Teeth Grillz | ఫ్యాషన్ ప్రపంచాన్ని ‘టీత్ గ్రిల్స్’ ట్రెండ్ ఉర్రూతలూగిస్తున్నది. దంతాలకు బంగారు రంగు వేయించుకోవడం, బంగారు పన్ను కట్టించుకోవడం పాత ఫ్యాషన్లు. ఇప్పుడు.. పంటికి నగలను తొడుగుతున్నారు. పంటి మీద సువర్ణాక్షరాలు లిఖించుకుంటున్నారు. హృదయాకారం, పొడి అక్షరాలు, గుర్తు, లక్కీ నంబర్.. డిజైన్ చేయించుకొని మరీ ధరిస్తున్నారు. నోరు తెరిస్తే చాలు.. కోలార్ గనులే. టీత్ గ్రిల్స్లో రకరకాలు. శాశ్వతంగా పళ్లకు అమర్చేవి కొన్ని, అవసరమైనప్పుడు పెట్టుకునేవి మరికొన్ని..
కాకపోతే, మీరూ ఈ ట్రెండ్ను ఫాలో అవ్వాలనుకుంటే.. పై పంటికి వేయించుకుంటారా, కింది పంటికి వేయించుకుంటారా అన్నది నిర్ణయించుకోవాలి. ఒక పంటికి సరిపోతుందా, ఏకంగా నోరంతా బంగారపు తాపడం చేయించుకుంటారా అన్నది తేల్చుకోవాలి. బంగారం, స్టెర్లింగ్ సిల్వర్, ప్లాటినం.. ఏ లోహాన్ని ఎంచుకుంటారో మీ ఇష్టం. వాటి పైన వజ్రాలు, రత్నాలు, రంగురాళ్లు వంటివి పొదిగితే ఖర్చు ఇంకొంత పెరుగుతుంది. ఒకటి రెండు కాదు.. మొత్తంగా పైన ఎనిమిది, కింద ఎనిమిది పళ్లకు అలంకరించుకోవడానికి వీలుగా అమెజాన్లో పలురకాల పంటినగలు లభిస్తున్నాయి. తెల్లని పండ్ల మీద కృష్ణవర్ణమైతే కొట్టొచ్చినట్టు కనిపిస్తుందనే ఉద్దేశంతో బ్లాక్ మెటల్ను ఎంచుకుంటున్నవారూ చాలా మందే ఉన్నారు.
అయితే ఓ చిన్న హెచ్చరిక. దీనివల్ల భవిష్యత్తులో దంతక్షయం రావచ్చు. ఆ నగలను సరిగ్గా శుభ్రం చేసుకోకపోతే దుర్వాసన ఇబ్బంది పెట్టవచ్చు. తింటున్నప్పుడో, తాగుతున్నప్పుడో ఆ ఆభరణాల ముక్కలు గొంతులో చిక్కుకుపోయే ప్రమాదం ఉంది. కాబట్టే, చాలా విద్యాసంస్థలు ఈ ఫ్యాషన్ను నిషేధించాయి. అయినా, ఆ ఫ్యాషన్పట్ల మమకారం వీడకపోతే డెంటిస్ట్ సహకారంతోనే అమర్చుకోవాలి. అందం ముఖ్యమే. కానీ ఆరోగ్యం అంతకంటే చాలా ముఖ్యం. పళ్లు ఉంటేనే .. బంగారు తొడుగైనా, వజ్రాల మెరుపులైనా! కాబట్టి, దంతాల సంరక్షణకు ప్రాధాన్యం ఇవ్వాలని నిపుణులు సిఫారసు చేస్తున్నారు. ‘నవ్వును మించిన ఆభరణం ఏముంది? పైసా ఖర్చు ఉండదు’ అన్న సలహానూ కొట్టిపారేయలేం.