పూర్వం పొద్దున్నే లేచి చన్నీళ్లతో స్నానం చేసేవారు. కానీ ఇప్పుడు చాలామంది వేడి నీళ్లతోనే స్నానం చేస్తున్నారు. ప్రతి ఇంట్లో హీటర్లు, గీజర్లు తప్పనిసరిగా మారిపోయాయి. మరి నిజానికి ఏ నీటితో స్నానం చేయడం మంచిది? చన్నీళ్లతో స్నానం చేయడమా? వేడినీళ్లతోనా? అంటే.. చన్నీళ్లే బెటర్ అంటున్నారు ఆరోగ్య నిపుణులు.
మరిగే నీటిని ఒంటి మీద పోసుకుంటే ఒళ్లంతా హాయిగా అనిపిస్తుంది. కానీ ఉదయం పూట స్నానం చేసినప్పుడు వేడినీళ్లతో చేయడం అంత మంచిది కాదంటున్నారు ఆరోగ్య నిపుణులు. వేడి నీటితో స్నానం చేస్తే శరీరం మొత్తం రిలాక్స్ అవుతుంది. దీనివల్ల మత్తు మత్తుగా, నిద్ర వచ్చినట్లుగా ఉంటుంది. దీనివల్ల రోజంతా అలసటగా అనిపిస్తుంది. ఈ ప్రభావంతో ఆఫీసులకు, పనులకు వెళ్లిన వారు ఇబ్బందిగా ఫీలవుతుంటారు.
అదే చన్నీళ్లతో స్నానం చేసేప్పుడు మొదట ఇబ్బందిగా అనిపించినా.. ఒంటిపై చన్నీళ్లు పడగానే శరీరం మొత్తం ఉత్తేజితమవుతుంది. దెబ్బకు నిద్రమత్తు వదిలిపోతుంది. రోజంతా యాక్టివ్గా ఉండగలుగుతారు. అందుకే వేడినీళ్ల కంటే చన్నీళ్లతో స్నానం చేయడమే మంచిదని అంటున్నారు. అంతేకాదు చన్నీళ్ల స్నానం చేయడం వల్ల ముఖ అందం కూడా రెట్టింపు అవుతుందంట.
చన్నీటితో స్నానం చేయడం వల్ల ముఖంపై ఉన్న చిన్న చిన్న రంధ్రాలు తగ్గిపోతున్నాయని నిపుణులు చెబుతున్నారు. ఈ విషయాన్ని దృష్టిలో ఉంచుకుని తీసుకొచ్చిన ఐస్ మాస్క్ ఇప్పుడు చాలా పాపులర్ అయింది. దీన్ని ఉపయోగించి చాలామంది లాభాలు పొందుతున్నారు. ఐస్ మాస్క్ అంటే.. ఒక పాత్రలో చల్లటి నీటిని తీసుకుని అందులో కొన్ని ఐస్ క్యూబ్స్ను కూడా వేస్తారు. ముఖాన్ని కాసేపు ఆ పాత్రలో ఉంచుతారు. దీనివల్ల మొహంపై ఉన్న రంధ్రాలు తగ్గడమే కాకుండా మొహం తాజాగా మారుతుంది. దీంతో అందంగా కనిపిస్తారు.
రాత్రిపూట వేడినీటితో స్నానం చేయడం మంచిది. గోరువెచ్చటి నీటితో స్నానం చేయడం వల్ల శరీరం, కండరాలు మొత్తం రిలాక్స్ అవుతాయి. దీనివల్ల పొద్దుట్నుంచి పనిచేసి అలసిపోయిన శరీరానికి ఉపశమనం లభిస్తుంది. హాయిగా నిద్రపడుతుంది. కాబట్టి రాత్రిపూట మాత్రం చన్నీళ్ల కంటే వేడినీటితో స్నానం చేయడమే బెటర్.
వీరు జాగ్రత్తగా ఉండాలి
చన్నీళ్లతో స్నానం చేయడం అందరికీ మంచిది కాదు. కొంతమంది సైనస్, మైగ్రేన్ వంటి సమస్యలతో బాధపడేవారు ఉంటారు. చలికాలంలో చన్నీటితో స్నానం చేస్తే వారి సమస్య మరింత ఎక్కువ అవుతుంది. తలపట్టేసినట్టు ఉండటమే కాకుండా తలనొప్పి కూడా పెరుగుతుంది. కాబట్టి వాళ్లు చలికాలంలో వేడినీటితో స్నానం చేయడమే మంచిది. అదే వేసవి కాలంలో వాతావరణం వేడిగా ఉంటుంది కాబట్టి ఎవరైనా చన్నీటితో స్నానం చేయొచ్చు.
లోకల్ టు గ్లోబల్ వార్తల కోసం.. నమస్తే తెలంగాణ ఫేస్బుక్, ట్విటర్ పేజీలను ఫాలో అవ్వండి
Monsoon Diet : వర్షాకాలంలో ఇమ్యూనిటీ పెంచుకోవాలా? వీటిని ఆహారంగా తీసుకోండి
ఈ ఐదింటిని డైట్లో చేర్చుకుంటే రక్తహీనత మాయం..!
మధుమేహులకు శుభవార్త : పాక్లో చక్కెర లేని మామిడి పండ్లు
షుగర్ ఉన్నోళ్లు ఈ పండ్లు తినొచ్చా