ఏ దుకాణంలోనైనా చక్కెర గోలీలను చూడగానే మన నోరూరడం ఖాయం. చిన్నప్పటి నుంచి ఎన్నో రకాల చక్కెర గోలీలను మనం రుచి చూసి ఉంటాం. ప్రస్తుతం ఎన్నో వెరైటీలు మార్కెట్ను ముంచెత్తుతున్నాయి. రకరకాల పేర్లతో మనల్ని ఆకర్శిస్తున్నాయి. అయితే, వీటి తయారీకి చాలా ప్రాధాన్యం ఉంటుంది. వీటి రుచి ఎప్పుడూ ఒకేలా ఉండేందుకు కంపెనీలు చాలా జాగ్రత్తలు తీసుకుంటుంటాయి. వీటి రుచి ఎలా ఉన్నాయో చెప్పేందుకు ప్రత్యేక ఉద్యోగులను కూడా కొన్ని కంపెనీలు నియమించుకుని తమ ప్రాడక్ట్లను అత్యుత్తమంగా ఉండేలా కాపాడుకుంటుంటాయి.
ఈ కోవకు చెందినదే కెనడాకు చెందిన ఈ క్యాండీ కంపెనీ. ఈ కంపెనీ వివిధ క్యాండీలను ఉత్పత్తి చేసి కెనడాతో పాటు విదేశాల్లో అమ్ముతున్నది. ఈ కంపెనీ నుంచి దాదాపు 3,500 రకాల క్యాండీలను తయారుచేస్తున్నది. తమ క్యాండీల రుచిని జాగ్రత్తగా కాపాడుకుంటూ అన్ని వయసుల వారిని ఆకర్శిస్తున్నది. అయితే, క్యాండీల రుచిని ఎప్పటిమాదిరిగా ఉండేందుకు ‘చీఫ్ క్యాండీ ఆఫీసర్-సీసీఓ’ ఉద్యోగిని నియమించుకునేందుకు క్యాండీ ఫన్ హౌజ్ సంస్థ బోర్డ్ ఆఫ్ డైరెక్టర్లు పచ్చజెండా ఊపారు.
తమ ఉత్పత్తులను రచి చూసి చెప్పడమే కాకుండా రుచిని కాపాడేందుకు ‘చీఫ్ క్యాండీ ఆఫీసర్’ ఉద్యోగి కావాలంటూ ట్విట్టర్లో సంస్థ ఒక ప్రకటనను పోస్ట్ చేసింది. ఈ డ్రీమ్ జాబ్కు 5 ఏండ్లు పైబడిన వారు ఎవరైనా దరఖాస్తు చేసుకోవచ్చు. ఈ ఉద్యోగానికి ఎంపికైన వారికి ఏడాదికి రూ.60 లక్షలు ( లక్ష అమెరికన్ డాలర్లు) జీతంగా ఇవ్వనున్నారు. దరఖాస్తులు ఆగస్ట్ 31 లోగా సంస్థకు చేరేలా పంపుకోవాలి. కెనడియన్లు టొరంటో లేదా నేవార్క్ నుంచి, అమెరికా రెసిడెంట్లు ఇంటి నుంచి విధులు నిర్వర్తించేందుకు అకాశం కల్పిస్తున్నది.