Visit:
సిటీబ్యూరో, నవంబర్‌ 28 (నమస్తే తెలంగాణ): ఆన్‌లైన్‌ పెట్టుబడులు పెడితే అధికలాభాలు ఇస్తామంటూ చెప్పిన సైబర్‌ నేరగాళ్లు నగరవాసి నుంచి రూ.51లక్షలు దోచేశారు. నగరంలోని మలక్‌పేట ప్రాంతానికి చెందిన 60 ఏండ్ల రిటైర్డ్‌ బ్యాంక్‌ ఉద్యోగి ఈ నెల మొదటి వారంలో ఫేస్‌బుక్‌లో ఐఐఎఫ్‌ఎల్‌ పేరుతో ఒక ప్రకటన చూశారు. ఆ కంపెనీ లింక్‌ క్లిక్‌ చేయగానే ఐఐఎఫ్‌ఎల్‌ క్యాపిటల్‌ నుంచి గోషన్‌యాదవ్‌ అనే వ్యక్తి తనను తాను పరిచయం చేసుకుని వాట్సాప్‌ మెసేజ్‌లు పంపించాడు.
ఐపీఓ కేటాయింపులతో పాటు పెట్టుబడులు పెడితే అధిక లాభాలు ఇస్తామంటూ నమ్మించి మొదట రూ.8వేలు పెట్టించాడు. బాధితుడికి ఈ విషయంలో లాభాలు రావడంతో విడతల వారీగా ఈ నెల 25వ తేదీ వరకు రూ.51.23లక్షలు పెట్టుబడిగా పెట్టారు. దీంతో అతడికి రూ.1.30 కోట్ల లాభం వచ్చినట్లు చూపించారు. అయితే డబ్బులు విత్‌ డ్రా చేసుకోవాలని చూస్తే మరో రూ.51లక్షలు చెల్లించాలని నేరగాళ్లు డిమాండ్‌ చేయడంతో తాను మోసపోయానని గ్రహించిన బాధితుడు సైబర్‌ క్రైమ్‌ పోలీసులను ఆశ్రయించారు.
