Serum Vaccine for Cervical Cancer | కొవిడ్ కేసులు తగ్గుముఖం పట్టడంతో దాని నియంత్రణకు వ్యాక్సిన్ల గిరాకీ నెమ్మదించింది. దేశంలోనే అతిపెద్ద ఫార్మా సంస్థ సీరం ఇన్స్టిట్యూట్ ఆఫ్ ఇండియా (ఎస్ఐఐ).. గర్భాశయ క్యాన్సర్కు అడ్డుకట్ట వేసేందుకు దేశీయంగా అభివృద్ధి చేసిన తొలి వ్యాక్సిన్ను ఆవిష్కరించేందుకు రంగం సిద్ధం చేసుకుంటున్నది. వచ్చే నవంబర్ చివరిలోగా ఆవిష్కరిస్తుందని సమాచారం. గర్భాశయ క్యాన్సర్కు ప్రధాన కారణాల్లో ఒకటైన హ్యూమన్ పపిల్లోమా వైరస్ (హెచ్పీవీ)కి వ్యతిరేకంగా ఈ వ్యాక్సిన్ పని చేస్తుంది.
2017 లోనే ఈ వ్యాక్సిన్ను యూనివర్సల్ ఇమ్యూనైజేషన్ ప్రోగ్రామ్లో చేర్చేందుకు సాంకేతిక నిపుణుల కమిటీ అనుమతి ఇచ్చింది. కానీ దేశవ్యాప్తంగా అమల్లోకి రాలేదు. ఈ వ్యాక్సిన్ను ఆవిష్కరించే విషయమై సీరం వర్గాలు స్పందించలేదు. భారీ మొత్తంలో మార్కెట్లోకి అందుబాటులోకి తేవడం కన్నా దశల వారీగా ఈ వ్యాక్సిన్ ప్రజలకు అందుబాటులోకి రానున్నదని సమాచారం. ఈ వ్యాక్సిన్ ధరవరలు ఇంకా ఖరారు కాలేదని తెలియవచ్చింది.
ప్రస్తుతం మెర్క్ ఆధ్వర్యంలోని హెచ్పీవీ వ్యాక్సిన్ గర్దాసిల్, గ్లాస్కో స్మిత్లైన్ వారి సెర్వారిక్స్ మాత్రమే ప్రస్తుతం మార్కెట్లో అందుబాటులో ఉన్నాయి. సెర్వారిక్స్ వ్యాక్సిన్ మూడు డోస్లు వేసుకోవాలి. సెర్వారిక్స్ ఒక డోస్ వ్యాక్సిన్ ధర సుమారు రూ.2,100 పలుకుతుంది. గర్దాసిల్ వ్యాక్సిన్ ఒక డోస్ ధర రూ.3,100. ఇది రెండు డోస్లు వేసుకోవాలి. రోగుల వయస్సును బట్టి ఎన్ని డోస్లు వేయాలో వైద్యులు నిర్ణయిస్తారు.