‘నా కెరీర్లో చిరకాలం గుర్తుండిపోయే సినిమా ఇది. నిర్మాతలకు చక్కటి లాభాల్ని తెచ్చిపెట్టింది. ఏడాదిన్నర శ్రమకు మంచి ఫలితం దక్కింది’ అని అన్నారు సందీప్కిషన్. ఆయన కథానాయకుడిగా నటించిన చిత్రం ‘ఏ1 ఎక్స్ప్రెస్’. టీజీ విశ్వప్రసాద్, అభిషేక్ అగర్వాల్, సందీప్కిషన్, దయాపన్నెం నిర్మించారు. డెన్నీస్ జీవన్ కనుకొలను దర్శకుడు. ఇటీవల ఈ చిత్రం ప్రేక్షకుల ముందుకొచ్చింది. బుధవారం హైదరాబాద్లో ఈ చిత్ర విజయోత్సవ వేడుకను నిర్వహించారు. సందీప్కిషన్ మాట్లాడుతూ ‘ఇప్పటివరకు వినోదాత్మక చిత్రాల్లోనే ఎక్కువగా నటించా. ఆ శైలికి భిన్నంగా ఇరవై ఐదో సినిమా చేయాలనే ఆలోచనతో ఈ కథను ఎంచుకున్నా. రజనీకాంత్ నటించిన ‘బాషా’ చిత్రాన్ని ప్రేరణగా తీసుకొని హాకీ బ్యాక్డ్రాప్లో రూపొందించాం. ఐకమత్యమే బలమని సినిమాలో మేము చెప్పిన పాయింట్కు అందరూ కనెక్ట్ అవుతున్నారు’ అన్నారు. రచయిత కోన వెంకట్ మాట్లాడుతూ ‘స్పోర్ట్స్ బ్యాక్డ్రాప్లో చక్కటి ఎమోషన్స్తో మంచి సినిమా చేయొచ్చని నిరూపించింది. జీవితాంతం గుర్తుండిపోయే సినిమా ఇది. కరణం మల్లీశ్వరి బయోపిక్ను తెరకెక్కించేలా నాలో ధైర్యాన్ని నింపింది’ అన్నారు. సక్సెస్ను మనస్ఫూర్తిగా ఆస్వాదిస్తున్నామని, డిస్ట్రిబ్యూటర్లందరూ సేఫ్ అయ్యారని నిర్మాతల్లో ఒకరైన అభిషేక్ అగర్వాల్ పేర్కొన్నారు.