిలుస్తాయి.
తోరపు దారాలు
రచన: శ్రీనూ వాసా
పేజీలు: 97 వెల: రూ.100
ప్రతులకు: జ్యోతి వలబోజు
(80963 10140)
నవోదయ బుక్ హౌస్
(040- 2465 2387)
అచ్చంగా తెలుగు
(085588 99478)