లండన్ : డిజిటల్ యుగంలో తమకు నచ్చిన జోడీని ఎన్నుకునేందుకు డేటింగ్ యాప్ లనే పలువురు ఆశ్రయిస్తున్నారు. డేటింగ్ యాప్స్ లో నూతన ఒరవడికి శ్రీకారం చుడుతూ వారానికి ఒక రోజు మాత్రమే అందుబాటులో ఉండే ఓ కొత్త డేటింగ్ యాప్ వినూత్న ఆవిష్కరణకు సిద్ధమవుతోంది. వారానికి ఆరు రోజులు ఈ డేటింగ్ యాప్ అందుబాటులో ఉండదు. లండన్ కు చెందిన డిజిటల్ డేటింగ్ వేదిక థర్స్ డే పేరుతో మే 13న లండన్, న్యూయార్క్ ల్లో లాంఛ్ కానుంది. ఆ తర్వాత కొద్ది రోజులకకు డబ్లిన్, కార్డిఫ్, గ్లాస్గో ప్రాంతాల సింగిల్స్ కూ అందుబాటులోకి రానుంది. థర్స్ డే యాప్ లో తమ జోడీలను వెతుక్కునేందుకు ఇప్పటికే 1.1 లక్షల మంది యూజర్లు సైనిన్ అయ్యారని యాప్ నిర్వాహకులు వెల్లడించారు.
అర్దరాత్రిలోపు కనుమరుగయ్యే మ్యాచెస్ నుంచి యూజర్లు కనెక్ట్ కావాల్సి ఉంటుంది. ప్రజలు ఎక్కువ సమయం డేటింగ్ యాప్స్ పై కుస్తీ పడుతున్నారని ఇది ఒత్తిడిని పెంచి ఎవరో ఒకరిని ఎంచుకోవాల్సిన పరిస్థితికి దారి తీసి విసుగు తెప్పిస్తోందని నూతన డేటింగ్ యాప్ నిర్వాహకులు పేర్కొన్నారు. అందుకే తమ యాప్ వారానికి ఒక్కరోజే పనిచేసేలా డిజైన్ చేశామని వారు చెప్పుకొచ్చారు. డేటింగ్ యాప్స్ కంటే జీవితంలో ఎన్నో ముఖ్యమైనవి ఉన్నాయని అందుకే తాము ఈ యాప్ తో ఒక్కరోజులోనే సింగిల్స్ తమ జోడీని ఎంపిక చేసుకుని వారితో చాట్ చేయడం కలుసుకోవడం వంటివి చేయవచ్చని పేర్కొన్నారు.