బెంగళూర్ : భర్త ప్రొఫైల్ గే డేటింగ్ యాప్స్లో కంటపడటంతో బెంగళూర్కు చెందిన మహిళా టెకీ (28) అతడితో తెగతెంపులకు సిద్ధమైంది. ఈ వ్యవహారంపై మహిళా హెల్ప్లైన్కు, బసవనగుడి పోలీసులకు ఫిర్యాదు చేసిన మహిళ భర్త నుంచి విడాకులు కోరింది. జంటకు సర్ధిచెప్పేందుకు కౌన్సెలింగ్ నిర్వహించినా మహిళ కోర్టులో విడాకుల పిటిషన్ దాఖలు చేసేందుకు మొగ్గుచూపింది. సాఫ్ట్వేర్ కంపెనీలో పనిచేసే మహిళకు 2018 జూన్లో బ్యాంకులో పనిచేసే 31 ఏండ్ల వ్యక్తితో వివాహమైంది.
ఆమె భర్తకు ఇది రెండో వివాహం కాగా భర్త తన వికృతమైన కోర్కెలను దాచి తనను మోసం చేశాడని మహిళ ఆరోపించారు. కాగా, పెండ్లయిన తర్వాత భర్త ఆమెకు దూరంగా ఉంటూ వచ్చాడు. తనను ఎందుకు దూరం పెడుతున్నావని ఆమె అడగ్గా మొదటి భార్య తనను మోసం చేయడంతో ఆ షాక్ నుంచి ఇంకా తేరుకోలేదని బుకాయించేవాడు. తన బలహీనతలు కప్పిపుచ్చుకునేందుకు తాము కోరిన మొత్తం కట్నంగా తీసుకురాలేదని భార్యపై చిర్రబుర్రులాడేవాడు.
లాక్డౌన్ సందర్భంగా భర్త ఫోన్ను చెక్ చేయడంతో అతడి బండారం బయటపడింది. గే డేటింగ్ యాప్లో ప్రొఫైల్ను ఓపెన్ చేసి పలువురితో చాట్ చేసేవాడని వెల్లడైంది. లాక్డౌన్ నియంత్రణలు ఎత్తివేయగానే భర్త వ్యవహారంపై పోలీసులకు ఫిర్యాదు చేసిన మహిళ అతడితో విడాకుల కోసం కోర్టు తలుపుతట్టేందుకు సిద్ధమైంది.