Rishi Sunak | బ్రిటన్ ప్రధాని పదవి రేసులో భారత సంతతికి చెందిన రిషి సునాక్ వెనకబడ్డారు. అధికార కన్జర్వేటివ్ పార్టీ అధ్యక్షుడు- దేశ ప్రధాని పదవికి పోటీ పడుతున్న ఆయన ప్రత్యర్థి లిజ్ ట్రస్ ఆధిక్యంలో ఉన్నట్లు ఒపీనియమ్ అనే సంస్థ నిర్వహించిన సర్వే పేర్కొంది. 61 శాతం మంది లిజ్ ట్రస్కు ఓటేస్తే, కేవలం 39 శాతం మంది మాత్రమే రిషి సునాక్కు అనుకూలమని చెప్పారు. ఈ సర్వే వివరాలు `ది అబ్జర్వర్` పత్రికలో ప్రచురితం అయ్యాయి. సుమారు 22 అంశాలపై అడిగిన ప్రశ్నల్లో టోరీ పార్టీ సభ్యులు సగం మందికి పైగా లిజ్ ట్రస్ అభిప్రాయానికే మద్దతు ఇచ్చారు.
లిజ్ ట్రస్ ఆధిక్యంలో కొనసాగుతున్నా.. కన్జర్వేటివ్ పార్టీ అధ్యక్షుడిగా.. బ్రిటన్ ప్రధానిగా ఎన్నికయ్యేందుకు రిషి సునాక్కు అవకాశాలు ఉన్నాయని రాజకీయ విశ్లేషకులు చెబుతున్నారు. సీనియర్లు లిజ్ ట్రస్కు మద్దతు ఇస్తున్నారు. యువతరం మాత్రం రిషి సునాక్కు అనుకూలంగా ఉన్నారని తెలుస్తున్నది. ఆపద్ధర్మ ప్రధాని బోరిస్ జాన్సన్ను రాజీనామా చేయాల్సిందేనని రిషి సునాక్ కోరడమే ఆయనకు ప్రతికూలంగా మారిందని సమాచారం. బోరిస్ జాన్సన్కు సన్నిహితులుగా భావిస్తున్న లిజ్ ట్రస్.. ఆయన్ను రాజీనామా చేయాలని కోరకపోవడమే ఆమెకు కలిసి వస్తున్నదని రాజకీయ విశ్లేషకులు భావిస్తున్నారు.
వచ్చేనెల రెండో తేదీ వరకు కన్జర్వేటివ్ పార్టీ నేతను ఎన్నుకోవడానికి గడువు ఉంది. ఆ లోగా కన్జర్వేటివ్ పార్టీ సభ్యులు ఆన్లైన్లో గానీ, పోస్టల్ ద్వారా గానీ తమ ఓట్లు వేయాల్సి ఉంటుంది. వచ్చే నెల ఐదో తేదీన ఫలితాలు వెలువడతాయి. అదే రోజు కన్జర్వేటివ్ పార్టీ అధినేతగా గెలిచిన అభ్యర్థే దేశ ప్రధానిగా బాధ్యతలు స్వీకరిస్తారు. లిజ్ ట్రస్తో పోలిస్తే బాగా వెనకబడ్డ రిషి సునాక్.. వచ్చే మూడు వారాల్లో మద్దతు పుంజుకోవడానికి ముమ్మర ప్రయత్నాలు చేస్తున్నట్లు సమాచారం.