టీమిండియా స్టార్ ఆల్రౌండర్ రవీంద్ర జడేజా తాజాగా షేర్ చేసిన వీడియో నెట్టింట వైరల్ అవుతోంది. ఆసియా కప్ మధ్యలో మోకాలి గాయంతో జట్టుకు దూరమైన జడ్డూ.. వచ్చే నెలలో ప్రారంభం అవనున్న టీ20 ప్రపంచకప్ కూడా ఆడటం లేదన్న సంగతి తెలిసిందే. మైదానంలో అత్యంత చురుకుగా ఉండే ఫీల్డర్లలో జడ్డూ ఒకడు. ఈ తరంలోనే అత్యుత్తమ ఫీల్డర్గా అతడిని క్రీడాలోకం భావిస్తుంది. ఇటీవల బ్యాటుతో, బంతితో రాణిస్తూ టెస్టుల్లో నెంబర్ వన్ ఆల్రౌండర్గా ఎదిగాడీ సౌరాష్ట్ర ఆటగాడు.
అయితే మోకాలి గాయంతో బౌలింగ్ చేయడం కూడా కష్టంగా మారడంతో జట్టును వీడాల్సి వచ్చింది. ఇటీవలే మోకాలికి సర్జరీ చేయించుకున్న అతను.. ఊతకర్రల సాయంతో నడుస్తున్న ఫొటోను సోషల్ మీడియాలో పంచుకున్నాడు. ఈ ఫొటోకు ‘వన్ స్టెప్ ఎట్ ఎ టైం’ (ఒక్కొక్క అడుగు వేస్తూ ముందుకు సాగుతున్న) అని క్యాప్షన్ జతచేశాడు. ఇది చూసిన క్రికెట్ అభిమానులు అతను త్వరగా కోలుకోవాలంటూ కామెంట్లు చేస్తున్నారు.