Visit:
హైదరాబాద్‌, నవంబర్‌ 29 (నమస్తే తెలంగాణ): ప్రత్యేక రాష్ట్ర సాధనే ప్రధాన లక్ష్యంగా ఉద్యమనేత కేసీఆర్‌ సంకల్పంతోనే తెలంగాణ సాకారమైందని మాజీ మంత్రి తలసాని శ్రీనివాస్‌యాదవ్‌ కొనియాడారు. గాంధేయ మార్గంలో ఆయన ప్రత్యేక రాష్ర్టాన్ని తీసుకొచ్చారని తెలిపారు. హైదరాబాద్‌ తెలంగాణ భవన్‌లో కేసీఆర్‌ నాడు ఆమరణ దీక్షకు పూనుకున్న రోజైన ‘దీక్షాదివస్‌’ కార్యక్రమాన్ని ఘనంగా నిర్వహించారు. అనంతరం ఏర్పాటైన సభలో ఆయన మాట్లాడారు. కేసీఆర్‌ ప్రత్యేక తెలంగాణ రాష్ర్టాన్ని తేవడం ఒక సువర్ణాధ్యాయమని అభివర్ణించారు. వాస్తవానికి 1969లోనే తెలంగాణ ఉద్యమం పురుడు పోసుకున్నదని, ఆ తర్వాత 2001లో కేసీఆర్‌ నాయకత్వంలో ఏర్పాటైన టీఆర్‌ఎస్‌ పార్టీతోనే తెలంగాణ రాష్ట్రం ఏర్పడిందని గుర్తుచేశారు. తెలంగాణ కోసం చిత్తశుద్ధితో కేసీఆర్‌ పోరాడారని, అన్ని పార్టీలను సమాయత్తపరచి కేంద్ర ప్రభుత్వం మెడలు వంచి తెలంగాణను సాధించి పెట్టారని తెలిపారు.
తెలంగాణ రాష్ట్ర సాధన కోసం కేసీఆర్‌ చేసిన ఉద్యమాన్ని మరచిపోలేనిదని, ప్రత్యేక రాష్ట్రం కోసం ఆయన చావునోట్లో తలపెట్టి బయటకొచ్చారని పలువురు ప్రజాప్రతినిధులు, నాయకులు కొనియాడారు. కేసీఆర్‌ ఆమరణ దీక్షతోనే కేంద్రం దిగివచ్చి తెలంగాణను ఇచ్చిందని బీఆర్‌ఎస్‌ ఎమ్మెల్యే ముఠా గోపాల్‌ గుర్తుచేశారు. రానున్న రోజుల్లో మాత్రం రాష్ట్రమంతటా గులాబీ జెండా ఎగరడం, ప్రతిపక్షాల అభ్యర్థులు డిపాజిట్లు కోల్పోవడం ఖాయమని ధీమా వ్యక్తంచేశారు. తెలంగాణ ప్రత్యేక రాష్ట్రం అయ్యాక తొలి సీఎం కేసీఆర్‌ నేతృత్వంలోనే అభివృద్ధికి బాటలు పడ్డాయని జిల్లా పరిషత్‌ మాజీ చైర్‌పర్సన్‌ తుల ఉమ తెలిపారు. తెలంగాణ ఉద్యమం లాగానే, రాష్ట్రాన్ని అభివృద్ధి, సంక్షేమ పథంలో నడిపారని కొనియాడారు. కేసీఆర్‌ లాంటి నేత దేశంలోనే మరెవరూ లేరని డిప్యూటీ మాజీ సీఎం మహమూద్‌ అలీ తెలిపారు.
కేసీఆర్‌ పదవులను గడ్డిపోచల్లా వదులుకున్నారని చెప్పారు. కేసీఆర్‌ 11 రోజులపాటు ఆహారం ముట్టుకోకుండా కఠోర దీక్షను కొనసాగించారని, కేంద్రం మెడలు వంచి తెలంగాణను సాధించారని చెప్పారు. కేసీఆర్‌ తెలంగాణకు ఆశాదీపమై నాడు ఉద్యమాన్ని నడిపారని, వ్యూహాలు, పోరాటాలతో ఆయన తెలంగాణను సాధించారని శాసనమండలి డిప్యూటీ చైర్మన్‌ బండా ప్రకాశ్‌ తెలిపారు. కేసీఆర్‌ ఆమరణ నిరాహార దీక్ష ఉద్యమ చరిత్రలో ఓ మైలురాయి అని అభివర్ణించారు.
తెలంగాణను తెచ్చిన, ఘనంగా అభివృద్ధి చేసిన తెలంగాణ తొలి ముఖ్యమంత్రి కేసీఆర్‌ చరిత్రలో చిరస్థాయిగా నిలిచిపోతారని ఎమ్మెల్సీ సురభి వాణీదేవి కొనియాడారు. కేసీఆర్‌ ఆమరణ నిరాహార దీక్షతోనే ప్రత్యేక తెలంగాణ కల సాకారమైందని తెలిపారు. మన దేశ జాతిపిత మహాత్మాగాంధీ అయితే, కేసీఆర్‌ తెలంగాణ జాతిపిత అని ఎమ్మెల్సీ దాసోజు శ్రవణ్‌కుమార్‌ అభివర్ణించారు. తెలంగాణ ఉద్యమం సమయంలో కేసీఆర్‌ను ఉమ్మడి ఏపీ పాలకులు అనేక ఇబ్బందులకు గురిచేశారని, అవమానాలకు గురి చేశారని తెలిపారు. అయినా కేసీఆర్‌ ఉద్యమపంథాను వీడలేదని, మొక్కవోని దీక్షతో ప్రత్యేక రాష్ర్టాన్ని సాధించి పెట్టారని గుర్తుచేశారు.
తెలంగాణ ఉద్యమం సమయంలోనే దేశంలోని దాదాపు అన్ని పార్టీలు ‘జై తెలంగాణ’ అనేలా చొరవ తీసుకున్న ఘనుడు కేసీఆర్‌ అని తలసాని శ్రీనివాస్‌యాదవ్‌ గుర్తుచేశారు. కేసీఆర్‌ ప్రాణాలకు తెగించి ఆమరణ నిరాహార దీక్షకు దిగితేనే కేంద్రం ప్రత్యేక రాష్ర్టాన్ని ఇచ్చిందని తెలిపారు. సాధించుకున్న తెలంగాణలో తొలి, మలి ప్రభుత్వాల హయాంలో అనేక అభివృద్ధి, సంక్షేమ కార్యక్రమాలు అమలు చేసిన విషయాన్ని మరువొద్దని కోరారు. అందుకే కేసీఆర్‌ మళ్లీ రావాలని తెలంగాణలోని ప్రతి ఒక్కరూ కోరుకుంటున్నారని తెలిపారు.
ఆయన ప్రత్యేక రాష్ర్టాన్ని తెస్తేనే నేడు అనేక మందికి వచ్చిన పదవులు కేసీఆర్‌ భిక్షే అని తెలిపారు. కేసీఆర్‌ హయాంలో నిర్మించిన కట్టడాల్లోనే వారంతా ప్రస్తుతం పదవులను అనుభవిస్తున్న విషయాన్ని మరువొద్దని హితవు పలికారు. తెలంగాణ తొలి సీఎంగా కేసీఆరే ఒక చరిత్ర అని కొనియాడారు. మాయమాటలు, మోసపూరితమైన హామీలతో ప్రజలను మోసం చేసి, అధికారంలోకి వచ్చిన కాంగ్రెస్‌ అధికార దుర్వినియోగానికి పాల్పడుతూ, కాంగ్రెస్‌ సర్కార్‌ అన్నింటా విఫలమైందని విమర్శించారు.
