Jaguar Power | మొసలి.. దాన్ని చూడగానే మన ఒళ్లు గగుర్పొడుస్తుంది. పెద్ద పెద్ద దంతాలతో నోరు తెరిచి మన వైపు అది వస్తుందంటే.. మన ప్రాణాలు పైపైనే పోవడం ఖాయం. అంతటి భయంకరమైన జంతువును మరో జంతువు అలవోకగా నోటి కరుచుకుని ఎంచక్కా పారిపోయింది. ఇంతకీ ఏమిటా జంతువు అనే కదా మీ అనుమానం.. మీరంతా అనుకుంటున్నట్లుగానే అది చిరుతపులి.
కాలువ గట్టున చెట్ల గుబుర్లలో ఓ చిరుతపులి అదను కోసం ఎదురుచూస్తూ ఉన్నది. కాలువలో ప్రశాంతంగా ఈదుకుంటూ తన ఆహారం కోసం ప్రయత్నిస్తున్న మొసలి కాస్తా.. ఈ చిరుతపులి కంట పడింది. ఇంకేముంది ఒక్క ఉదుటున లగెత్తి నీటిలోకి దూకింది. మొసలిని పట్టుకోవడానికి దానితో కొద్దిసేపు యుద్ధం చేసింది. చివరకు నోట కరుచుకుని గట్టుపైకి చేరి కనుమరుగైంది.
OMG what a power!! pic.twitter.com/LHZazN2zwP
— Figen (@TheFigen) August 14, 2022
ఈ వీడియోను ది ఫైజన్ అనే వ్యక్తి ట్విట్టర్లో సోమవారం నాడు పోస్ట్ చేశాడు. నిజానికి ఈ వీడియోను రెండేండ్ల క్రితమే వాహ్సీ హయత్లార్ అనే వ్యక్తి ట్విట్టర్లో పోస్ట్ చేశాడు. ఈనాటికీ ఆ వీడియో వైరల్ అవుతుండటం విశేషం. ఈ వీడియోను 2.6 లక్షలకు పైగా జనం వీక్షించగా 27 వేలకు పైగా లైకులు వచ్చాయి. ఈ వీడియోను ఇప్పటివరకు దాదాపు 5 వేల మంది ట్విట్టర్లో రీ షేర్ చేయడం విశేషం. చిరుతపులి నోటి ఎముకలు ఎంత దృఢంగా ఉంటాయో చెప్పే వీడియో ఇది అని ఒక నెటిజెన్ వ్యాఖ్యానించగా.. చిరుతపులి చాలా ఆకలిగా ఉన్నట్లుగా ఉన్నదని మరో నెటిజెన్ రాశారు.