‘రెమో’, ‘డాక్టర్ వరుణ్’ వంటి చిత్రాలతో తెలుగు ప్రేక్షకులకు దగ్గరైన తమిళ హీరో శివ కార్తికేయన్. ఆయన నటించిన కొత్త సినిమా ‘ప్రిన్స్’ రేపు విడుదలకు సిద్ధమవుతున్నది. ఈ చిత్రానికి అనుదీప్ కేవీ దర్శకత్వం వహించారు. సునీల్ నారంగ్, డి సురేష్ బాబు, పూస్కుర్ రామ్మోహన్ రావు సంయుక్తంగా నిర్మించారు. ఈ సినిమా రిలీజ్ సందర్భంగా చిత్ర విశేషాలను తాజా ఇంటర్వ్యూలో తెలిపారు హీరో శివ కార్తికేయన్.
ఇటీవల మన సినిమాల్లో వినోదం తగ్గిపోతున్నది. మంచి హ్యూమర్ ఉన్న చిత్రంలో నటించాలని అనిపించింది. ఒక స్నేహితుడి ద్వారా అనుదీప్ని కలిస్తే బాగా నవ్వించే కథ చెప్పారు. ఈ కథతో సినిమా బాగుంటుందని నిర్ణయించుకున్నాం. కథ పరంగా చూస్తే ఇదొక యూనివర్సల్ సబ్జెక్ట్. తెలుగు, తమిళం అనే తేడా లేకుండా ప్రేక్షకులందరికీ నచ్చుతుంది.
ఒక భారతీయ యువకుడు బ్రిటీష్ అమ్మాయి ప్రేమలో పడతాడు. అతని ఊరి మనుషులకు ప్రేమ, పెళ్లి వంటి విషయాల్లో సంప్రదాయ ఆలోచనా ధోరణి ఉంటుంది. కథానాయకుడు వాళ్ల దృక్పథాన్ని ఎలా మార్చాడు, ప్రేమించిన అమ్మాయిని తన వాళ్ల ఆమోదంతో ఎలా పెళ్లి చేసుకున్నాడు అనేది కథాంశం. దర్శకుడు అనుదీప్ చిత్రీకరించే పాత్రల్లో అమాయకత్వం ఉంటుంది. ఈ చిత్రంలోనూ అలాంటి క్యారెక్టర్లను చూస్తారు.
నా తండ్రి క్యారెక్టర్లో సత్యరాజ్ నటించారు. ఆయనకు కులం, మతం అనే పట్టింపులు ఉండవు. మన మతం, కులం కాని అమ్మాయినే పెళ్లి చేసుకోమని చెబుతుంటారు. ఆయనది ప్రత్యేకమైన పాత్ర. సత్యరాజ్, నేను చేసిన సన్నివేశాలకు మంచి పేరొస్తుందని
తెలుగు కథను తమిళ నేటివిటీకి మార్చడం సవాలుగా మారింది. ఇకపైనా ఇలాంటి ద్విభాషా చిత్రాల్లో నటించాలని ఉంది. హీరో విజయ్, దర్శకుడు వంశీ పైడిపల్లితో సినిమా చేస్తున్నారు. రామ్ చరణ్ శంకర్ దర్శకత్వంలో పనిచేస్తున్నారు. ఇలా రెండు పరిశ్రమల వారు కలసి సినిమాలు చేయడం మంచి పరిణామం. దక్షిణాది పరిశ్రమ ప్రస్తుతం గొప్ప స్థితిలో ఉంది.