కాన్బెర్రా: మనిషి మచ్చిక చేసుకున్న మొదటి జంతువు శునకం. ఆహారం పెట్టే వారిపట్ల శునకాలు ఎంతో విశ్వాసంతో ఉంటాయి. అందుకే శునకాలు, మనుషులు మధ్య ప్రత్యేకమైన అనుబంధం ఉంటుంది. కొంతమంది తమ పెంపుడు శునకాలకు కొన్ని పనుల్లో శిక్షణ ఇస్తారు. ఆ తాము నేర్పిన పనులను తమ శునకాలు చేస్తుంటే చూసి తెగ మురిసిపోతుంటారు. ఇప్పుడైతే తమ శునకాలు చేసే వింతవింత పనులను సోషల్ మీడియాలో షేర్ చేస్తుంటారు.
తాజాగా అలా షేర్ చేసిన ఒక వీడియో సోషల్ మీడియాలో చెక్కర్లు కొడుతున్నది. ఆస్ట్రేలియాకు చెందిన మేరీ అనే మహిళ తన గొర్రెలకు కాపలా ఉండటం కోసం ఒక శునకాన్ని పెంచుకుంటున్నది. ఆస్ట్రేలియన్ షెఫర్డ్ జాతికి చెందిన ఆ శునకానికి సీక్రెట్ అని పేరు పెట్టుకుంది. అయితే ఈ సీక్రెట్ అన్ని శునకాల్లా సాధారణ శునకం కాదు. ఇది మనుషులు చేసే పనులను నిశితంగా గమనించి తాను కూడా చేసే ప్రయత్నం చేస్తుంటుంది.
అందుకే తన యజమానురాలు మేరీ యోగా చేయడం చూసి సీక్రెట్ కూడా యోగా నేర్చుకున్నది. ప్రతిరోజూ ఉదయాన్నే మేరీ ఎలా యోగసనాలు వేస్తే సీక్రెట్ కూడా అలాగే ఆసనాలు వేస్తూ ఆకట్టుకుంటున్నది. ఈ వీడీయోను మేరీ.. మై ఆసి గాల్ అనే క్యాప్సన్తో ఇన్స్టాగ్రామ్లో పోస్ట్ చేసింది. అయితే ఈ వీడియోను అమెరికాకు చెందిన మాజీ ప్రొఫెషనల్ బాస్కెట్బాల్ క్రీడాకారుడు రెక్స్ చాప్మన్.. దిస్ డాగ్ ఈజ్ యాక్సవల్లీ డూయింగ్ యోగా అనే క్యాప్షన్తో ట్విట్టర్లో షేర్ చేశాడు.
దాంతో ఈ వీడియో ఇప్పుడు సోషల్ మీడియాలో వైరల్గా మారింది. ఇప్పటివరకు 40 లక్షల మందికిపైగా నెటిజన్లు ఈ వీడియోను వీక్షించారు. శునకం చేస్తున్న ముద్దుముద్దు యోగాసనాలు చూసి నెటిజన్లు ఫిదా అవుతున్నారు. రకరకాల కామెంట్లతో శునకాన్ని ఆకాశానికి ఎత్తేస్తున్నారు. మరి ఇంకెందుకు ఆలస్యం ఈ కింది వీడియోను మీరు కూడా ఒకసారి చూసి ఎంజాయ్ చేయండి.