Visit:
Prabhas Spirit | ప్రభాస్, సందీప్ రెడ్డి వంగా కాంబినేష‌న్‌లో రానున్న మోస్ట్-అవైటెడ్ యాక్ష‌న్ ఎంట‌ర్‌టైన‌ర్ చిత్రం ‘స్పిరిట్’ గురించి ఒక ఆసక్తికరమైన వార్త ప్రస్తుతం టాలీవుడ్‌లో చర్చనీయాంశమైంది. ఈ సినిమా రెగ్యులర్ షూటింగ్ ఇటీవల మొదలవ్వ‌గా, దర్శకుడు సందీప్ వంగా ప్రభాస్ లుక్ విషయంలో అత్యంత గోప్యత పాటిస్తున్నట్లు తెలుస్తోంది. తాజా స‌మాచారం ప్రకారం ‘స్పిరిట్’ సినిమాలోని ప్రభాస్ పాత్ర లుక్‌ను అభిమానుల‌కు సర్‌ప్రైజ్‌గా ఉంచాలని సందీప్ వంగా గట్టిగా నిర్ణయించుకున్నారు. అందుకే, ఈ లుక్ లీక్ అవ్వకుండా ఉండేందుకు, రాబోయే ఆరు నెలల పాటు ప్ర‌భాస్‌ని పబ్లిక్ ఈవెంట్స్‌కు దూరంగా ఉండాల‌ని ఆయ‌న కోరినట్లు స‌మాచారం.
పబ్లిక్ ఈవెంట్లు, ఎయిర్‌పోర్ట్‌లలో ప్రభాస్ క‌నిపిస్తే, ఆయ‌న లుక్‌ను అభిమానులు లేదా మీడియా ఫొటోలు తీసే అవకాశం ఉంది. ఈ విషయాన్ని దృష్టిలో ఉంచుకుని, కొన్ని నెలల పాటు ఎలాంటి ప్రచార కార్యకలాపాలు లేదా బహిరంగ కార్యక్రమాలకు హాజరు కాకూడదని ప్రభాస్, సందీప్ వంగా నిర్ణయించుకున్నట్లుగా వార్తలు వినిపిస్తున్నాయి. ఈ నిర్ణయం ప్రభాస్ అభిమానులను కొంత నిరాశపరిచినా సందీప్ వంగా ప్ర‌భాస్‌ను ఏ విధంగా ప్రెజెంట్ చేయబోతున్నారో చూడాలనే ఉత్సాహం మాత్రం వారిలో ఎక్కువగా ఉంది. ‘స్పిరిట్’ చిత్రంలో త్రిప్తి దిమ్రీ క‌థానాయిక‌గా న‌టిస్తుండగా, వివేక్ ఒబెరాయ్‌, ప్ర‌కాశ్ రాజ్‌, కాంచ‌న ఇత‌ర ముఖ్య పాత్ర‌ల్లో కనిపించ‌నున్నారు. ఈ భారీ బడ్జెట్ చిత్రం 2027లో ప్రేక్షకుల ముందుకు వచ్చే అవకాశం ఉంది.
