Honda Cars | ప్రముఖ జపాన్ కార్ల తయారీ సంస్థ హోండా.. పండుగల సీజన్లో కార్ల విక్రయాలు పెంచుకోవాలని చూస్తోంది. ఇందుకోసం దేశీయ కార్ల వినియోగదారుల కోసం సరికొత్త ఆఫర్ అందుబాటులోకి తెచ్చింది. `డ్రైవ్ ఇన్ 2022- పే ఇన్ 2023` స్కీమ్ ప్రవేశపెట్టింది. ప్రస్తుత పండుగల సీజన్లో ఎటువంటి ఇన్స్టాల్మెంట్ పే చేయకుండానే హోండా అమేజ్, హోండా సిటీ వేరియంట్ కార్లను తీసుకోవచ్చు. ఈ నెలాఖరు వరకు ఆఫర్ అందుబాటులో ఉంటుంది. 2023 నుంచి ఈఎంఐ చెల్లింపులు ప్రారంభం అవుతాయి.
కొటక్ మహీంద్రా ప్రైమ్ లిమిటెడ్ (కేఎంపీఎల్) భాగస్వామ్యంతో హోండా కార్స్ ఈ ఆఫర్ తీసుకొచ్చింది. ఈ ఆఫర్ హోండా డీలర్స్, కేఎంపీఎల్ బ్రాంచ్ల వద్ద అందుబాటులో ఉంటుంది. హోండా కార్స్ ఇండియా మార్కెటింగ్ అండ్ సేల్స్ వైస్ ప్రెసిడెంట్ కునాల్ బాల్ మాట్లాడుతూ ` కొటక్ మహీంద్రా ప్రైమ్ లిమిటెడ్ భాగస్వామ్యంతో మా కస్టమర్లకు ఏకీకృత అవకాశం తీసుకొచ్చింది. హోండా ఫ్యామిలీలో భాగస్వాములు కావాలని మా కస్టమర్లకు విజ్ఞప్తి చేస్తున్నాం` అని చెప్పారు.
కారు ధరలో 85 శాతం రుణ పరపతి కల్పిస్తోంది హోండా కార్స్. తొలి మూడు నెలలు నెలసరి వాయిదా (ఈఎంఐ) చాలా తక్కువ. నాలుగో నెల నుంచి రెగ్యులర్ ఈఎంఐ చెల్లించాల్సి ఉంటుంది. ఇది చివరి నెల వాయిదా వరకు కొనసాగుతుంది. కొటక్ మహీంద్రా ప్రైమ్ లిమిటెడ్ (కేఎంపీఎల్) హోల్టైం డైరెక్టర్ & ప్రెసిడెంట్ షారూఖ్ తొడివాలా మాట్లాడుతూ.. `హోండా కార్ ఇండియాతో మేం ఎల్లవేళలా భాగస్వాములం. హోండా కార్స్ కస్టమర్లను మా భాగస్వామ్యం ఆకట్టుకుంటుందని మేం ఆశాభావంతో ఉన్నాం. హోండా కారు కొనుగోలు చేయాలనుకున్న కస్టమర్లు ఈ స్కీమ్తో బెనిఫిట్ పొందాలని కోరుతున్నాం` అని చెప్పారు.