సోమవారం 25 జనవరి 2021
Nirmal - Aug 08, 2020 , 03:09:04

పత్తిలో సస్యరక్షణ చర్యలు చేపట్టాలి

పత్తిలో సస్యరక్షణ చర్యలు చేపట్టాలి

తాంసి : రైతులు వానకాలంలో వేసిన పత్తి పంటలో వచ్చే వివిధ రకాల చీడపీడలను నివారించేందుకు అవసరమైన సస్యరక్షణ చర్యలు తీసుకోవాలని ఆదిలాబాద్‌ జిల్లా వ్యవసాయాధికారి వెంకటి సూచించారు. మండలంలోని గిరిగాం, లింగూడలో రైతులకు లింగాకర్షక బుట్టలు, నిమాయిల్‌, బొట్టుపెట్టే పద్ధతికి సంబంధించిన స్టిక్స్‌ను శుక్రవారం పంపిణీ చేశారు. ప్రస్తుతం పత్తి పంట వేసి 60 రోజులు కావస్తోందని, ఈ దశలో మొక్కలను గులాబీరంగు, రసం పీల్చే పురుగు ఆశించే అవకాశం ఉందన్నారు. వీటి దాడి నుంచి పత్తి పంటను కాపాడుకునేందుకు రైతులు నిమాయిల్‌ను పిచికారీ చేయాలని సూచించారు. ఎకరం పత్తి పంటలో 10 నుంచి 15 వరకు లింగాకర్షక బుట్టలు ఏర్పాటు చేసుకోవాలన్నారు. మొక్క చివరలో బొట్టుపెట్టే పద్ధతి ద్వారా కూడా చీడపీడలను నివారించవచ్చని తెలిపారు. ఇప్పటి వరకు రైతుబీమా చేయించుకోని రైతులు సంబంధిత దరఖాస్తులు పూర్తి చేసి ఏఈవోలకు అందజేయాలన్నారు. కొత్తగా పాసుపుస్తకాలు వచ్చిన రైతులు కూడా రైతుబీమాకు దరఖాస్తు చేసుకోవాలని సూచించారు. కార్యక్రమంలో వ్యవసాయశాఖ జిల్లా నోడల్‌ అధికారి కాండ్లి శివకుమార్‌, వ్యవసాయ పరిశోధన స్థానం కీటక శాస్త్రవేత్త రాజశేఖర్‌, ఎన్‌ఎఫ్‌ఎస్‌ఎం జిల్లా ఇన్‌చార్జి నర్సింగ్‌, ఏవో రవీందర్‌, సర్పంచ్‌లు గజానంద్‌, శంకర్‌, ఏఈవో యోగిరాజ్‌, రైతులు తదితరులు పాల్గొన్నారు.



logo