సునీల్, అనసూయ, బ్రహ్మానందం, వెన్నెల కిషోర్, సప్తగిరి, సుడిగాలి సుధీర్ ప్రధాన పాత్రల్లో నటిస్తున్న చిత్రం ‘వాంటెడ్ పండుగాడ్’. కె.రాఘవేంద్రరావు సమర్పణలో యునైటెడ్ కె ప్రొడక్షన్స్ పతాకంపై సాయిబాబ కోవెలమూడి, వెంకట్ కోవెలమూడి నిర్మిస్తున్నారు. ఈ నెల 19న విడుదలకానుంది. ఆదివారం ప్రీరిలీజ్ వేడుక జరిగింది. కె.రాఘవేంద్రరావు మాట్లాడుతూ ‘సీతారామం, బింబిసార, కార్తికేయ-2 సినిమాలు సాధించిన విజయాలతో తెలుగు ఇండస్ట్రీకి పూర్వవైభవం వచ్చింది. మా చిత్రాన్ని కూడా ప్రేక్షకులు ఆదరించాలని కోరుకుంటున్నా’ అన్నారు. ఈ చిత్రంలో ప్రముఖ కమెడియన్స్ అందరూ భాగం కావడంతో కావాల్సినంత వినోదం పండిందని సునీల్ పేర్కొన్నారు. ఈ సినిమా ద్వారా మంచి హిట్ కొట్టబోతున్నామని దర్శకుడు శ్రీధర్ సీపాన తెలిపారు. రాఘవేంద్రరావు సినిమాలు చూస్తూ పెరిగామని, ఆయన నిర్మిస్తున్న చిత్రంలో నటించడం ఆనందంగా ఉందని సుడిగాలి సుధీర్ అన్నారు. ఈ కార్యక్రమంలో దర్శకులు హరీష్శంకర్, బీవీఎస్ రవి, తనికెళ్ల భరణి, శ్రీనివాస్ రెడ్డి తదితరులు పాల్గొన్నారు.