ఆలేరు టౌన్, ఏప్రిల్ 12 : తెలుగు సంవత్సరాది ఆరంభంగా జరుపుకొనే ఉగాది అంటే అడుగడుగునా సంప్రదాయానికి పెద్దపీట వేయడం కనిపిస్తుంది. తెలుగు పండుగల్లో మొదటిది ఉగాది. శార్వరినామ సంవత్సరానికి వీడ్కోలు పలుకుతూ శ్రీప్లవనామ సంవత్సరానికి మంగళవారం స్వాగతం పలికేందుకు ప్రజలు సిద్ధమయ్యారు. చైత్రశుద్ధ పాడ్యమిని సంవత్సరాది అని, ఉగాదియని బ్రహ్మపురాణంలో పేర్కొన్నారు. వసంత రుతువులో గ్రీష్మతాపం వల్ల వివిధ రకాల బాధలు దరిచేరకుండా షడ్రుచులతో కూడిన ఉగాది పచ్చడిని తీసుకోవడం పండుగ సంప్రదాయంలో భాగమైంది. తీపి, పులుపు, చేదు, కారం, ఉప్పు, వగరు, ఈ ఆరింటి మిశ్రమమే ఉగాది పచ్చడి అంటారు. ఆరోగ్యపరం గా ఉగాది పచ్చడిలో వేప, చేదు కడుపులోని నులిపురుగులను నిర్మూలిస్తుంది. బెల్లం వేడిని తగ్గిస్తుంది. మామిడి ముక్కలు కాలేయానికి శక్తి, జీర్ణ వ్యవస్థకు మేలు చేస్తాయి. జిలకర అజీర్తిని హరిస్తుంది. బెల్లం, చిం తపండు వాతం, కఫం, పిత్త దోషాలను నివారిస్తుంది. బెల్లం ఆనందానికి సంకేతం. చింతపండు నేర్పునకు, వేప పువ్వు బాధకు, కారం సహనానికి, ఉప్పు ఉత్సాహానికి, రుచికి సంకేతం.
పంచాంగ పఠనం
ఉగాది ఉంటే గుర్తుకొచ్చే మరో విషయం పంచాంగ పఠనం. ప్రతి ఉగాదికి ఆ ఏడాదికి సంబంధించిన పంచాంగాన్ని జ్యోతిష పండితులు గ్రహాలు, నక్షత్రాల ఆధారంగా రూపొందిస్తే వాడవాడలా ఆలయాల్లో పంచాంగాన్ని వినేందుకు ప్రజలు ఆసక్తి చూపుతారు.
సంప్రదాయానికి పెద్దపీట..
ఉగాది.. అచ్చ తెలుగు పండుగ. తెలుగు సంవత్సరాది ఆరంభంగా ఉగాదిని జరుపుకొంటారు. ఉగాది పచ్చడి.. కవి సమ్మేళనాలు.. సా యంత్రం పంచాంగ పఠనం దాకా ఆచార వ్యవహారాల్లో సంప్రదా యం కనిపిస్తుంది. మన జీవనంలో సంస్కృతి, సంప్రదాయాలు పం డుగల రోజే ప్రతిబింబిస్తుంటాయి. ఆధునికత ఒంటబట్టించుకున్న ఈరోజుల్లోనూ ఇది మన ఆచారం, సంప్రదాయం అంటూ గొప్పగా చెప్పుకుంటున్నాం. దీన్ని కాపాడుకుంటూ ముందు తరాల వారికి అం దించాలంటే వీటి వ్యాప్తి మరింత పెరగాలి. ఉగాది పచ్చడి, బక్ష్యాలు, పులిహోర ఇంకా పలు రకాల పిండివంటలు మన ప్రత్యేకం. ఉగాది పచ్చడి జీవితంలోని ఎత్తుపల్లాల గురించిన గొప్ప సందేశాన్ని ఇస్తుంది.