శనివారం 11 జూలై 2020
Rajanna-siricilla - Feb 17, 2020 , 01:49:53

శివరాత్రి జాతర వైభవంగా నిర్వహిస్తాం

శివరాత్రి జాతర వైభవంగా నిర్వహిస్తాం

వేములవాడ, నమస్తే తెలంగాణ : రాష్ట్రంలోనే వేములవాడ, యాదాద్రి గొప్ప పుణ్యక్షేత్రాలని, రాజన్న సన్నిధిలో మహాశివరాత్రి జాతర వేడుకలను వైభవంగా నిర్వహిస్తామని రాష్ట్ర పర్యాటక, సాంస్కృతిక శాఖ మంత్రి శ్రీనివాస్‌ గౌడ్‌ స్పష్టంచేశారు. ఆదివారం వేములవాడ శ్రీ రాజరాజేశ్వర స్వామి సన్నిధిలో ఆయన ప్రత్యేక పూజలు నిర్వహించి స్వామివారి తీర్థ ప్రసాదాలను స్వీకరించారు. అనంతరం ఈ నెల 20 నుంచి 22వ తేదీ వరకు జరుగనున్ను మహాశివరాత్రి జాతర వేడుకల సందర్భంగా అధికారులతో ఆలయ ఓపెన్‌స్లాబ్‌లో సమీక్షా సమావేశం నిర్వహించి మాట్లాడారు. జిల్లాలోని శ్రీ రాజరాజేశ్వర జలాశయం, నాంపల్లి గుట్ట, జలాశయం బ్యాక్‌ వాటర్‌ కలిపి గొప్ప పర్యాటక కేంద్రంగా తీర్చి దిద్దుతామన్నారు. జిల్లా మంత్రి కేటీఆర్‌ ఇప్పటికే ఇందుకు సంబంధించిన నివేదికలను త్వరితగతిన ఏర్పాటు చేయాలని సూచించారనీ, ఇందుకు అనుగుణంగా సిద్ధమవుతున్నాయన్నారు. బీడు భూములను సాగు భూములుగా మార్చేందుకు కలలుగన్న ముఖ్యమంత్రి కేసీఆర్‌ నదీ తీరంలో 300 కిలో మీటర్ల మేర గోదావరి జలాలను నిలిపిన అపర భగీరథుడని కొనియాడారు. 


గోదావరి జలాలతో రాష్ట్రంలో పర్యాటకంగా భాగా అభివృద్ధి చెందబోతుందన్నారు. హైదరాబాద్‌ నుంచి వేములవాడకు వచ్చి గడిపే విధంగా పర్యాటక రంగాన్ని తీర్చిదిద్దుతామన్నారు. మహాశివరాత్రి జాతర సందర్భంగా హైదరాబాద్‌ నుంచి హెలీకాప్టర్‌ సేవలను పరిశీలించాలని టూరిజం శాఖ అధికారులను ఆదేశించారు. టూరిజం ద్వారా హైదరాబాద్‌కు చెందిన భక్తులకు కూడా ప్రత్యేక బస్సు సౌకర్యాన్ని కల్పించాలని ఆదేశించారు. రానున్న రోజుల్లో రాజన్న సన్నిధికి మరింత భక్తుల తాకిడి పెరిగే అవకాశం ఉన్నందున వేములవాడ టూరిజం హోటల్‌ గదులను విస్తరించేందుకు ప్రతిపాదనలు సిద్ధం చేయాలన్నారు. రాజన్న వైభవాన్ని రాజధానిలో కనిపించే విధంగా హైదరాబాద్‌లో ప్రధాన కూడళ్ల వద్ద భారీ హోర్డింగులను కూడా ఏర్పాటు చేయాలన్నారు. మానవ సేవే మాధవ సేవగా భావించి జాతర విధులకు హాజరయ్యే అధికారులు అంకితభావంతో పనిచేసి విజయవంతం చేయాలని కోరారు. జాతరలో పరిశుభ్రత, తాగునీటికి తగిని ప్రాధాన్యతను ఇవ్వాలని వివరించారు. భక్తులకు అవసరమయ్యే విధంగా మరుగుదొడ్ల నిర్మాణాలను కూడా చేపట్టాలన్నారు.


 వైభవంగా శివార్చన..

ప్రతి ఏడాదిలాగే శివార్చన వేడుకను అత్యంత వైభవంగా నిర్వహించాలని మంత్రి ఆదేశించారు. అంతర్జాతీయ, పద్మ శ్రీ అవార్డులను పొందిన కళాకారులతో వేడుకలను కన్నుల విందుగా భక్తి పర్వశాన్ని నింపే విధంగా ఉండాలని సూచించారు. 


 ఇబ్బందులు కలుగకుండా చూడాలి..ఎమ్మెల్యే రమేశ్‌ బాబు

మహాశివరాత్రి జాతర సందర్భంగా ఆలయానికి వచ్చే భక్తులకు దర్శనం సమయంలో ఇబ్బందులు కలుగకుండా చూడాలని ఎమ్మెల్యే రమేశ్‌ బాబు సూచించారు. ఉచిత రవాణా చేసే వాహనాలను శోభాయమానంగా అలంకరించాలన్నారు. శివార్చనలో స్థానిక కళాకారులకు కూడా అవకాశం కల్పించాలని మంత్రిని కోరారు. నూతనంగా పట్టణంలో సెంట్రల్‌ లైటింగ్‌ కూడా ఏర్పాటు చేస్తున్నందున మొక్కలను కూడా నాటాలని అధికారులను ఆదేశించారు. విలీన గ్రామాలతో పాటు పురపాలక సంఘం పరిధిలో పండుగ వైభవాన్ని చాటే విధంగా ఏర్పాట్లు ఉండాలని అధికారులకు సూచించారు. 


 రెండు రోజుల ముందే పూర్తి కావాలి..

మహాశివరాత్రి జాతర సందర్భంగా భక్తుల కోసం ఏర్పాటు చేస్తున్న సౌకర్యాలు రెండు రోజుల ముందే పూర్తి చేసి సిద్ధంగా ఉంచాలని అధికారులను కలెక్టర్‌ కృష్ణభాస్కర్‌ ఆదేశించారు. జాతరలో అధికారులు అంకితభావంతో పనిచేసి విజయవంతం చేయాలని కోరారు. 


 2 వేల మందితో ప్రత్యేక బందోబస్తు..

జాతరకు వచ్చే భక్తులకు అవాంఛనీయ సంఘటనలు చోటు చేసుకోకుండా 2వేల మందితో ప్రత్యేక బందోబస్తును నిర్వహిస్తున్నామని ఎస్పీ రాహుల్‌ హెగ్డే పేర్కొన్నారు. ఈ నెల 19వ తేదీ సాయంత్రమే సిబ్బందికి విధులను కేటాయించి బందోబస్తును ఏర్పాటు చేస్తామన్నారు. సీసీ కెమెరాలతో కూడా ప్రత్యేక నిఘాను ఏర్పాటు చేస్తున్నామని తెలిపారు. ట్రాఫిక్‌, భద్రతపై ప్రత్యేక కమాండెంట్‌ కంట్రోల్‌ రూంను కూడా ఏర్పాటు చేసి పర్యవేక్షిస్తామని వివరించారు. 


శివున్ని కీర్తించేలా సాంస్కృతిక కార్యక్రమాలు..

శివార్చన వేడుకలను అత్యంత వైభవోపేతంగా నిర్వహిస్తామని రాష్ట్ర సాంస్కృతిక శాఖ డైరెక్టర్‌ మామిడి హరికృష్ణ పేర్కొన్నారు. శివున్ని కీర్తించే విధంగా భక్తులకు ఆధ్యాత్మిక, సాంస్కృతిక కార్యక్రమాలను నిర్వహిస్తామని తెలిపారు. 


logo