Visit:
అల్లకల్లోలంగా మారిన జీవితంలో.. తాను ఒంటరిగా పోరాడుతున్నానని బాలీవుడ్‌ నటి, మోడల్‌ సెలీనా జైట్లీ ఆవేదన వ్యక్తం చేస్తున్నది. తన భర్త పీటర్‌ హాగ్‌పై గృహహింస ఆరోపణలు చేసిన ఈ నటి.. ఇటీవలే విడాకుల కోసం కోర్టు మెట్లు ఎక్కింది. తాజాగా, తాను ఎదుర్కొంటున్న గడ్డు పరిస్థితులపై సోషల్‌ మీడియా వేదికగా ఓ భావోద్వేగపూరితమైన పోస్ట్‌ పెట్టింది. తన జీవితంలోని అత్యంత కష్టతరమైన కాలం ఇదేనంటూ.. సుదీర్ఘ సందేశాన్ని అభిమానులతో పంచుకున్నది. ‘నా జీవితంలో అత్యంత అల్లకల్లోలమైన తుఫాను మధ్యలో చిక్కుకున్నా!
ఎటువంటి మద్దతు లేకుండా ఒంటరిగా పోరాడుతున్నా! ఇలాంటి రోజొకటి వస్తుందని నేనెప్పుడూ ఊహించలేదు. నాకూ, నా పిల్లలకు అండగా నిలుస్తానని, నన్ను జీవితాంతం ప్రేమిస్తానని చెప్పిన వ్యక్తే.. నన్ను మోసం చేసి, నా జీవితం నుంచి నిష్క్రమించాడు’ అంటూ ఆవేదనతో రాసుకొచ్చింది. తన జీవితం తనకు ఎన్నో నేర్పిందనీ.. ఇప్పుడొచ్చే ఏ తుఫానూ తనను ముంచేయలేదనీ చెప్పుకొచ్చింది. ‘ప్రపంచం నన్ను పడగొట్టాలని అనుకున్నప్పుడు పైకి లేవడం, నా గుండె పగిలిపోయినప్పుడు ఎదురొడ్డి పోరాడటం, నాకు అన్యాయం జరిగినప్పుడు పరిస్థితులపై కనికరం చూపకపోవడం, అసాధ్యం అనిపించినప్పుడు కూడా జీవించడం.. నేను బాల్యంలోనే నేర్చుకున్నా! ఆ ప్రేరణతోనే.. నా సోదరుడి కోసం, నా పిల్లల ప్రేమ కోసం, నా గౌరవం కోసం పోరాడుతా!’ అంటూ పోస్ట్‌ పెట్టింది.
సెలీనా జైట్లీ పెట్టిన ఈ పోస్ట్‌.. సామాజిక మాధ్యమాల్లో తెగ వైరల్‌ అవుతున్నది. ఆమెకు మద్దతుగా.. మనస్థయిర్యాన్ని ఇచ్చేలా నెటిజన్లు కామెంట్లు పెడుతున్నారు. ఆర్మీ కుటుంబం నుంచి వచ్చిన సెలీనా జైట్లీ.. 2001లో ఫెమీనా మిస్‌ ఇండియా కిరీటాన్ని దక్కించుకుంది. ఆ తర్వాత కొన్ని మ్యూజిక్‌ ఆల్బమ్స్‌లలో నటించి.. 2003లో జన్‌షీన్‌ సినిమాతో తెరంగేట్రం చేసింది. నో ఎంట్రీ, మనీ హైతో హనీ హై, అప్నా సప్నా మనీ మనీ, థాంక్యూ, గోల్మాల్‌ రిటర్న్స్‌ వంటి సక్సెస్‌ఫుల్‌ సినిమాల్లో నటించింది. 2004లో మంచు విష్ణు సరసన ‘సూర్యం’ సినిమాతో తెలుగు ప్రేక్షకులనూ పలకరించింది. 2010లో ఆస్ట్రియన్‌ వ్యాపారవేత్త పీటర్‌ హాగ్‌ను పెళ్లాడింది. నిన్న మొన్నటిదాకా అన్యోన్యంగా కనిపించిన ఈ జంట.. తాజాగా, విడాకుల కోసం కోర్టును ఆశ్రయించింది.
