ఒకటి పూర్తిగా పొలిటికల్ డ్రామా..మరొకటి పూర్తిగా యాక్షన్ సినిమా..ఈ రెండు సినిమాల మధ్య పోలికలు ఎందుకు ఉంటాయి అనుకుంటున్నారా..? కానీ కాస్త జాగ్రత్తగా గమనిస్తే చిరంజీవి, నాగార్జున సినిమా కథల మధ్య ఎన్నో పోలికలు కనిపిస్తాయి. ఇంకా చెప్పాలంటే రెండు సినిమాల కథలు దాదాపు సేమ్ టు సేమ్ ఉన్నాయి.
ఒక్కసారి గాడ్ ఫాదర్ (Godfather)సినిమా కథ విషయానికి వస్తే..ఇందులో అనుకోకుండా ముఖ్యమంత్రి చనిపోతే..ఆయన అల్లుడు సీఎం అవ్వడానికి ఎన్నో కుట్రలు చేస్తాడు. అలాంటి సమయంలో బయట నుంచి అన్నయ్య తన చెల్లిని కాపాడుకోవడానికి..అలాగే పార్టీని నిలబెట్టడానికి ముందుకు వస్తాడు. ఇక్కడ ఆ అన్నయ్య చిరంజీవి (Chiranjeevi)అయితే.. చెల్లెలు నయనతార. గాడ్ ఫాదర్ కథంతా పొలిటికల్ ఫ్యామిలీ డ్రామా చుట్టూ తిరుగుతుంది.
ఇప్పుడు ది ఘోస్ట్ (The Ghost)విషయానికి వస్తే.. ఇక్కడ కూడా దాదాపు సేమ్ టు సేమ్. కాకపోతే ఇక్కడ పాలిటిక్స్ ఉండవు.. బిజినెస్ ఉంటుంది. ఒక పెద్ద వ్యాపారవేత్తను పెళ్లి చేసుకున్న నాగార్జున (Nagarjuna) అక్క..ఆయన చనిపోయిన తర్వాత ఆ వ్యాపారాన్ని మొత్తం చూసుకుంటూ ఉంటుంది. కాకపోతే వాళ్ల తాత గారి చిన్న భార్య వారసులు నాగార్జున అక్క కంపెనీని.. వ్యాపారాలను లాక్కోవడానికి ప్రయత్నిస్తారు.
ఈ క్రమంలోనే వాళ్లను చంపడానికి మాఫియాతో సంబంధాలు పెట్టుకుంటారు. ఆ సమయంలో తన కాపాడేది తమ్ముడు మాత్రమే అని తెలిసి నాగార్జునకు ఫోన్ చేస్తుంది అక్క. అప్పుడు అక్కడికి వచ్చి ఆమె బిజినెస్ తో పాటు వాళ్ళను ఎలా కాపాడాడు అనేది ఈ సినిమా కథ. ఇక్కడ కూడా ఫ్యామిలీ డ్రామానే. ఈ రెండు సినిమాల్లో ఉన్న మరో కామన్ పాయింట్ మాఫియా.. అండర్ వరల్డ్.. డ్రగ్స్. ఇది ఇటు చిరంజీవి సినిమాలో..అటు నాగార్జున సినిమాలో కామన్ గా కనిపిస్తాయి.
అక్కడ పొలిటికల్ చుట్టూ ఇవన్నీ తిరిగితే.. ఇక్కడ బిజినెస్ బేస్ చేసుకుని ఈ కథ రాసుకున్నాడు ప్రవీణ్ సత్తారు. అలా ఒకే పండక్కి తెలియకుండా ఒకే సబ్జెక్టుతో వచ్చారు చిరంజీవి, నాగార్జున.