ప్యారిస్: కరోనా కల్లోలంతో ఎన్నో కొత్తకొత్త పదాలు మనకు తెలిసి వచ్చాయి. లక్షణాలు, టెస్టులు మొదలుకుని చికిత్స దాకా కరోనాకు సంబంధించిన ఎన్నో సంగతులు జనానికి అర్థమైపోయాయి. ఆ పదాలను నిత్య వ్యవహారంలో వినియోగించడమూ పెరిగింది. ప్రపంచంలోని దాదాపు ప్రతి భాష కరోనా పదాలను సంతరించుకున్నది. అయితే ఫ్రెంచ్ భాషలో మాత్రం రికార్డు స్థాయిలో అత్యధికంగా 170 పదాలు వచ్చేచేరాయట. సుప్రసిద్ధ ఫ్రెంచ్ బొమ్మల నిఘంటువు ‘లే పెటిట్ లారూసో’లో 2022 ఎడిషన్లో వీటిని చేర్చారు. సార్స్ కోవ్-2, కోవిడ్-19, అసిమ్టమాటిక్, క్వారంటైన్, హోమ్ వర్కింగ్ వంటివి అందులో ఉన్నాయి. తమిళులు హిందీపదాలను తిరస్కరించినట్టుగానే ఆంగ్ల ప్రభావమున్న పదాలను సాధారణంగా నిఘంటు కమిటీ తిరస్కరిస్తుంది. కానీ ఈసారి వారి ప్రతిఘటన అంతగా లేదు. ఏం చేస్తాం.. కరోనా కల్లోలం వల్ల బాషశా భేషజం కూడా వెనుకకు పోయిందన్న మాట.