మీ బీజేపీ రాజ్యాంగంలో రాశారా: నిలదీస్తున్న నెటిజన్లు
న్యూఢిల్లీ, ఫిబ్రవరి 26: ప్రపంచంలోనే అతి పెద్ద పార్టీ తమది అని చెప్పుకొనే పార్టీకి ఆయన జాతీయ అధ్యక్షుడు. ఆయనేనండీ! బీజేపీ జాతీయ అధ్యక్షుడు జేపీ నడ్డా. ఆయనగారు ఏమంటున్నారంటే.. ‘50 వేల జీతం తీసుకొనేవాళ్లు కూడా సర్కారీ కొలువు కోసం చూస్తారు’ అని. ఈయనగారేదో ఉద్యోగాలను ఉచితంగా పంచిపెట్టినట్టు. అంతేలే! ప్రభుత్వ ఉద్యోగాలను పీకేసేటోళ్లు, ప్రభుత్వ సంస్థలను అమ్మేటోళ్లు ఇంతకన్నా ఇంకెలా మాట్లాడుతారు. ఏటా 2 కోట్ల ఉద్యోగాలు కల్పిస్తామని నరం లేని నాలుకతో హామీలిచ్చిన ఈ బీజేపీ పెద్దలు.. నిరుద్యోగులను నయవంచన చేసింది తెలిసిందేగా! ఎనిమిదేండ్లుగా కండ్లారా చూస్తున్నదేగా! ప్రభుత్వ రంగ సంస్థలను బేరం పెట్టి, పబ్బం గడుపుకొనే బీజేపీకి.. ఉద్యోగుల భద్రత గురించి ఏం తెలుస్తుందిలే! ‘50 వేలు సంపాదించినా..’ అని అంటున్నారీయన. ఈయనో, ఈయన పెద్ద సారు మోదీనో, చిన్న సారు అమిత్షానో దేశంలోని ప్రతీ ఒక్కరి అకౌంట్లలో వేసిన డబ్బులేం కావుగా! కాయాకష్టం చేసి, చెమట నీరు చిందించి సంపాదించుకొంటున్నవే. ఏ.. 50 వేలు సంపాదిస్తే ప్రభుత్వ ఉద్యోగానికి దరఖాస్తు చేసుకోవద్దని రూలేమైనా పెట్టారా? లేక వీరే దొడ్డిదారిన చట్టంలో చేర్చారా ఏంటి? దేశంలో నిరుద్యోగం తాండవం చేస్తున్నదని సర్వేలన్నీ ఘోషిస్తున్నాయి. నడ్డా గారు.. ప్రభుత్వ ఉద్యోగాలు మీ ఇంట్లో నుంచి తీసుకొచ్చినవేం కాదండీ. భారత రాజ్యాంగం కల్పించిన హక్కు అని సగటు నిరుద్యోగి అంటున్నాడు.