ఆదివారం 25 అక్టోబర్ 2020
Nizamabad - Jun 28, 2020 , 03:18:48

పీవీకి విశ్వవ్యాప్త కీర్తి

పీవీకి విశ్వవ్యాప్త కీర్తి

  • lతెలంగాణ బిడ్డకు కేసీఆర్ కృషితో విశిష్ట గౌరవం
  • lపీవీ గొప్పతనాన్ని కాంగ్రెస్ విస్మరిస్తే కేసీఆర్ గుర్తించారు
  • lఎస్సారెస్పీ వరద కాలువ ఆలోచన పీవీ నరసింహారావుదే
  • lయాదృచ్ఛికంగా వరద కాలువకు కాళేశ్వర జలాలతో సార్థకత
  • l‘నమస్తే తెలంగాణ’తో రాష్ట్ర రోడ్లు, భవనాల శాఖ మంత్రి వేముల ప్రశాంత్ రెడ్డి

నిజామాబాద్ ప్రతినిధి, నమస్తే తెలంగాణ భారతదేశానికి దిశ, దశను నిర్దేశించిన వ్యక్తి మాజీ ప్రధాని పీవీ నరసింహారావు. ఆర్థిక సంస్కరణలతో ప్రపంచ స్థాయికి దేశ ఔనత్యాన్ని తీసుకెళ్లిన గొప్ప వ్యక్తి ఆయన. పీవీ నరసింహారావు శత జయంతి సందర్భంగా ముఖ్యమంత్రి కేసీఆర్ ఏడాది పొడవునా ఉత్సవాలు నిర్వహించేందుకు సిద్ధమయ్యారు. ఖండాంతరాలకు ఆయన ప్రతిష్టను వ్యాప్తి చేసేందుకు తెలంగాణ ప్రభుత్వం కృషి చేస్తున్న వేళ ‘నమస్తే తెలంగాణ’తో రాష్ట్ర రోడ్లు, భవనాలు, గృహ నిర్మాణం, శాసనసభా వ్యవహారాల శాఖ మంత్రి వేముల ప్రశాంత్ రెడ్డి ముచ్చటించారు. 

తెలంగాణ స్వాభిమాన సత్కారం..

రాష్ట్ర ముఖ్యమంత్రి కల్వకుంట్ల చంద్రశేఖర్ రావుకు మన ప్రాంత వైతాళికుల గొప్పతనం ఆమూలాగ్రం తెలుసు. పీవీ నరసింహారావు మన ప్రాంత బిడ్డ కావడం మన అదృష్టం. ప్రధానిగా దేశానికి సేవలందించిన ఆయన పదవీ కాలంలో భారతదేశం విశ్వవ్యాప్త కీర్తిని దక్కించుకుంది. పీవీ హయాంలో వచ్చిన అనేక సంస్కరణల ఫలితంగా నేడు భారతదేశం ప్రపంచీకరణలో ఇతర దేశాలతో పోటీ పడే స్థాయికి చేరుకుంది. ఆర్థికంగా బలహీన పరిస్థితుల్లో కొట్టుమిట్టాడిన దేశానికి ఊపిరి ఊదిన వ్యక్తి తెలంగాణ బిడ్డ పీవీ నరసింహారావే అని గర్వంగా చెప్పుకోవచ్చు. కానీ కాంగ్రెస్ పార్టీ ప్రముఖులే పీవీ గొప్పతనాన్ని బయటి ప్రపంచానికి తెలువకుండా చేశారు. ఇప్పుడు మాజీ ప్రధాని పీవీ శత జయంతి వేడుకలతో తెలంగాణ రాష్ట్ర ప్రభుత్వం తెలంగాణ స్వాభిమానానికి సత్కారం చేస్తున్నట్లుగానే అనిపిస్తుంది.

రాజకీయాలకు అతీతంగా...

దక్షిణ భారతదేశం నుంచి దేశానికి తొలి ప్రధానిగా ఎన్నికైన వ్యక్తి పీవీ నరసింహారావే. అజాత శత్రువుగా పేరు పొందిన పీవీ నరసింహారావు మైనార్టీ ప్రభుత్వాన్ని ఢోకా లేకుండా నడపడం అంటే రాజకీయాల్లో అదో చారిత్రక సందర్భమే. ఆయన విశిష్ట సేవలను మెచ్చే అన్ని రాజకీయ పార్టీలు ప్రధానిగా ఆయనను ఆమోదించగా ప్రతిపక్షాలు సైతం కొనియాడాయి. ముఖ్యమంత్రి కేసీఆర్ పీవీ నరసింహారావు కీర్తిని చాటిచెప్పేందుకు శత జయంత్యుత్సవాలను నిర్వహించడం హర్షించదగిన విషయం. కేసీఆర్ ఆలోచనలు ఎప్పుడూ రాజకీయాలకు, పార్టీలకు అతీతంగానే ఉంటాయి. దేశ రక్షణకు ప్రాణాలు వదిలిన కర్నల్ సంతోష్ బాబు కుటుంబానికి, అలాగే ఆయనతో పాటు అమరులైన 19 మంది వీర జవాన్లకు ప్రాంతాలకు అతీతంగా ఆర్థిక సాయం ప్రకటించారు. కరోనా వంటి కఠిన సమయంలో దేశ ప్రజల బాగు కోసం నరేంద్ర మోదీ నిర్ణయాలకు కేసీఆర్ రాజకీయాలను పక్కన పెట్టి సంపూర్ణంగా మద్దతు తెలిపారు. 

పీవీ ఆలోచనకు యాదృచ్ఛిక లాభం

ప్రధానమంత్రి హోదాలో పీవీ నరసింహారావు నిజామాబాద్ జిల్లా ముప్కాల్ గ్రామ శివారులో ఎస్సారెస్పీ వరద కాలువకు శంకుస్థాపన చేశారు. ఆనాడు వరద నీటిని దిగువకు తరలించేందుకు పీవీ పూనుకున్నారు. 1993, జూన్ 30న శంకుస్థాపన చేశారు. ఏండ్ల తరబడి నిర్లక్ష్యానికి గురై నిర్మాణం పూర్తి కాలేదు. 2010లో వరద కాలువ ట్రయల్ రన్ నోచుకుంటున్న సమయానికి మహారాష్ట్రలో అక్రమ ప్రాజెక్టుల మూలంగా ఎస్సారెస్పీకి ఎగువ నుంచి వరద రావడం నిలిచిపోయింది. పీవీ నరసింహారావు యోచించిన వరద కాలువ ఆలోచన మరుగున పడుతున్న వేళ అపర భగీరథుడు, తెలంగాణ రాష్ట్ర ముఖ్యమంత్రి కేసీఆర్ ఆలోచనలతో యాదృచ్ఛికంగా వరద కాలువకు జల జీవం సంతరించుకుంది. ఎండిపోతున్న ఎస్సారెస్పీ ప్రాజెక్టును కాళేశ్వరం జలాలతో నింపాలనే ఉద్దేశంతో పురుడు పోసుకున్న పునరుజ్జీవ పథకంతో వరద కాలువ నేడు జలకాంతులతో ఉట్టిపడుతోంది. గత వేసవిలోనూ వరద కాలువలో నిండుగా నీళ్లు ఉండడం చరిత్రలో ఏనాడూ కనిపించని జలదృశ్యమది. 


logo