గురువారం 04 జూన్ 2020
Nizamabad - May 18, 2020 , 02:05:10

భూసారం బుగ్గి

భూసారం బుగ్గి

  • జిల్లాలో వరికోత మొదళ్ల కాల్చివేత తీవ్రతరం 
  • రైతుల చర్యలతో పంటకు మేలు చేసే బ్యాక్టీరియా దహనం
  • చీడపీడలు చుట్టుముట్టే ప్రమాదం
  • కలియ దున్నితేనే మేలంటున్న నిపుణులు..

ప్రస్తుతం యాసంగి వరి కోతలు పూర్తయ్యాయి. రైతులు వానాకాలం పంటల కోసం సన్నద్ధమవుతున్నారు. ఈ తరుణంలో భూములను సిద్ధం చేసేందుకు పంట పొలాల్లో మిగిలిపోయిన వరి మొదళ్లను కలియదున్నకుండా కాల్చివేస్తున్నారు. దీంతో భూసారం తగ్గడంతో పాటు పంటలకు మేలు చేసే బ్యాక్టీరియా సైతం నాశనమవుతున్నది. మరోవైపు వాతావరణ కాలుష్యంతోపాటు అగ్ని ప్రమాదాలు సైతం సంభవిస్తున్నాయి. పంటలకు మేలు చేసే ఎర్రలు, నత్తలు చనిపోతున్నాయి. ఫలితంగా తర్వాత వేసే పంటల్లో చీడ పీడల ప్రభావం అధికమవుతున్నది. మొదళ్లను తగులబెట్టడంతో నష్ట కారకాలు చనిపోయి పంటకు మేలు జరుగుతుందనేది అపోహ మాత్రమేనని, కాల్చివేతకు బదులు కలియదున్నడమే మేలని నిపుణులు సూచిస్తున్నారు. 

కమ్మర్‌పల్లి : వరి కోతల అనంతరం రైతులు తదుపరి సీజన్‌లో సాగుకు భూమిని సన్నద్ధం చేసుకోవడంలో భాగంగా వరి మొదళ్లను పంట భూమిలోనే కాల్చేస్తున్నారు. దీంతో అనేక దుష్పరిణామాలు ఎదురవుతున్నాయి. ప్రధానంగా నేల నిస్సారంగా మారి పంట దిగుబడులు తగ్గిపోతున్నాయి. చీడపీడల బెడద పెరిగిపోతున్నది. ప్రస్తుతం యాసంగి సీజన్‌ ముగియడంతో గ్రామాల్లో ఎక్కడ చూసినా వరి మొదళ్ల కాల్చివేత దృశ్యాలే కనిపిస్తున్నాయి. వానకాలం వరి కోతల సమయంలో కన్నా యాసంగి వరి కోతల అనంతరం ఈ కాల్చివేతలు ఎక్కువగా కనిపిస్తుంటాయి. 

వరి మొదళ్ల కాల్చివేతతో దుష్పరిణాలు

 గతంలో వరి కోతల అనంతరం తదుపరి పంట వేసుకోవడానికి ముందు మొదళ్లను మడిలో నీళ్లు నింపి కలియదున్నే వారు. దీంతో భూమి లోపల  సారానికి, పంటకు మేలు చేసే బ్యాక్టీరియా, పురుగులకు ఎలాంటి హాని కలిగేదికాదు. పైగా కలియదున్నడం ద్వారా భూసారం పెరుగుదలకు దోహదపడేది. ఇటీవల  రైతులు మొదళ్లను తగుల బెట్టడం ఎక్కువైంది. దీంతో భూమి సారవంతానికి పనికొచ్చే లక్షలాది మైక్రోబియాన్‌ బ్యాక్టీరియాలు నాశనం అవుతున్నాయి. బ్యాక్టీరియాల జీవన శైలిలో అసమతుల్యత ఏర్పడుతున్నది. ఎర్రలు, నత్తలు లాంటివి చనిపోతున్నాయి. ఫలితంగా తర్వాత వేసే పంటలో చీడ పీడల ప్రభావం పెరుగుతున్నది.

ఒకేసారి వందల ఎకరాల్లో దహనం

సాధారణంగా గ్రామాల్లో చెరువులు, సాగునీటి వనరుల కింద ఒక్కోచోట పెద్దఎత్తున వరిపొలాలు ఉంటాయి. అందులో దాదాపు సగం పొలాల రైతులు ఇలా వరి మొదళ్లను తగులబెట్టే పద్ధతినే అనుసరిస్తున్నారు. కొందరు రైతులు తగులబెట్టకుండా కలియదున్నాలనుకున్నా అనివార్యంగా వారి పొలాల మొదళ్లు తగులబడిపోతున్నాయి. ఆయకట్టులో ఒక రైతు తన భూమిలో మొదళ్లకు నిప్పు పెడితే మంటలు వ్యాపించి వందల ఎకరాల ఆయకట్టు బుగ్గవుతున్నది. యాసంగి పంటల తర్వాత మండు వేసవి సమయం కావడంతో ఆయకట్టు మూలన నిప్పు పెడితే ఒక్క రోజులోనే  మొత్తం మడుల్లో ఉన్న మొదళ్లన్నీ తగులబడి పోతున్న సందర్భాలు అనేకం. ఇలా పెద్ద ఎత్తున తగులబెట్టడంతో వాతావరణ కాలుష్యానికి కారణమవుతున్నది. 

ఇలా చేస్తే మేలు..

వరి కోతల అనంతరం సింగిల్‌ సూపర్‌ పాస్పేట్‌ ఎకరాకు వంద కిలోల చొప్పున వేసి కలియదున్నాలి. పంట కోత తర్వాత పచ్చిరొట్ట విత్తనాలు, పిల్లిపెసర, జీలుగ, జనుము వేసుకొని 45 నుంచి 55 రోజుల వరకు పంటను వంద కిలోల సింగిల్‌ సూపర్‌ పాస్పేట్‌ వేసి కలియదున్నాలి. దీంతో వచ్చే పంట ఏపుగా పెరుగుతుంది. వేరు వ్యవస్థ దృఢంగా ఉంటుంది. మొక్కలకు పోషకాలు అధికంగా అందుతాయి. భూమిలో సేంద్రియ కర్బనం పెరుగుతుంది.

కలియదున్నడమే మేలు

రైతులు వరి కోతల అనంతరం కలియదున్నడం అలవాటు చేసుకోవాలి. నిప్పంటించి తగులబెట్టడంతో నష్ట కారకాలు చనిపోయి పంటకు మేలు జరుగుతుందనేది పూర్తి అపోహ మాత్రమే. దీంతో భూమికి, పంటకు తీవ్ర నష్టమే జరుగుతుంది. కలియదున్నడం ద్వారా ప్రయోజనమే తప్ప నష్టం ఉండదు. ఈ విషయంలో రైతులకు అవగాహన కల్పిస్తున్నాం. 

-కాంపాటి మల్లయ్య, ఏడీఏ, భీమ్‌గల్‌


logo