“సీతా రామం’ సినిమా చూసి చాలా జెలసీ ఫీలయ్యాను. నాకు రావాల్సిన పాత్రను దుల్కర్ కొట్టేశాడనిపించింది (నవ్వుతూ). ఈ సినిమా చూస్తుంటే నేను నటించిన గీతాంజలి, సంతోషం, మన్మథుడు సినిమాల నాటి పాత రోజులు గుర్తుకొచ్చాయి’ అన్నారు అగ్ర నటుడు నాగార్జున. గురువారం హైదరాబాద్లో నిర్వహించిన ‘సీతా రామం’ థాంక్స్మీట్కు ఆయన ముఖ్య అతిథిగా హాజరయ్యారు. దుల్కర్ సల్మాన్, మృణాల్ ఠాకూర్ జంటగా హను రాఘవపూడి దర్శకత్వంలో అశ్వనీదత్ ఈ చిత్రాన్ని నిర్మించారు. ఇటీవలే ప్రేక్షకుల ముందుకొచ్చింది. నాగార్జున మాట్లాడుతూ ‘ఈ చిత్రాన్ని దర్శకుడు హను రాఘవపూడి ఓ దృశ్యకావ్యంలా తెరకెక్కించాడు. కథానాయిక మృణాల్ అందం, అభినయం చూసి ఆ పాత్ర ప్రేమలో పడిపోయా. తెలుగు ప్రేక్షకులకు పాదాభివందనం. గత వారం విడుదలైన బింబిసార, సీతా రామం చిత్రాల్ని గొప్పగా ఆదరిస్తున్నారు. మంచి కంటెంట్తో సినిమాలు తీస్తే థియేటర్లకు వస్తామనే నమ్మకాన్ని ఇచ్చారు’ అని అన్నారు. రామ్ పాత్ర తన కెరీర్లోనే ప్రత్యేకమని దుల్కర్ సల్మాన్ ఆనందం వ్యక్తం చేశాడు. అశ్వనీదత్ మాట్లాడుతూ ‘నాగార్జున మా బ్యానర్లో ఐదు చిత్రాలు చేశాడు. ‘సీతా రామం’ చిత్రానికి అద్భుత విజయాన్ని అందించిన తెలుగు ప్రేక్షకులకు కృతజ్ఞతలు’ అన్నారు.