నేనొక పచ్చల హారం
తయారు చేసే పనిలో పడ్డాను..
కాలుష్యం మంటలు సోకి
మచ్చలు పడ్డ వసుధ కంఠానికి
నేనొక పచ్చల హారం
బహూకరించే పనిలో పడ్డాను
ఒక చెట్టును నాటుతూ..
ఒక పిట్టను ఎగరేస్తూ..
ప్రాణవాయువుల కలలు పొదిగిన
ఒక మెరుపు తీగను
తయారు చేసే పనిలో పడ్డాను నేను
నా పచ్చల హారాన్ని మెడలో వేసుకొని
మురిసిపోయే నా నేలతల్లి
ఆకుపచ్చని నవ్వు నా కల
కొన్ని ఆకులను పుష్పాలను
పందిళ్లుగా పరిచి
నా భూతల్లి పాదాలకు
పచ్చపచ్చని చందమామలను
మువ్వలుగా చుట్టి
నర్తింపజేయటం నా స్వప్నం
పచ్చలహారపు మెరుపుల్లో
కళ్లు బైర్లు కమ్మి
భూమి చివరి అంచుదాకా
దిక్కుతోచక పరుగెత్తుతున్న
కాలుష్యపు ఇనుప పాదాల
చివరి చప్పుడు నా ఊహ
నేనొక పచ్చల హారం
తయారు చేసే పనిలో పడ్డాను
మీరు కూడా హారంలో
ఒక మణి పూసలా
గాయానికి పూసిన
హరితలేపనపు మెరుపులా
అంటుకుంటారు కదూ..
-చిత్తలూరి ,82474 32521