అభివృద్ధికి ప్రణాళికలు రూపొందించండి

• పెద్దపల్లి డీఎల్‌పీవో దేవకీదేవి
  

పెద్దపల్లిరూరల్‌: గ్రామపంచాయతీలతోపాటు అనుబంధ గ్రామాల అభివృద్ధి కోసం ప్రణాళికలు రూపొందించాలని పెద్దపల్లి డీఎల్‌పీవో దేవకీదేవి ఆదేశించారు. జిల్లా కేంద్రంలోని పెద్దపల్లి మండల పరిషత్‌ కార్యాలయ సమావేశమందిరంలో శుక్రవారం గ్రామపంచాయతీల కార్యదర్శులతో రెండు రోజులపాటు జరిగే శిక్షణ కార్యక్రమాన్ని ఆమె ప్రారంభించారు. ఈ సందర్భంగా డీఎల్‌పీవో మాట్లాడుతూ, గ్రామపంచాయతీలను అన్ని రంగాల్లో అభివృద్ధి చేయాలన్న ఉద్దేశంతో రాష్ట్ర ప్రభుత్వం పల్లెప్రగతి కార్యక్రమాన్ని ప్రవేశపెట్టి అమలు చేస్తున్నదని తెలిపారు. మిషన్‌ అంత్యోదయలో భాగంగా 2021-22 సంవత్సరానికి సం బంధించిన ప్రణాళికలు రూపొందించి గ్రామ సభల్లో ఆమోద ముద్ర వేసేలా చర్యలు తీసుకోవాలని సూచించారు. సమావేశంలో ఎంపీవో సుదర్శన్‌, డీపీఎం రజాక్‌ తదితరులు పాల్గొన్నారు.